Полицијата го идентификуваше возачот што на 3-ти април усмрти пешак во скопската населба Илинден и избега од местото на настанот. Станува збор за 23-годишниот Д.П. од Куманово, соопшти во средата Министерството за внатрешни работи.

Против него е поднесена кривична пријава поради постоење основано сомневање дека сторил две кривични дела, и тоа „тешки дела против безбедноста на луѓето и имотот во сообраќајот” и „неукажување на помош на лице повредено во сообраќајна незгода”.

Пријавениот на минатиот четврток околу 21,30 часот, со нерегистриран автомобил марка „југо 45″, без возачка дозвола, во населба Илинден удри во 61-годишен пешак кој ја преминувал неосветлената улица на место каде што нема обележан пешачки премин.

По ударот, возачот не застанал да му укаже помош на повредениот пешак, кој поради пет тешки телесни повреди починал на самото место. Пријавениот со возилото продолжил да се движи кон село Пчиња, крај Куманово, каде го паркирал возилото во неговиот двор и наредниот ден ги сменил деловите од возилото кои биле оштетени од сообраќајната несреќа.

Во изјава пред полициски службеници Д.П. кажал дека не видел во што удрил и бидејќи се уплашил, не застанал и продолжил да вози кон неговиот дом./крај/мф/сд