Европа
Руски музеј открил тајна наредба за уништување на списите за логорите на Сталин
Музеј кој ги проучува советските затвори и логори открил тајна наредба од 2014 година за уништување на евиденцијата на затвореници, пишува „Гардијан“.
Службеници изјавиле дека ваквиот потег би имал катастрофални последици врз проучувањето на историјата на „логорите на смртта“ на Сталин. Според податоците, во текот на триесеттите и четириесеттите години на минатиот век околу 17 милиони луѓе биле испратени во гулаг, озлогласниот советски затворски систем. Најмалку 5 милиони луѓе биле осудени под обвинение за лажни сведоштва.
Евиденцијата за постапките против затворениците често се уништува, но нивните лични податоци се зачувуваат на регистарски картички, кои ги поседуваат полицијата и разузнавачките служби. Историскиот музеј за гулаг во Москва открил таен документ од 2014 година со кој се бара уништување на податоците за затворениците кои достигнале возраст од 80 години, што практично денес ги опфаќа речиси сите затвореници.
Архивскиот експерт на музејот, Александар Макеев, за новинската агенција „Интерфакс“ изјавил дека откриле оти во еден руски регион се уништени регистарските картички на затвореници. Станува збор за областа Магадан, на истокот од Русија, во која се наоѓале некои од најголемите советски логори. Музејот од рускиот претседателски совет за човекови права побарал истрага во врска со откриената тајна наредба.
Рускиот заменик-министер за внатрешни работи ги отфрлил наводите дека архивите се уништуваат, но ваквиот инцидент уште еднаш во фокусот ги става тврдењата дека Русија под водство на претседателот Владимир Путин се обидува да ги потисне темните поглавја од советската историја, а да ги истакне нејзините триумфи, како победата во Втората светска војна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.