Македонија
(Видео) ВМРО-ДПМНЕ: Позитивниот извештај од Европската комисија не е новина

„Корупцијата останува распространета во многу области и продолжува да претставува сериозен проблем. Политичкото мешање останува ризик“. „Се крие опсегот на користење на привремените вработувања во јавната администрација, што доведува до загриженост во однос на почитувањето на мерит-системот. Владата не обезбеди податоци за договорите за определено време почнувајќи од 1 јануари“, ова, како што тврди Александар Николовски, потпретседателот на ВМРО-ДПМНЕ, се дел од забелешките во извештајот на Европската комисија.
„Доколку внимателно се прочита извештајот, во ниедна од клучните области, како што се јавната администрација, судството, борбата против корупцијата и организираниот криминал, нема оценка дека е направен добар напредок, туку секаде пишува дека е постигнато одредено ниво на подготовка, што преведено школски е двојка. Петките со кои Заев сака да се пофали во јавноста, всушност се двојки“, вели Николовски.
Тој констатира дека позитивниот извештај за Република Македонија не е новина, туку нешто што го гледаме од 2009 година наваму.
„Јасно е дека без разлика какви се извештаите што ги добива Македонија, почнувањето на преговорите за членство во ЕУ зависи исклучиво од решението на проблемот што Република Грција го има за нашето уставно име“, вели Николовски.
Како што рече, СДСМ ветуваше инвестиции и вработувања, а во извештајот се говори за висока стапка на невработеност и ранливост на економијата поради значајни недостатоци.
„И самиот еврокомесар Хан претпладнево рече дека реформите мора да продолжат, особено во независноста на судството и економијата и не значи дека преговорите би почнале утре, а успех е членство во ЕУ, а не позитивна препорака. Изминатиов период гледаме само скандали на функционерите од власта и нивна неказнивост. Изминатиов период гледаме инструментализација на судството, кое се користи за политичка пресметка со неистомислениците. Нема ниту една истрага против актуелен функционер, иако веќе помина една година од функционирањето на оваа Влада, а не поминува ден да не излезе во јавноста афера за сомнителна набавка или расипништво со парите на граѓаните. Веќе една година Владата на СДСМ е на власт, а функционерите на СДСМ се недопирливи“, рече Николовски.
Останува, додаде тој, горчливиот впечаток дека Македонија и Албанија се во ист пакет. „Македонија е земја кандидат за членство од 2005 година, а Албанија е земја кандидат за членство од 2014 година. Со неспособноста на оваа Влада се изедначуваме со држава која беше 9 години зад нас. Ова е јасен показател дека Владата на СДСМ нема човечки капацитет, ниту политичка волја да спроведе суштински реформи. И на крајот ВМРО-ДПМНЕ останува силно посветена на европската агенда и како конструктивна опозиција ќе дава поддршка на сите аспекти што се клучни за членство во ЕУ, но секако одговорност останува кај Владата“, рече Николовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Костадиновска-Стојчевска до Љутков: Се знае ли кој е државен секретар во Министерството за култура?

Пратеничката на СДСМ, Бисера Костадиновска-Стојчевска, на денешната собраниска седница посветена на пратенички прашања, упати прашање до министерот за култура и туризам, Зоран Љутков. Прашањето се однесуваше на прекинувањето на значајни проекти во културата и на фактот дека незаконски се претставува кој е државен секретар во Министерството за култура.
„Драго ми е што ги продолжувате проектите коишто беа наследени, како што е еден од нив – реконструкцијата на кино „Партизан“. За волја на вистината, не ги продолжувате сите, меѓутоа сепак гледаме некое поместување.
Најголем дел од проектите ги прекинавте, како „Љубојно“ и ред други значајни проекти, меѓутоа никој не дозна зошто.
Не дознавме ни зошто нема резултати од конкурсот за креативни индустрии, како што не ги видовме ниту програмите на националните установи јавно објавени, за да знае јавноста што е тоа што е одобрено“, рече Костадиновска-Стојчевска.
„Не знаеме зошто не распишувате конкурс за капиталните дотации до ЕЛС, а имате 200 милиони денари на таа сметка – конкурс којшто се објавува најдоцна до април.
Знаеме колку потрошивте за Јапонија, и дека отсега имате купено авио карта за во септември повторно за Јапонија. Изгледа убаво е таму.
Но, не знаеме кој е државен секретар во Министерството за култура. Затоа моите три прашања до вас се следниве: Кој е државен секретар во Министерството за култура на 22 мај 2025 година? Кој е државен секретар во Министерството на култура на 24 мај 2025 година? Кој е државен секретар во Министерството за култура на 26 мај 2025 година“, праша пратеничката Костадиновска-Стојчевска.
Македонија
Арсовска: Висар Ганиу фатен со криминално легализирање дивоградби со фалсификат, документи се доставени до обвинителство

„Висар Ганиу фатен со криминално легализирање дивоградби со фалсификат, за што документи се доставени до обвинителство и има изјави кои сведочат за начинот на кој ги спроведувал овие незаконски постапки, институциите уште се мислат кога да ПОЧНАТ да постапуваат“, вели градоначалничката на Град Скопје, Данела Арсовска.
„Во меѓувреме Висар си брише имотни листови од Катастар, замислете овие луѓе кои до вчера имале имот, денес немаат, поради неговите фалсификати.
Фалсификатот го запишувал во Катастар на 20.03.2025 година сред денови на жалост за трагедијата во Кочани, користејќи период кога мислел дека нема никој да примети што прави.
1. Барање за упис во катастар
2. Решение за упис во катастар со фалсификат документи
3. Барање за бришење имотен лист од катастар
4. Решение за бришење да може да го уништи досието со фалсификатите
5. Катастар за 24 часа го брише досието со што директно овозможува да можат да се уништат докази за делото
Зошто само 2% доверба имаат граѓаните во правосудството? Во моментов во затвор лежат луѓе за влез во Собранието на 27 април и за 100 ќебапи. Таму се постапило веднаш! Во Чаир кај Висар Ганиу ќе влезат да обезбедат докази за некоја година, нека троши кеш и нека ужива до тогаш!“, додаде Арсовска.
Македонија
Бројот 192 моментално не е во функција, граѓаните кои имаат потреба, да го користат 112, велат од МВР

Министерството за внатрешни работи ги известува граѓаните дека бројот 192 поради технички причини моментално не е во функција и се преземаат мерки за нивно отстранување.
„Ве информираме дека во функција е бројот 112 и граѓаните кои имаат потреба можат да го користат овој број“, додаваат од МВР.