Министерот за информатичко општество и администрација, Дамјан Манчевски, се обрати на отворањето на научната конференција „Управување во јавниот сектор: предизвици и перспективи“ во организација на Факултетот за современи науки при Универзитетот на Југоисточна Европа.

„Јавниот сектор во Македонија е комплексен систем, со кој треба посветено и фокусирано да се управува. Нашите заложби се да ги обезбедиме сите потребни услови за јавниот сектор во Македонија да ја исполни својата основна задача, а тоа е подобри, побрзи и поевтини услуги на граѓаните. Затоа мораме да спроведеме реструктуирање, реорганизација и модернизирање на јавните служби“, истакна Манчевски.

Според министерот, голем дел од тоа е дефинирано во стратегијата за реформа на јавната администрација, што Владата ја усвои и веќе ја имплементира. Како што истакна Манчевски, ова е прва стратегија што има конкретен акциски план, индикатори за исполнувањето на мерките, како и соодветен планиран буџет, при што секој може да го следи степенот на нејзиното исполнување, така што не претставува уште еден текст на хартија со кој никој нема да знае што конкретно да прави.

Министерот потенцира дека една од најважните работи во однос на реформата на јавната  администрација е создавањето стручна и департизирана администрација, а тоа ќе се постигне со инвестирање во знаења, вештини и компетенции на вработените, како и воспоставување стандарди за управување со човечки ресурси и зголемување на продуктивноста и ефикасноста.

„Предизвици во управување во јавниот сектор има многу, но доколку постои политичка волја, можностите се големи. Но, покрај волја, потребна е и храброст. Храброст да се реформира системот, да се измести од темел. Целта ни е целосно да го смениме впечатокот на граѓаните за администрацијата“, рече министерот Манчевски и нагласи дека сржта на реформата на администрацијата е во дигитализацијата.

Во текот на дводневната конференција се очекува да се презентираат 30-ина академски трудови од научници, кои доаѓаат од земјите од регионот и пошироко, а во кои ќе се осврнат на предизвиците  и перспективите на доброто владење управување во јавниот сектор.