Генералниот секретар на Обединетите нации Бан Ки-Мун и шефот на француската дипломатија Лорен Фабиус го потсетија во средата навечер Израел на обврската да го продолжи мировниот процес и создавање палестинска држава, ден по изборната победа на досегашниот премиер Бенјамин Нетанјхау кој не покажува наклонетост кон формирање палестинска држава, а истовремено Белат акуќа ја повтори својата поддршка на решението со двете држави, и порача дека победата на Нетанјаху на парламентарните избори нема да влијае ниту врз преговорите за иранската нуклеарна програма.

Последниот ден од кампањата пред парламентарните избори, премиерот на Израел, Бенјамин Нетанјаху, во настојувањата во последен момент да ја добие поддршката на десницата изјави дека нема да дозволи создавање на палестинска држава доколку биде повторно избран., и вети продолжување на градењето еврејски населби на териториите коишто меѓународната заедница ги смета за окупирани палестински области.

Генералниот секретар Бан Ки-мун ги поздрави прелиминарните резултати од израелските избори во надеж дека брзо ќе биде формирана владата, рече неговиот помошник Фахран Хак.

„Новата израелска влада, кога ќе биде формирана, мора да создаде услови преку преговорите да се постигне конечен мировен договор (…) кој ќе стави крај на израелската окупација и ќе овозможи да се оствари одржлива палестинска држава“, изјави Хак за новинарите во седиштето на ОН во Њујорк, пренесува AFP. „Генералниот секретар цврсто верува дека тоа е најдобриот, но и единствениот начин за напредок и Израел да остане демократска држава“, додаде.

Спроед Хак, тоа вклучува и „прекин на градењето на нелегалните населби“ на окупираните палестински територии.

Палестинците сакаа да ја прогласат својата држава на териториите во Газа, на Западниот брег (од реката Јордан) а како главен град сакаат да го прогласат Источен Ерусалим, кои Израелците ги освоија од 1967 година, додека Израел повеќепати повтори дека Ерусалим е неделива историска престолнина на израелската држава.

Францускиот министер за надворешни работи Лорен Фабиус го потсети Израел на „одговорност“ и побара „да започнат преговорите за да се постигне глобален и конечен мир“ со Палестинците. „Само создавањето на одржлива и суверена палестинска држава која живее во мир покрај Државата Израел ќе овозможи мир и просперитет на Блискиот исток“, се порачува во соопштението на Фабиус.

„Претседателот (Барак Обама) и натаму смета дека решението со две држави (израелска и палестинска) е најдобар начин да се одговори на тензиите“, изјави Џош Ернест, портпаролот на Белата куќа.

Барак Обама сé уште не му се јавил на Нетанјаху, но тоа ќе го стори „деновиве“, додаде Ернест, истакнувајќи дека државниот секретар на САД, Џон Кери, му честитал на израелскиот премиeр ,пренесува Reuters. Потсети и дека Обама на двата минати парламентарни избори не го повикал израелскиот премиер сé додека не се пристапило на формирањето на владата.

Од САД, исто така, изјавија и во врска со противењето на Нетанјаху на секој договор со Иран околу неговата нуклеарна програма за којашто се сомнева дека има цел да доведе до нуклеарно оружје и без преседан во историјата три седмици пред изборите беше повикан во американскиот Конгрес да зборува на таа тема. Меѓутоа, Стејт департментот смета дека реизборот на Нетанјаху нема да влијае врз преговорите со Техеран. „Мислиме дека неговата победа не влијаеше и нема да влијае врз преговорите со Иран“, рече портпаролката на американската диплоамтија, Џенифер Псаки.

Односите меѓу Обама и Нетанјху се обременети со голема доза личен анимозитет, а дополнителни се влошија по говорот на израелскиот премиер во Конгресот, каде што го одржа говорот во кој жестоко ги нападна преговорите со Иран.

Покрај тоа, Белата куќа во средата изрази и загриженост поради некои говори кои „внесуваат подели“ одржани во текот на предизборната кампања, алудирајќи на изјавите на Нетанјаху и неговата партија во врска со гласањето на Арапите.

Премиерот на самиот ден на гласањето објави загрижувачка видео снима на својата страница на Facebook. „Десната влада е во опасност. Арапските гласачи во голем број доаѓаат на избирачките места“, гласеше пораката.

„САД се многу загрижени поради изјавите коишто внесуваат поделби меѓу израелските Арапи и сакаат да ги маргинализираат, Тоа се слаби демократски вредности и идеали кои се важен дел од она што ги поврзува САД и Израел“, истакна портпаролот на Белата куќа./крај/мф/сн

Извор: Макфакс