На првиот ден како амбасадор на САД во Германија Ричард Гренел беше обвинет дека ја преминал линијата на дипломатијата и ја навредил земјата домаќин велејќи им на германските бизниси веднаш да си заминат од Иран, пренесува „Раша тудеј“.

Само неколку часа откако тој положи свечена заклетва, а договорот за нуклеарната програма на Иран дојде до точка на пропаѓање, новиот американски амбасадор објави порака на „Твитер“ дека германските компании треба да се повлечат во Иран пред иранската економија да биде погодена од санкции.

„Санкциите на САД ќе бидат насочени кон критичните сектори на иранската економија. Германските компании што работат во Иран треба веднаш да ги прекинат операциите”, напиша Гренел на „Твитер“.

Но, тонот на пораката на Гренел не наиде на добар прием, па некои коментатори на интернет го обвинија дипломатот дека е арогантен и дека му недостига потребна тактичност.  Поранешниот германски амбасадор во САД и во Велика Британија, Волфганг Ишингер, го советуваше новоназначениот дипломат да не ѝ издава наредби на земјата домаќин.

„Објаснете ги политиките на Вашата земја и лобирајте во земјата домаќин , но никогаш не ѝ кажувајте на земјата домаќин што да прави ако не сакате да се вовлечете во неволја”, напиша Ишингер на „Твитер“.

Од германската индустриска група БДИ изјавија дека не можат да ја разберат причината зад барањето на Гренел.

„Германската индустрија ја критикува екстратериторијалната примена на санкциите како што ја замислиле САД”, се вели во изјавата на БДИ.

Лидерот на германските социјалдемократи, Андреа Налс,  беше меѓу критичарите на Гренел, што укажува дека новиот амбасадор на Трамп треба да научи повеќе за дипломатијата.

„Не е моја работа да ги подучувам луѓето за финесите и за уметноста на дипломатијата, особено неа амбасадорот на САД. Но, изгледа дека нему му е потребно малку подучување “, изјавил Налс за онлајн-изданието на „Цајт“.