Македонија
Поповски: Нема толеранција за заканите и уцените кон медиумските работници
„Заеднички треба да работиме на стандардите во однос на слободата на медиумите што ќе важат за секоја влада. Ние досега направивме значително, но има уште многу работа“, рече министерот за транспарентност и отчетност, Роберт Поповски,на денешната прес-конференција.
Според него, доказ за тоа дека досега е направено многу за слободата на медиумите е извештајот на ЕУ, извештајот од „Фридом хаус“ и „Репортери без граници“. „Претставниците на Владата учествуваат на сите дебати во медиумите каде што се повикани. Тоа така и ќе продолжи“, истакна тој.
Министерот за транспарентност вели дека за оваа владина гарнитура нема да има толеранција за заканите и уцените кон медиумските работници по што додаде дека силно ги осудуваат досегашните напади врз новинарите. Во поглед на цензурата, Поповски истакна дека таа е забранета со Устав и во ниту еден случај не смее да се применува. Тој најави дека следува период на големи реформи на медиумската сцена.
Во врска со финансирањето на јавниот сервис по укинување на таксата, министерот истакна дека засега планот е МТВ да се финансира од буџетот, конкретно 0,7 отсто да оди за јавниот сервис и овој процент за четири години отсега да порасне 0,3 отсто, односно да достигне 1 отсто. Меѓу другото, Поповски потсети дека ќе биде забрането какво било буџетско рекламирање со владини реклами.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нестабилно време со дожд и грмежи до среда
По врнежите и невремето по кое во текот на ноќта полавени беа подруми во Охрид, од УХМР најавуваат дека до среда ќе се задржи нестабилно време, претежно во попладневните часови со локален пороен дожд и грмежи.
Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.
Македонија
Скопските и тетовските пожарникари гасеа три огнови на отворено, соопшти ЦУК
Во изминатото деноноќие Центарот за управување со кризи информира дека биле евидентирани три пожари на отворено.
Регионалниот ЦУК Скопје соопштил дека БППЗ на Град Скопје во изминатото деноноќие имала две помали интервенции поради запалено ѓубре и тоа на ул. „Ферид Заири“ во Општина Чаир и кај Езерото Треска во Општина Сарај.
Регионалниот ЦУК Тетово известил дека ТППЕ Тетово имала една помала интервенција поради запалена ниска вегетација кај село Чифлик во Општина Желино.
Центарот за управување со кризи соопшти дека изминатите 24 часа имало вкупно 1.491 повици на Единствениот повикувачки број за итни случаи 112. Од нив „реални“ повици биле 62,84 отсто, а 37,16 отсто биле за други потреби на граѓаните што не биле итни.
Кон полиција биле упатени 63,18 отсто, кон итната медицинска помош 29,09 проценти, кон пожарникарите 2,73 отсто, a кон АМСМ 1,36 отсто од повиците кон бројот 112.