Македонија
Движење Беса: Во нормална европска држава убиецот на Алмир ќе добиеше доживотна казна затвор
Судот сакајќи да воспостави „праведност“, по вторпат го уби малиот Алмир, давајќи му минимална казна на убиецот Бобан Илиќ и осудувајќи гo и семејствато на малиот Алмир, реагираат денеска преку соопштение од движењето Беса.
Оттаму наведуваат дека загриженоста што постојано ја демонстрирале поради преквалификацијата на предметот докажува дека судството во Македонија сé уште е селективно, непрофесионално и, за жал, како што велат, и ден денес одлуките ги заснова врз етничката припадност на странките.
„Ја потсетуваме јавноста кога младиот Насер Ештрефи го уби во самоодбрана неговиот врсник Македонец и и покрај фактот дека беше малолетник и требаше да се почитува тоа од страна на судот, повторно беше осуден на 14 години затвор, додека убиецот на Алмир, кого јавноста го гледаше и преку видеоснимки, доби олеснителна казна за нешто за што во нормални европски држави со развиена демократија и професионална правда ќе беше осуден на доживотен затвор“, се вели во соопштението на движењето Беса.
Оттаму бараат од јавниот обвинител во Македонија, Љубомир Јовески, од морални причини да поднесе оставка од функцијата, а од Републичкиот судски совет да преземе дејствие против судијата кој ја донел, како што велат, оваа скандалозна одлука.
„Со ова правосудство тешко дека може да очекуваме интегрирање во НАТО и во ЕУ. Владеењето на правото беше еден од нагласените сегменти во сите извештаи на ЕУ и НАТО и затоа владата треба сериозно да пристапи кон темелните реформи во континуитет за да не ни се повторуваат монтирани случаи и неправедни пресуди, како што е последниот случај со малиот Алмир“, стои во партиското соопштение.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лашкоска: Обновувањето на шумскиот фонд е дел од приоритетите на локално и национално ниво
Заменик министерката за животна средина и просторно планирање, Ане Лашкоска, денес ја посети Гевгелија каде заедно со градоначалникот, Андон Сарамандов, се приклучија на акцијата за масовно пошумување и подигање на јавната свест „Да пуштиме корени во нашата Гевгелија“ во рамките на која на месноста Топлик, Гевгелија се засадуваа 6000 дрвни насади.
„Министерството за животна средина ги поддржува активностите за пошумување во државата бидејќи тие се значаен ресурс од повеќе аспекти – заштита на биодивезитетот, подобрување на квалитетот на воздухот, климатските промени, заштита од ерозија и свлечишта и се важен економски ресурс“ изјави Лашкоска на настанот потенцирајќи дека обновувањето на шумскиот фонд е дел од приоритетите на локално и национално ниво особено во услови кога сме соочени со многу високи летни температури и со сериозно опожарување на шумите на територијата на целата држава.
Таа упати честитки и благодарност до градоначалникот на Гевгелија, Андон Сарамандов и општина Гевгелија за одлично реализираната акција.
Во рамките на посетата на општина Гевгелија, заменик министерката Лашкоска и градоначлникот Сарамадов направија увид во реализацијата на проектот за намалување на загуби на вода со замена и инсталација на водомери заедно со инсталација и конфигурација на опрема со далечинско отчитување. Проектот го имплементира ЈКПД Комуналец Гевгелија, а е финансиски поддржан од страна на МЖСПП со средства во висина од 5 милиони денари.
Македонија
СДСМ утре на Конгрес ќе избира ново раководство
Социјалдемократскиот сојуз на Македонија утре ќе го одржи 30. партиски Конгрес, на којшто ќе биде избрано новото партиско раководство.
Од опозициската партија известија дека Конгресот ќе има отворен и работен дел, ќе се разговара за идните, нови политики на партијата и ќе биде избрано новото раководство, однсно членовите на највисиките тела во СДСМ – Централниот и Надзорниот одбор.
На почетокот, ќе има обраќање на Венко Филипче, кој пред пет месеци ја презема претседателската функција од неговиот претходник, Димитар Ковачевски по големиот пораз што го претрпе партијата на парламентарните и претседателските избори.
Македонија
ВМРО-ДПМНЕ контра Кузеска: Оваа Влада вложува во модернизација, претходната потроши 5 милиони евра на службени возила
За разлика од ВМРО-ДПМНЕ која што вложува во модернизација, професионализација и осовременување на условите за работа во македонските институции, СДС и ДУИ во своето владеење за службени возила потрошиле повеќе од пет милиони евра, реагира ВМРО-ДПМНЕ на прес-конференцијата на портпаролката од СДСМ, Богданка Кузеска.
„Очигледно на функционерите од СДС изминатите седум години на власт, најважна им била сопствената комоција, а не и реалните проблеми на обичните луѓе“, велат од ВМРО-ДПМНЕ.
Додаваат дека во буџетот за 2025 година предвидено е зголемување на средствата за модернизација на МВР, одбраната, здравството, земјоделието, односно предвидени се зголемени средства за набавка на опрема во сите институции.
Кузеска претходно денес на прес-конференција обвини дека власта ги одби амандманите за поголеми плати, а ќе троши на мебел и скапи автомобили за функционерите.