Македонија
(Видео) Марин: Има куп тревници низ општината, не може да се стопираат градби
Градоначалникот на општина Аеродром, Златко Марин, за „Макфакс“ вели дека не може да промени ништо ако деталните урбанистички планови се донесени на законски начин. Тој тврди дека не може да ги стопира градбите со мораториум по примерот на Oпштина Центар бидејќи тоа не е законски. Марин не може да ја стопира ниту градбата кај Реонски центар, која е на државно земјиште, а гради државно јавно претпријатие. Тој вели треба да се има предвид дека од градбите се полни буџетот на Oпштината.
„Иако Oпштина Центар донесе одлука за мораториум, таква можност не постои според закон. Имаме и една разлика, касата на општинстиот буџет 70% се полни од комуналиите што се плаќаат за изградба на зградите. ДУП-овите се донесени, ние не можеме да ги смениме“, вели Марин. „Kако граѓани може да не ни оди во прилог да се гради низ Аеродром, но за да има нови капитални објекти, мора да го направиме тоа, односно сè додека не се смени Законот за финансирање на локалната самоуправа“.
Експанзијата на градење објекти во Аеродром и уништувањето на парковите Марин ја стимулирал со 500 садници, и вели дека во идниот период ќе има јавен повик за засадување нови 1500 садници.
„Дрва се садат на земја, не се садат на зграда. Секаде каде што има зелена површина ќе засадиме дрва. Има еден куп тревници низ општината. Граѓаните велат дека нема, но ако излеземе ќе ги видиме зелените површини. Можеби не се пошумени, ама тоа е“, вели Марин за „Макфакс“.
На парцела каде што требаше да изгради игралиште во близина на Тобако 2, моментално се гради зграда. Според градоначалникот на Аеродром, тоа не е спорно бидејќи е приватно земјиште, а игралиштето е преместено преку пат.
„Во општина Аеродром се исечени само две дрва“, тврди Марин.
Марин вели дека граѓаните можат да го критикуваат кога тој ќе ги носи ДУП-овите, а истите не се во согласност со потребите на граѓаните, за подобри услови за живот.
„Изминативе години се направија 90, а сега се градат 2-3 згради. Сами ќе излезете надвор и ќе видите дали има место да се гради, освен на локациите што се оставени. Аеродром ќе се шири во пределот на Горно и Долно Лисиче, овој предел не го пипкаме повеќе со нови градби“, вели градоначалникот.
Златко Марин не одговори конкретно зошто ветил стопирање на градежната мафија во Аеродром, иако уште во предизборниот период знаел дека ДУП-овите не може да се сменат.
„Ревидираме ДУП-ови, гледаме законска можност да бидат поништени. ДУП-от И10 е даден на Уставен суд. Кога ние ќе изработуваме нов ДУП, може да разговараме за ова“, одговори Марин коментирајќи ги своите ветувања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Фото) Руте во посета на Армијата: Дејствувате над вашите капацитети кога станува збор за истурените копнени сили
Генералниот секретар на НАТО, Марк Руте, денес во касарната „Илинден“, Скопје, оствари посета на Армијата, која се реализира во рамки на неговата официјална покана на Македонија.
Генералниот секретар беше пречекан од началникот на Генералштабот на Армијата, генерал-мајор Сашко Лафчиски и министерот за одбрана Владо Мисајловски.

Во рамките на посетата, генералниот секретар се обрати пред припадниците на Армијата истакнувајќи го придонесот што нашата држава го прави во рамки на Алијансата.
„Вие навистина дејствувате над вашите капацитети кога станува збор за истурените копнени сили (Forward Lend Forces)“, истакна Руте, потенцирајќи „со тоа се грижите навистина да ја одбраниме секоја педа од територијата на Алијансата“.

За време на посетата беше извршена смотра на построените единици, како и на опремата и средствата со кои располагаат Лесната пешадиска баталјонска група и декларираните единици од составот на Баталјонот на специјални сили.
Во знак на признание за придонесот во зајакнувањето на соработката и поддршката на Армијата на Република Северна Македонија во рамки на Алијансата, началникот на Генералштабот на Армијата, генерал-мајор Сашко Лафчиски му додели Голема плакета на Армијата на генералниот секретар на НАТО.

На настанот присуствуваа генерали на Армијата и претставници од Армијата и Министерството за одбрана.
Македонија
(Видео) Филипче: Врските на Стоиљковиќ со Москва и кинеските кредити се сериозен сигнал
Претседателот на СДСМ, Венко Филипче, по обраќањето на генералниот секретар на НАТО, Марк Руте, оцени дека пораките упатени од највисоката адреса на Алијансата се јасни и недвосмислени и директно се однесуваат на актуелната влада. Филипче вели дека врските на вицепремиерот Иван Стоиљковиќ со структури блиски до Москва како и кинеските кредити претставуваат сериозен сигнал за загриженост.
„Фактот дека вториот човек во Владата има отворени контакти со лица и организации кои се во директна комуникација со Кремљ, во време кога Русија води агресија врз Украина, е нешто што не може да се игнорира“, нагласи Филипче.
Тој посочи и на финансиските аранжмани на Владата, потенцирајќи дека заемот од една милијарда евра преку Унгарија, за кој европските институции во свој извештај нотирале дека станува збор за средства со кинеско потекло, отвора сериозни прашања.
„Кога на тоа ќе се додадат и кинеските пари кои пристигнаа преку заемот од Унгарија, станува јасно дека станува збор за политики кои испраќаат погрешни сигнали во рамки на Алијансата. Нашиот одбранбен чадор знае точно какви политики води оваа влада и јасно укажува на нив“, истакна Филипче.
Македонија
Утре променливо облачно време со температура до 17 степени
Утре претпладне времето ќе биде сончево со мала до умерена облачност и со услови за појава на утринска магла по одделни котлини. Попладне облачноста ќе се зголеми и ќе преовладува променливо облачно време со сончеви периоди, информира УХМР.
Ќе дува слаб до умерен ветер претежно од јужен правец. Минималната температура ќе биде во интервал од -2 до 5, а максималната ќе достигне од 13 до 17 степени.
Во Скопје, претпладне сончево со мала до умерена облачност, а попладне променливо облачно со сончеви периоди. Ќе дува слаб до умерен ветер од јужен правец сончево со мала до умерена облачност. Минималната температура ќе се спушти до 4, а максималната ќе достигне до 17 степени.
Во следните денови ќе преовладува сончево и релативно топло време со мала до умерена облачност, освен во четврток кога ќе има повремени локални врнежи од дожд. Утре и во четврток по одделни котлини ќе има услови за појава на слаба магла.

