Островот Сентоса, местото на историската средба меѓу американскиот претседател Доналд Трамп и севернокорејскиот лидер Ким Џонг-ун, e популарна туристичка дестинација во југоисточна Азија со многу познати терени за голф и песочни плажи. Но, островот во Сингапур има и своја мрачна историја. Името на островот значи мир и спокој, но некогаш бил јапонски логор за воени затвореници од Британија и Австралија кога сојузничките сили ѝ се предале на Јапонија во 1942 година.

Островот кој годишно го посетуваат 20 милиони туристи било и место за масовни егзекуции на Кинези од Сингапур вклучувајќи и цивили, кои биле осомничени за антијапонски активности. Многу од убиствата се извршени на плажата на која сега се наоѓа светски познатиот голф-терен Серапонг.

Пред Британија да ја преземе контролата над Сингапур во 1824 година, островот беше напреден трговски центар, често посетуван од трговци и познат по пиратството. Во тоа време Сентоса била познат како Пулау Блаканг Мати, што директно се преведува – остров каде што смртта ве демне од зад грб.

Кога јапонските сили го презеле Сингапур во 1942 година, му било дадено ново јапонско име – Сионан, што значи светлина на југот. Кога Сингапур доби независност во 1965 година, островот беше преименуван во Сентоса, малајски збор што значи мир и спокојство.

Портпаролката на Белата куќа, Сара Сандерс, потврди дека средбата ќе се одржи во хотелот „Капел“ со пет ѕвездички. Сентос е еден од 63-те острови што го сочинуваат Сингапур. Овој остров од 500 хектари, недалеку од главниот остров, е дом на луксузни одморалишта, приватни марини и голф-клубови. Хотелот во кој ќе се одржи состанокот е сместен во тропска шума, а го дизајнира британскиот архитект Норман Фостер во колонијален стил.

Хотелот се смета за еден од најлуксузните на островот и веројатно и поради врвната услуга што ја нуди, овој хотел е избран да биде токму тој место на историскиот состанок меѓу Ким и Трамп. Функционерите на Белата куќа веќе го посетија хотелот и ги договорија деталите во врска со состанокот на 12 јуни. Сè до состанокот нема да биде возможно да се изнајми соба во овој хотел.

Самата локација на островот, кој се наоѓа веднаш до главниот остров, го прави Сентос совршено место кога се безбедносните мерки во прашање. Пристапот до главниот остров е брз и лесен, а ако на светските политичари им треба малку одмор, Сентос е преполн со терени за голф.

Локацијата на самитот закажан за 12 јуни во 9 часот по локално време е одбрана поради многу логични причини. Островот се наоѓа на само половина километар од јужниот брег на Сингапур, каде што ќе биде полесно да се спроведат засилени безбедносни мерки што се вообичаени за ваквите состаноци.

Воздушниот простор над Сингапур ќе биде затворен за време на самитот меѓу САД и Северна Кореја следната недела. Оваа југоисточна азиска држава, која на 12 јуни ќе биде местот на историската средба меѓу американскиот претседател и севернокорејскиот лидер, ги засили мерките за безбедност во целата територија. Во предупредувањето на Меѓународната организација за цивилно воздухопловство и Администрацијата на федералното воздухопловство наведено е дека воздушниот простор на Сингапур ќе биде затворен на 11,12 и на 13 јуни.

Трамп претходно го откажа состанокот планиран за 12 јуни, меѓутоа со засилени контакти помеѓу двете страни договорот повторно оживеа. Тој најави дека првиот состанок ќе биде вовед во подолгите преговори нарекувајќи го овој состанок шанса за запознавање.