Македонија
(Видео) Водно се прекопува поради гасоводот, предвидена е и сеча на шума

Парк-шумата Водно од минатата недела е цел на нови градежни активности. Се прекопува поради изградбата на гасоводот за што е предвидена и сеча на дрвја. Четири багери во вторникот в зори, без најава, се искачиле на Водно и почнале да го рамнат теренот на местата каде што треба да поминува гасоводот. Работеле два часа и си заминале. Израмнет е дел од шумата на местото наречено Бел Камен во должина од 200 метри и ширина од 25 метри, а околчена е и целата траса кон Матка, каде што треба да минува гасоводот. Багерите сотреле и неколку борови што стојат покрај израмнетиот дел. Откорнати и искршени дрвја има и по целиот пат што води до Бел Камен – им пречеле на машините.
Работниците си заминале и ги оставиле багерите кои веќе една недела се во парк-шумата, без чувар. Ги чуваат шумарите на Јавното претпријатие „Паркови и зеленило“.
За новиот напад на зеленилото на Водно алармираа планинари што ги забележале градежните машини во близина на врвот на Водно. Тие не се согласни гасоводот да ја пресече парк-шумата и бараат стопирање на градежните активности.
Адриан Муча, директор на Јавното претпријатие „Паркови и зеленило“, во чија надлежност е парк-шумата Водно, вели дека почнале подготвителни работи за гасоводот, но сè е стопирано и во тек се состаноци на кои ќе се реши дали изградбата ќе продолжи. Директорот тврди дека во подготвителната фаза немало сеча на дрвја.
„Немаме ниту издадено одобрение за сеча на дрвја ниту сме добиле барање за сеча. Градежните работи се стопирани. Со целиот случај за градење на Водно е запознаен скопскиот градоначалник и во тек се состаноци на кои ќе се реши како да се постапува понатаму“, изјави директорот Муча за „Макфакс“ .
Проектот за изградба на гасовод на Водно е одобрен уште 2010 година кога Министерството за транспорт и врски направи и физибилити-студија за влијанието врз околината. Низ Водно ќе минува магистралниот гасовод Скопје-Гостивар-Кичево. Гасоводот минува под локалниот пат за селата Соње и Ракотинци, ја заобиколува викенд-населбата помеѓу село Сопиште и село Ракотинци и навлегува во урбаниот простор на планираната населба Сончев Град. Од таму се искачува кон врвот Водно западно од Милениумскиот крст. На ова место предвидено е одвојување од главниот магистрален вод со поставување блок-станица „Водно“ за опслужување на комплексот во склопот на Милениумскиот крст. Од врвот на Водно гасоводот продолжува кон Матка.
Утврдено е дека секаде каде што трасата на гасоводот минува низ нискостеблеста и високостеблеста вегетација ќе биде неопходно да се отстранат стебла и грмушеста вегетација. Предвидено е загадување на воздухот од градежните машини и од заварувањето на цевките, бучава од механизацијата и појава на градежен шут, а пресметани се низа ризици за околината и во текот на користењето на гасоводот.
Гасоводот го гради „Македонски енергетски ресурси“ АД (МЕР), од каде што нема официјално известување за почеток на градбата на Водно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.