Свет
Иран гради случај против САД за основање на Исламска држава врз основа на тврдењата од кампањата на Трамп
Техеран планира да го тужи Вашингтон за индиректно учество во двојните терористички напади во Иран минатата година, тврдејќи дека самиот американски претседател во повеќе наврари призна дека САД се одговорни за подемот на терористичката група, пренесува „Раша тидеј“. За време на својата предизборна кампања, Доналд Трамп постојано ја обвинуваше администрацијата на својот претходник – особено противкандидатот на Демократската партија и поранешниот државен секретар Хилари Клинтон – за создавање на Исламска држава.
„Хилари Клинтон ја создаде Исламска држава заедно со Обама”, изјави Трамп пред своите поддржувачи во јануари 2016 година. Во интервју за 60 минути, објавено на 17 јули 2016 година, тој повтори: „Хилари Клинтон ја измисли Исламска држава со својата глупава политика”.
Сега Техеран ја претвора реториката на Трамп во случај против САД, обвинувајќи го Вашингтон за неговата наводна улога во организирањето терористички напади врз иранскиот Парламент и светилиштето на ајатолахот Хомеини во Техеран во јуни 2017 година, за кои одговорноста ја презеде Исламска држава.
„За време на претседателската кампања Трамп јасно зборуваше за работата на својот противкандидат Хилари Клинтон, велејќи дека САД ја создале Исламска држава”, рече во вторникот Аболфазл Абутораби, член на Парламентарната комисија за правда.
Истакнувајќи дека зборот на Трамп како државен лидер е доволно доверлив за да послужи како доказ на суд, Абутораби посочи дека иранскиот парламент одлучил да покрене тужба против Вашингтон пред меѓународниот суд.
„И јавниот обвинител поднесе тужба во врска со ова”, додаде Абутораби, според новинската агенција ФАРС.
Најмалку 17 лица загинаа, а десетици беа повредени во нападите со оружје и бомби во иранскиот парламент и во храмот на ајатолахот Хомеини во Техеран на 7 јуни 2017 година. Според иранското Министерство за разузнавање, петте напаѓачи кои беа неутрализирани од безбедносните сили беа ирански граѓани кои ѝ се приклучиле на Исламска држава во летото 2016 година. Иранската револуционерна гарда (ИРГЦ) ја обвини Саудиска Арабија за планирање на нападите, велејќи дека тие се случиле само една недела по состанокот меѓу американскиот претседател, Доналд Трамп, и саудиите лидери кои ги поддржуваат терористите.
Идејата Иран да ги тужи САД за создавање Исламска држава доаѓа помалку од еден месец откако федералниот суд во Њујорк пресуди дека Иран е одговорен за смртта на повеќе од 1 000 луѓе во нападите на 11 септември и му нареди на Техеран да плати повеќе од 6 милијарди долари отштета.
Иран ја отфрли пресудата на судијата Џорџ Даниелс, обвинувајќи го судскиот систем на САД за обиди да ја преработат историјата. Во својот одговор, iранското МНР нагласи дека Иран нема никаква врска со организирање или финансирање на нападите на 11 септември. Претходно, судијата Даниелс донесе пресуди против Иран во 2011 и 2016 година со кои ѝ наложува на Исламската Република да им плати милијарди долари на жртвите на нападите во кои загинаа речиси 3 000 луѓе.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Иран воведе санкции кон САД и Велика Британија поради поддршката кон Израел
Иранските власти денеска објавија дека воведуваат санкции против неколку американски и британски поединци и субјекти поради нивната поддршка на Израел во војната против палестинското движење Хамас во Појасот Газа.
Иранската дипломатија соопшти дека санкциите се однесуваат на седум Американци, меѓу кои и генералот Брајан Фентон, шеф на командата за специјални операции и вицеадмиралот Бред Купер, поранешен шеф на американските поморски сили на Блискиот Исток.
Од британските функционери и субјекти цел на санкциите се министерот за одбрана Грант Шапс и британската кралска морнарица во Црвеното Море.
Санкции беа најавени и против американските компании „Локид Мартин“ и „Шеврон“ и британските компании „Елбит системс“, „Паркер Мегит“ и „Рафаел УК“.
Иранското Министерство за надворешни работи додаде дека санкциите вклучуваат „блокирање на сметки и трансакции во иранскиот финансиски и банкарски систем, блокирање на средства под јурисдикција на Иран, како и забрана за издавање визи и влез на иранска територија“.
