Македонија
(Видео) Рускиот амбасадор: Протерувањето на дипломатот е непријателски чекор, наскоро ќе има санкции

По тврдењата на Министерството за надворешни работи дека протераниот руски дипломат ја шпионирал Македонија, амбасадорот на Руската Федерација во Македонија, Олег Шчарбек, вели дека иако побарале докази, тие не добиле.
Според амбасадорот, овој чекор на Македонија покажува дека одлучила да се приклучи во анти-руската кампања што се спроведува под раководство од Велика Британија. Санкциите не се дефинирани, но наскоро ќе ги има бидејќи, како што вели Шчарбек, оваа политичка одлука на Македонија е непријателски чекор, кој се нема случено во целата историја кога во прашање се односите меѓу двете земји.
„Претпоставуваме дека македонските власти одлучија да го преземат овој непријателски чекор кон нас под притисок од надвор. Но, тоа не е оправдување. Истакнуваме дека оваа избрзана акција се коси со официјалните ставови на власта на оваа држава за градење конструктивни односи со Русија. Не сакаме да брзаме со нашите одлуки и чекори. Во дипломатската пракса, протерувањето дипломат е многу непријателски чекор. Во свое време ние ќе вратиме со наш одговор, но овој одговор ќе биде адекватен и многу добро промислен од сите страни“, вели амбасадорот Шчарбек.
Амбасадорот на Русија во Македонија го цитираше и соопштението на МНР во кое се вели дека протерувањето на дипломатот било по консултирање на партнерите од ЕУ и НАТО, по што донесе заклучок дека Македонија решила да ѝ верува на Велика Британија. Шчарбек изрази длабоко жалење за ваквата одлука.
„Упорно го повикуваме Лондон да оствари тесна соработка со Русија, да направи сестрана истрага за трагедијата. За жал, британските власти спротивно на сите норми на меѓународното право и етиката, одбиваат да соработуваат со Русија. Тие сакаат преку политичка кампања да ја префрлат вината врз Русија. Се одвива намерно пумпање на конфротациите. Врз основа на политички притисок инспирирано е протерување на руските дипломати и низ другите земји“, додава Шчарбек.
Недоследната политика што ја спроведуваше дел од раководството на ВМРО-ДПМНЕ доведе до тоа да ја изгубат власта, коментира амбасадорот Шчарбек по изјава на потпретседателот на паријата, Александар Николовски, дека Москва не била партнер за ВМРО-ДПМНЕ.
Вкупно 26 земји во светот протераа вкупно 121 руски дипломат како одговор на труењето на рускиот шпион Сергеј Скрипал и неговата ќерка во Велика Британија. Според британската премиерка, Тереза Меј, ова е најголемо координарно протерување руски дипломати во историјата. Скрипал и неговата ќерка Јулија на 4 март беа пронајдени онесвестени на клупа во Солсбери, јужна Англија. И двајцата се во критична состојба, а за нападот е обвинета Русија со оглед на тоа што тие се отруени со нервен гас „новичок“ за кој се тврди дека е руско хемиско оружје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Потпишан Меморандум за соработка помеѓу Македонија и Италија за користење на ЕУ фондови

Во рамките на официјалната посета на Република Италија од делегација на Националната агенција за европски образовни програми и мобилност, предводена од Петар Богојески, во Рим беше потпишан Меморандум за соработка помеѓу македонската и италијанската Национална агенција, предводена од Федерика Целестини Кампанари.
Овој стратешки документ претставува темел за унапредување на билатералната соработка во областите на образованието, науката, младите, спортот и културата, со што се отвораат нови перспективи за директна поддршка на македонските универзитети, училишта, младински организации и компании преку европски фондови од Брисел, чии финансиски капацитети се значително повисоки од оние кои се достапни преку националните програми.
Потпишувањето на ваков документ со една од основачките и водечки земји-членки на Европската Унија, Италија, претставува чин од особена важност за Република Македонија. Истовремено, тоа е јасен сигнал за проширување на европската солидарност и зацврстување на меѓусебната доверба и партнерство на полето на образовниот и научниот развој.
Со овој договор, корисниците од Република Македонија ќе добијат непосреден пристап до институционални мрежи, програми и партнери од Италија, со можност за заедничка реализација на проекти и иницијативи од европски ранг.
Ова партнерство претставува уште еден чекор напред во заложбите на Националната агенција за создавање нови можности за македонските граѓани, во духот на европските вредности, меѓународната соработка и одржливиот развој.
Националната агенција изразува длабока благодарност до италијанските домаќини за топлиот прием и за визионерскиот пристап кон заедничката европска иднина на нашите млади генерации.
Македонија
Ѓорѓиевски: Награди за талентираните ученици

