Шестотини и седумнаесет вонредни контроли спроведоа инспекциските служби на Агенцијата за храна и ветеринарство (АХВ) пред велигденските празници. Кај 16 оператори со контролите утврдено е дека незадоволителни биле хигиенските барања за безбеднoст на храната и техничките услови во објектите. Четири од операторите не ги спровеле задолжителните здравствени прегледни на вработените или поседувале санитарни книшки со истечен рок на важност, извести АХВ.

Пет од операторите не биле регистрирани како оператори со храна во АХВ, а кај осум, биле пронајдени несоодветно означени производи.

За утврдените недоследности кај различни категории оператори со храна, издадени се 44 решенија за нивно отстранување. За пуштање во промет на небезбедна храна и утврдени недоследности од поголем обем, изречени се и 30 парични казни во износ од 25 400 евра во денарска противвредност.

Нештетно се уништени 1 740 килограми небезбедна храна, соопшти АХВ.

„СДС, Венко Филипче и Зоран Заев мудро молчат и немаат аргументи да реагираат, ниту пак ги демантираат нашите дилеми. Помина веќе недела дена како го покренавме прашањето за златната виза за Дубаи на Венко Филипче, по примерот на неговиот надреден и духовен водач, Зоран Заев“, велат од ВМРО-ДПМНЕ.

„Нашите дилеми и прашања, по однос на златната виза, јавно ги покренавме и прашуваме дали е точно дека Филипче ја поседува и ако да, на кој начин ја стекнал? Но, одговор нема ниту од партијата СДС, на кое претседателско столче Филипче го постави токму Зоран Заев, за да му го чува грбот додека тој ги шири бизнисите.

Овде ни се јави уште една дилема, на која СДС и Филипче треба да одговорат, дали нивниот молк е потврда на сите овие поставени прашања?

Одговор очекуваме и на дилемата дали Зоран Заев во Дубаи гради високи згради над 50 ката и од каде му се парите?

Имајќи предвид дека Венко Филипче е верна сенка на Заев која секаде го придружува, се поставува прашањето дали Филипче исто така е поврзан со оваа афера?

Затоа јавно и јасно прашуваме, дали Венко Филипче и Зоран Заев имаат златни визи за Дубаи? На кој начин ги стекнале и од каде им се парите? Дали тоа се парите спечалени на грбот и здравјето на граѓаните, местејќи тендери во корона кризата, додека народот барал лек?

Едно е сигурно, овие двајца со години наназад ја уништуваа и ограбуваа државата, а сега, најверојатно, тие пари ги вложуваат во приватни бизниси. Со години глумеа и ја убедуваа јавноста дека ја спасуваат Македонија, а тие, всушност, се спасувале самите себеси и нивните милиони украдени од народот. СДС, Филипче и Заев се синоним за криминал, неспособност и предавства“, се наведува во соопштението на ВМРО-ДПМНЕ.

„На протестот што го организираа семејствата на трагично загинатите млади во Кочани, пред два дена, беа изнесени шокантни информации кои досега не беа демантирани, ниту објаснети од надлежните институции. Родителите на жртвите јавно поставуваа прашања за улогата на агенцијата за обезбедување „Рубикон“ и МВР. Овие прашања го поставуват Министерството за внатрешни работи во центарот на одговорноста“, велат од ДУИ.

„Затоа, Демократската унија за интеграција упатува директни прашања до надлежните институции, на кои јавноста сѐ уште ги очекува одговорите:

• Дали „Рубикон“ поседувала важечка лиценца за работа како агенција за обезбедување?
• Колку нејзини вработени се лиценцирани и со каква обука?
• Кои други објекти или настани ги обезбедувала оваа агенција?
• Дали и кога била предмет на инспекциски надзор? Кој го спровел и со какви резултати?
• Зошто полицијата не реагирала иако во објектот – под обезбедување на „Рубикон“ – имало малолетници по полноќ, слободна продажба и консумација на алкохол, пиротехника и нарушен јавен ред?

Ова не се прашања од дневнополитички карактер, туку барања за елементарна институционална отчетност.

ДУИ бара итна, детална и транспарентна истрага за улогата на агенцијата „Рубикон“ во трагедијата, за нејзините врски со државните институции и за неуспехот на МВР да делува соодветно“, се наведува во соопштението на ДУИ.