Македонија
Трпеноска: Имам лична мотивација за кандидатурата на чело на Адвокатската комора

Адвокатката Наташа Трпеноска Tренчевска е една од двајцата кандидати кои викендов ќе ја побараат довербата од колегите за избор на прв човек на Адвокатската комора на Македонија, покрај поранешниот министер за внатрешни работи Љубомир Михајловски – Џанго. Таа е ќерка на долгогодишниот јавен обвинител и адвокат Јован Трпеноски ѝ e дел од дваесет и петгодишното адвокатско друштво „Трпеноски“. Од неколкуте нејзини јавни настапи и објави на социјалните мрежи може да се забележи дека реагирала за работата на Обвинителството и одлуки во судството.
За „Макфакс“ Трпеноска вели дека не е секогаш предност да си дете на врвен стручњак во професијата. „Свесен е дека адвокатурата е мојата трајна ориентација и затоа силно ме поддржува“, раскажува Трпеноска.
Адвокатската комора од основањето досега не била водена од жена. Трпеноска за „Макфакс“ вели дека тоа би била значајна промена во позитивен правец: „Имам и лична мотивација. Сакам да испратам порака кон девојчињата кои имаат афинитет кон правото и својата кариера ја гледаат во адвокатурата дека имаат подеднакво право и можност со момчињата да бираат и да бидат избрани“.
На прашање како ја оценува досегашната работа на претседателот на АКМ, Никола Додевски, кој со години беше личен адвокат на експремиерот Никола Груевски, таа e штедлива во квалификацијата. Одговори дека веројатно сторил сè што можел во условите во кои се наоѓал. Но, вели дека не била на негово место и не во такво опкружување.
Нејзината идеја за правецот во кој треба да се движи адвокатурата во Македонија е, како што вели, подигање на свеста за уставната положба на адвокатурата кај сите колеги, особено кај младите колеги и колегите од помалите градови кои имаат голем потенцијал.
Доколку ја добие довербата од колегите таа вели дека ќе се залага за зголемување на надлежноста на адвокатите со интервенција во материјалните закони. „Соработка со сите институции пред кои адвокатите ја извршуваат својата дејност, ревизија и измени на актите на Комората со цел подобро функционирање, конкретизирање на правата и обврските на адвокатите, подигање на моралните и етичките вредности, интеракција со членството, детектирање на проблемите со кои се соочуваат и помош…“, вели Трпеноска за „Макфакс“.
Во врска со новиот предлог-закон за нотаријат, кој ги спротивстави ставовите на адвокатите и нотарите, Трпеноска раскажува дека нужно треба да се пронајде компромис кој ќе ги задоволи двете страни и ќе обезбеди квалитетна соработка и заемно почитување.
Нејзината генерална оценка за адвокатурата денеска во Македонија, од аспект на углед, интегритет и доверба кај граѓаните е дека има многу адвокати кои уживаат углед, имаат интегритет и доверба од клиентите, но, за жал, не може да се каже дека генералната перцепција е таква, а тоа дефинитивно треба да се смени.
Собранието ќе го спроведе изборот на претседател и членови на телата на АКМ претстојниот викенд, на петти и шести мај, во струшкиот хотел „Изгрев“. За Џанго, според информациите на „Макфакс“, типува досегашниот претседател Никола Додевски. Освен Трпеноска и Михајловски, се спомнуваат и имињата на Александар Тортевски, Димитар Панчевски и Звонко Давидовиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.