Градоначалникот на Скопје, Петре Шилегов, денеска го потпиша меморандумот за соработка со неформалните собирачи на отпад.

Како што информираат од Градот, целта на овој меморандум е унапредување на соработката во управувањето со отпадот, како и вклучување на неформалните собирачи во формалниот систем за собирање и управување со отпадот во Скопје.

„Со овој меморандум се обврзуваме дека заеднички ќе дејствуваме и соработуваме во интерес на подобрено управување со отпадот, унапредување на центрите за собирање, селектирање и складирање на отпадот на ниво на град Скопје. Дополнително, со ова ќе се постигне формализирање на неформалните собирачи на отпад и нивно вработување во организираниот систем за управување со отпадот“, изјавил градоначалникот Шилегов.

Главниот инструмент за соработка што произлегува од овој меморандум за реализирање на неговите цели е формирањето работна група.

„Работната група ќе изготвува предлози за подобрено работење на собирните центри, начини и методи за вклучување на неформалните собирачи на отпад, унапредување на пазарниот механизам и вработување на собирачите на отпад. За успешно функционирање на работната група, потписниците на овој меморандум ќе номинираат по еден претставник од својата институција. Министерството за животна средина и просторно планирање ќе има советодавна улога и ќе има свој претставник во работната група“, нагласил Шилегов.

Покрај скопскиот градоначалник, меморандумот го потпишале и директорот на ЈП „Комунална хигиена“, Абдусамед Шабани, претседателот на Асоцијација за управување со посебни текови на отпад, Филип Ивановски, претседателот на здружението „Ромски бизнис-информативен центар во Македонија“, Зоран Димов, и претставник на здружението за одржлив развој и заштита на животната средина „Гоу грин“, Благица Сековска.