Меѓусебни обвинувања и дофрлувања во Собранието, меѓу власта и опозицијата на денешната седница за избор на нови министри и заменици. Додека трае дискусијата за владината реконструкција, која до полноќ треба да заврши, дел од пратениците, но и новите министри кои чекаат да бидат избрани, најголем дел од денот го поминаа гледајќи во мобилните телефони.

Пратениците од парламентарното мнозинство со фалби и поддршка за премиерот и работата на Владата, опозицијата пак бара оставки, но и образложение и отчет што сработиле министрите кои сега ќе бидат сменети. Пратеникот на ВМРО-ДПМНЕ, Илија Димовски рече дека реконструкцијата е само да се зголеми парламентарното мнозинство и ја нарече пазарџиска.

„Оваа реконструкција на Владата е во министерствата кои потфрлија и каде имаше повеќе скандали. Има министри, како што рековте во една изјава, кои не се снаоѓаат и не работат, некои делумно работат, некои се залутани на функцијата“, рече Димовски.

Смената на министерските места, пак, според премиерот Зоран Заев е потребна за да се зајакне парламентарното мнозинство пред носењето на важни одлуки. Заев рече дека пред Македонија е сериозно време, а оти изборот на новите членови на Владата што се совпаѓа со годишнината од нејзиното формирање, тој го направил водејќи се од професиналниот аспект на личноста и капацитетот.

За министерската позиција во Министерството за правда предложена е Рената Дескоска, за министер за образование и наука е предложен Арбр Адеми, за култура Асаф Адеми и за министер без ресор Бардил Даути. За заменик-министер за надворешни работи е предложен Андреј Жерновски, за заменик-министер за здравство Асим Муса, за заменик-министер за труд и социјална политика Ѓонул Бајрактар и за транспорт и врски Садик Беќири.