„Кисела Вода изобилува со талентирани ученици, на што сме исклучително горди! За таа цел, објавен е јавниот повик за доделување на награди на талентирани ученици и спортисти од основните училишта на територијата на Кисела Вода, што претставува еден стимул за нивното понатамошно градење како личности“, велат од Општината.
„Имено, се работи за Јавен повик за пријавување на најдобрите основци кои, постигнале одлични резултати на натпреварите во образованието, културата, науката и спортот кои ќе добијат финансиска поддршка, а мешовити комисии составени од претставници на Советите на родителите, наставничките совети, општинската администрација итн, ќе се погрижат за објективен и транспарентен избор на најдобрите, согласно Правилниците донесени од страна на Советот на општината, за таа намена.
Огласот е објавен на веб страната на општината и ќе трае пет дена од денот на објавувањето, а покрај објавата на општинската веб-страна и социјалните медиуми, истиот ќе биде објавен и на огласните табли на сите воспитно-образовни установи во општината.
Ги повикуваме сите заинтересирани кандидати кои ги исполнуваат условите наведени во огласот, да не се колебаат и да земат учество во изборот“, се додава во соопштението на Општината.
Јавниот оглас и потребните документи за апликација може да ги најдете на следниот линк
Македонија
(Фото) Герасимовски во Капиштец: Вложуваме во квалитетен живот на центарци, програмата заедно ќе ја пишуваме

Општина Центар, синоќа го почна караванот „Се гледаме во маало со Горан Герасимовски“ во населбата Капиштец.
Герасимовски, како што соопштува Општината, во интерес на транспарентноста и решавање на проблемите на центарци, во следните три недели ќе ги посети жителите и заеднички ќе дискутираат за проектите што се спроведуваат, но и ќе ги сослуша сите проблеми и идеи со кои ќе се креира новата четиригодишна програма за уште поубав Центар.
Пред жителите на Капиштец, Герасимовски информираше дека програмата за работа мора да произлезе од центарци, затоа што само така може општината да работи во интерес на граѓаните. Тој истакна дека во завршна фаза е реконструкцијата на паркот во Капиштец на површина од 7.800 м², кадешто има ново зеленило, нови патеки, урбана опрема и ЛЕД осветлување.
„Вложуваме во сè што значи квалитетен живот. Паркот во Капиштец целосно го обновивме и хортикултурно го уредивме, со нови дрвја, клупи и осветлување. Инвестираме во нова инфраструктура, ги реконструиравме улиците „Козара“, „Шарски Одред“ и го реконструиравме тротоарот на ул. „Народен Фронт“. Детското игралиште кај трговскиот центар „Зебра“ и спортското игралиште на ул. „Народен Фронт“ ги обновивме. Можам да кажам дека ги подобривме условите во целата населба. Пензионерите добија свој пензионерски клуб во Капиштец кадешто секојдневно се дружат и социјализираат“, рече Герасимовски.
Герасимовски, потенцираше дека се расчистени дивите депонии спроти Католичка црква и на ул. „Народен фронт“. „Општинските служби секојдневно се грижат за хигиената на општината, чистејќи го и сметот, но и дивите депонии. Изминатиов период, ЈП „Комунална хигиена“ потфрли во чистењето на контејнерите на територија на Центар поради што спремаме и кривични пријави. Недозволиво е централното градско подрачје да изгледа вака поради пропусти на градската власт“, посочи Герасимовски.
Караванот „Се гледаме во маало со Горан Герасимовски“ продолжува и денеска, на средби со центарци во Дебар маало, кај клупата на Горан Стефановски, со почеток во 18.30 часот.