Францускиот претседател, Емануел Макрон, пристигна во Вашингтон во тридневна официјална посета на САД, при што првпат домаќин во Белата куќа ќе му биде Доналд Трамп.

Макрон и неговата сопруга Брижит беа поздравени од воен оркестар, кој ги отсвире Марселезата и националната химна на САД кога слегоа од авионот во базата „Ендрјус“ во близина на Вашингтон. Францускиот претседател е прв странски лидер што Трамп официјално го пречекал.

Макрон изјави дека со Трамп ќе разговараат за повеќе билатерални прашања вклучувајќи ги безбедноста и трговијата, како и темите што се на светската агенда. Иранскиот нуклеарен договор и конфликтот во Сирија се меѓу темите што ќе бидат разгледани за време на посетата.

„Ова е многу важна посета со оглед на актуелниот контекст исполнет со толку многу несигурност, проблеми, а понекогаш и закани“, рече Макрон при пристигнувањето.

Подоцна денеска, францускиот лидер и неговата сопруга ќе се сретнат со Трамп и првата дама на САД, Меланија, на вечера во историската резиденција на Џорџ Вашингтон „Маунт Вернон“.