Влијанието на овие мерки врз поединци или субјекти, како и врз можните средства или трансакции со Иран, сепак, останува неизвесно.
Од почетокот на војната во Појасот Газа, предизвикана на 7 октомври со нападот на палестинското исламистичко движење Хамас на израелска територија, нагло се зголемија тензиите меѓу Израел од една страна и Иран и неговите сојузници, особено либанскиот Хезболах, од друга.
Ситуацијата се вжешти на 13 април, кога Иран изврши напад врз Израел, со 350 беспилотни летала и проектили, од кои повеќето беа пресретнати со помош на САД и други земји.
Иранските власти тогаш објавија дека дејствувале во „самоодбрана“ по смртоносниот напад што му се припишува на Израел врз иранскиот конзулат во Дамаск на 1 април.
Свет
Нетанјаху: Ако Евреите не се заштитат самите, никој нема да ги заштити
Евреите мора да бидат способни да се „одбранат“ бидејќи никој нема да ги заштити, изјави денеска израелскиот премиер Бенјамин Нетанјаху, додека се повеќе се креваат гласови против војната што Израел ја води во Појасот Газа.
„Ако треба да се браниме, ќе се браниме. Ако е можно да се мобилизираат „оние што не се Евреи“, тоа е добро. Но, ако не се заштитиме, никој нема да го направи тоа“, рече Нетанјаху.
Премиерот ова го изјави на приемот на преживеаните од нацистичкиот геноцид кои во недела ќе учествуваат на церемонијата на Денот на сеќавањето на Холокаустот во меморијалниот центар Јад Вашем.
Разорната војна што Израел ја започна во Појасот Газа како одмазда за нападот на палестинското движење Хамас на 7 октомври во Израел предизвикува зголемени критики ширум светот.
Осврнувајќи се на студентското движење во знак на солидарност со Палестинците во градовите на американските колеџи, Нетанјаху рече дека ги осудува „страшните демонстрации на антисемитските орди кои повикуваат на уништување на Израел и ги напаѓаат еврејските студенти и професори“.
Нетанјаху, исто така, се соочува со отворено меѓународно противење на неговата намера да започне голема офанзива врз градот Рафах, во јужниот дел на Појасот Газа.
Тоа е засолниште за еден и пол милион Палестинци, од кои огромното мнозинство се раселени поради војната, додека израелските власти сметаат дека градот е последното упориште на борците на Хамас.
Свет
Трамп: Погледнете ги Лондон и Париз, тие се непрепознатливи
Поранешниот американски претседател Доналд Трамп изјави за време на предизборниот митинг во Висконсин дека Лондон и Париз се „непрепознатливи“, пренесува „Politico“.
„Видовме што се случи кога Европа ги отвори вратите за џихад. Погледнете го Париз, погледнете го Лондон. Тие се непрепознатливи“, рече Трамп, кој ќе се кандидира за нов мандат во Белата куќа на претседателските избори во ноември годинава.
„Ќе влезам во многу проблеми со луѓето во Париз и луѓето во Лондон, но знаете што, тоа е факт. Тие се непрепознатливи и не можеме да дозволиме тоа да и се случи на нашата земја. Имаме неверојатна култура, традиција. Не можеме да дозволиме тоа да се случи овде и никогаш нема да дозволам да им се случи на Соединетите Американски Држави“, рече тој.
Трамп често ги критикуваше европските земји. Во декември 2015 година, набргу откако Париз беше погоден од смртоносен исламистички терористички напад, тој рече дека населбите во Париз и Лондон се толку опасни што полицијата одбила да оди таму. Во тоа време, Трамп го бранеше својот план „целосно да им забрани на муслиманите да влезат во САД“.
И покрај тоа што беше критикуван за тие забелешки, Трамп продолжи да ја брани својата позиција. „Вистинскиот Париз е различен од Градот на светлината за кој читате. Има области во Париз каде луѓето се толку радикализирани и толку злобни, што полицијата одбива да оди таму. Тие нема да одат таму. Тоа ќе се случи на нашата земја“, предупреди тој.
Во јануари 2016 година тој изјави дека животот во Брисел е како да живееш во „пекол“ поради недостаток на „асимилација“ на муслиманското население.