Протестите што се одржаа претходните два дена во градот Кукс во Албанија со цел полицијата да ги ослободи притворените кои целосно ги уништија кабините на патарината, денеска се преселија во Тирана. Поголема група жители на градот Кукс на кои им се приклучени и жители на Тирана, протестираат пред главната полициска станица. Тие бараат ослободување на притворените и се закануваат дека нема да престанат со протестите сè додека не се остварат нивните барања. Полицијата по палењето на кабините на патарината кај тунелите кај Калимаш во близина на Кукс уапси над дваесетина протестанти.

Во меѓувреме лидерот на опозицијата, Лулзим Баша, изјави дека го поддржува протестот на жителите на Кукс и додаде дека владата на Еди Рама мора да ја укине скапата патарина или протестите нема да престанат. Невладиниот сектор во Кукс бара политиката да не се меша и да прибира политички поени и воедно упати барање до амбасадите на САД и ЕУ да преземаат активности за посредување во надминувањето на проблемот меѓу власта и жителите од Кукс.

Премиерот Еди Рама изјави ќе одговараат оние кои нанесоа големи штети на патарината. Пред два дена на автопатот кој ја поврзува Албанија со Косово за првпат со одлука на владата стартуваше патарината која изнесува од 5 до 25 евра во еден правец во зависнот од автомобилите, но на стартот дојде до големи протести и четирите кабини беа запалени и целосно уништени. Поради тоа автомобилите сè уште не плаќаат патарина, но фирмите забрзано работаат за санација на кабините на патарината.

К.М.