Македонија
Семафор на Стража ќе има до август
Сообраќајот на планинскиот превој Стража ќе се регулира со семафор до почетокот на август. До тогаш Јавното претпријатие за државни патишта очекува да заврши зајакнувањето на петте моста, градежни активности поради кои се поставени семафорите. Директорот на Јавното претпријатие, Зоран Китанов, вели дека паралелно со зајакнувањето на мостовите се работи и на рехабилитација на коловозот.
„Неблагодарно е да се каже, но очекуваме до почетокот на август да има семафор на овој патен правец оти така налагаат безбедносните правила. Сега се работи на вториот мост од вкупно петте што треба да се зајакнат, а едниот е целосно завршен. Семафорите остануваат оти како ќе се заврши еден мост, тие се селат на друг. На овој патен правец се работи со полн капацитет, се работи и на мостовите и на рехабилитација на коловозот. Со мостовите очекуваме да се заврши до август, а целосната рехабилитација на коловозот, вклучително и обнова на сигнализацијата, очекуваме да заврши со крајот на градежната сезона, односно октомври – ноември“, вели директорот Китанов.
Оние што минуваа преку Стража изминатиот продолжен викенд се пожалија дека колоната кај семафорот била долга околу пет километри и со часови го минувале планинскиот превој. Сведок за долгиот застој на Стража е ѓубрето. Патот од двете страни е буквално посипан со отпадоци, а имало и глутница кучиња.
Директорот на Јавното претпријатие „Македонијапат“, Гајур Кадриу, најави дека, иако не е во негова надлежност, и овој пат ќе испрати екипа да го собере отпадот.
„Таму никој не може да исчисти колку што луѓето валкаат. Ќе пратам и сега екипа да исчисти уште овој пат, но треба да се најде трајно решение за хигиената таму. Не е наша обврска да чистиме таму, има градежни активности, има инвеститор, а има и локална самоуправа. Апелирам луѓето да внимаваат повеќе и да фрлаат отпадоци оти во крајна линија тоа е и казниво. Никаде во светот ѓубре не се фрла од прозорец“, рече директорот Кадриу.
Тој се пожали дека има недостиг од патари, а токму нив ги праќа да го соберат отпадот. Сè уште не добил одобрение од Владата за нови вработувања, а со почетокот на градежната сезона насекаде работат на крпење дупки и тековно одржување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Со два хеликоптера на МВР изгаснат пожарот во Крушевско
Денеска, два хеликоптера од Одделот за воздухопловни единици го изгаснаа шумскиот пожар кој попладнево изби во атарот на крушевското село Пуста Река.
„По добиено барање од ЦУК, на пожарот двата хеликоптера исфрлија над 40 тона вода и во координација со пожарникарите, пожарот е целосно изгаснат“, соопшти МВР..
Македонија
Времена забрана за движење на тешки товарни возила на патиштата во државата
Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури.
Термините се следни:
– петок од 17:00 – 22:00 часот,
– сабота од 09:00 до 18:00 часот и
– недела од 09:00 до 22:00 часот.
На магистралниот пат А2 делница: Скопје – Охрид – Скопје се забранува движење на тешки товарни возила чија вкупна маса преминува 7,5 тони за време на викендите, во следните интервали:
– петок од 15:00 – 22:00 часот,
– сабота од 07:00 до 12:00 и од 18:00 до 24:00 часот и
– недела од 07:00 до 22:00 часот.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен.
На ГП Табановце се бележи зголемена фреквенција на возила, времето на чекање за влез во Македонија е околу 20 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево
Македонија
Средба Тошковски-Агелер: во фокусот борбата против организираниот криминал и корупцијата
Денеска министерот за внатрешни работи Панче Тошковски, во Министерството за внатрешни работи оствари работна средба со амбасадорката на Соединетите Американски Држави, Анџела Агелер.
Министерот Тошковски изрази благодарност кон амбасадорката на САД за поддршката што Владата на Соединетите Американски Држави постојано и ја дава на Република Северна Македонија, конкретно на Министерството за внатрешни работи во јакнење на капацитетите и сите процеси кои се спроведуваат преку проектите наменети за полицијата, со акцент на обуки на персоналот и набавка на опрема.
Како една од стратешките цели на кои Министерството за внатрешни работи на Република Северна Македонија ќе биде фокусирано во следниот период министерот Тошковски ја посочи борбата против организираниот криминал и корупцијата, како приоритет што е еден од главните столбови на владината програма.
Агелер му се заблагодари на Тошковски за континуираната одлична соработка на Република Северна Македонија со Соединетите Американски Држави во повеќе сфери од општествениот живот, пренесувајќи ја заложбата на американската амбасада и Владата на САД за поддршка и соработка и во наредниот период.