Македонија
Владата ги повика граѓанските организации да ги мониторираат јавните набавки

Владата го повикува граѓанскиот сектор во мониторирање на процедурите за јавни набавки со цел тие да бидат целосно заштитени од можности за злоупотреби. На прес-конференција во Владата, министерот без ресор задолжен за комуникации, транспарентност и отчетност, Роберт Поповски, министерот за здравство, Венко Филипче, заедно со директорите на Службата за општи и заеднички работи (СОЗР) при Владата и „Електрани на Македонија“ (ЕЛЕМ), Пеце Мирчески и Драган Миновски, ги повикаа граѓанските организации да се вклучат во мониторингот на јавните набавки.
„Во оваа една година на Владата, за разлика од огромната нетранспарентност и злоупотреби на претходната власт во оваа сфера, со концептот „Отворена Влада“ се отворивме целосно кон граѓаните, имаме политика на максимална транспарентност и отчетност, ги објавуваме сите документи на интернет за да се отстранат какви било сомнежи како се спроведуваат постапките и процедурите“, истакна министерот Поповски, кој исто така рече дека борбата против корупцијата е врвен приоритет на Владата не само за напредокот во евроинтеграциите туку и воопшто за унапредување на одговорното и демократско владеење и подигнување на квалитетот на животот во земјата за сите граѓани.
Поповски истакна дека целта на Владата е процедурите за јавни набавки да бидат целосно заштитени од можностите од злоупотреби и со јавна контрола да се заштитат парите на граѓаните објаснувајќи дека граѓанските организации ќе имаат можност да се вклучат во процесот од самиот почеток и во сите фази на одлучување и спроведување на постапката за јавна набавка до склучување на договорот со избраните понудувачи.
„Затоа, денеска, од овде апелирам до сите граѓански организации во Република Македонија да ја поддржат оваа наша заедничка акција. Да се вклучат со своите капацитети за да добиеме поуспешен и посеопфатен процес. Нема поважно нешто од правилното искористување на буџетот и парите на граѓаните доколку сакаме Македонија да се развива и да оди напред. Нашите вредни граѓани го заслужуваат тоа и ништо помалку!“, рече Поповски додавајќи дека трите институции, Министерството за здравство, СОЗР и ЕЛЕМ, веќе имале контакти со граѓански организации.
Поповски посебно истакна дека целта на Владата е овој процес да ги опфати и сите други институции за кои граѓанскиот сектор што има познавања и експертиза за оваа област ќе покаже интерес. Министерот за здравство, Венко Филипче, истакна дека во насока на рационалност, ефикасност и транспарентност во спроведувањето на јавните набавки и ова Министерство ги отвора вратите на граѓанските и невладините организации за целосен увид во тендерските постапки. Тој информира дека во следниот период ќе следува соработка со стручни лица од граѓанскиот сектор, кои ќе извршат анализа на ризиците од корупција во јавните набавки во Министерството.
„Со увид на ризик-факторите при процесот на јавните набавки, ќе се намали и ризикот од судир на интереси. Целта е навремено согледување на ризиците и судирот на интереси во насока на спречување на непотизам и блиски релации со компании и пријатели“, рече министерот Филипче додавајќи дека се прават анализи за промени во постапките, процена на потребните количини лекови за да се намали потребата од интервентен увоз, како и за начини на штедење неколку милиони евра на граѓаните и создавање подобри услови за пациентите со систем на централна набавка на реагенси.
Директорот на ЕЛЕМ, Драган Миновски, посочи дека како најголема компанија во државна сопственост и еден од најзначајните столбови во економијата, фирмата е должна да биде отчетна и транспарентна во поглед на трошењето за потребите на компанијата и за производствениот процес на електрична енергија, што се поклопува со владините политики на максимална отвореност за информации во врска со тендерските постапки и набавките кон невладините организации, медиумите, но и кон сите што би побарале увид по кој било основ.
Миновски информира дека со група невладини организации што ги следат јавните набавки имале состанок на кој е изразена подготвеност за максимална отвореност. Истовремено, тој оцени дека во процесот е потребно партнерство, доверливост и неизнесување на податоците на трети страни до крајот на постапката, со цел да не ѝ се наштети на конкурентноста во неа.
„Нашата основна цел е да имаме фер, чесен и конкурентен процес на јавни набавки, преку кој би обезбедиле што поквалитетна услуга или производи потребни за нашето функционирање и нашиот производствен процес за што поповолна цена и услови“, потенцира Миновски.
„Службата за општи и заеднички работи при Владата на Република Македонија е силно посветена да постави стандарди за отвореност, транспарентност и отчетност во своето работење. Како во изминатата година, така и во иднина сите јавни набавки што ги прави службата ќе се реализираат со строго почитување на законските процедури, водени од начелата на транспарентност и отчетност. Со тоа ја елиминираме можноста за мито и корупција, како и за местење тендери, што било одлика во некое претходно време“, рече директорот на СОЗР, Пеце Мирчевски.
Нагласувајќи дека во иднина во постапките нема да има практики на провизии и приоритетни доставувачи, Мирчевски рече: „За да докажеме дека овие наши заложби се искрени, првпат ги отвораме вратите и ги покануваме граѓаните преку граѓанските организации да вршат мониторинг на сите јавни набавки што ги спроведува Службата за општи и заеднички работи. Само така граѓаните ќе може да се уверат дека работиме одговорно и посветено штитејќи ги јавниот интерес и парите на граѓаните“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Тошковски: Борбата со недозволената трговија со дрога е и ќе остане еден од стратешките приоритети на МВР

Министерот за внатрешни работи Панче Тошковски денес учествуваше и се обрати на 16 сесија на Работната група 4 од Националната конвеција за Европската Унија во Македонија, платформа која низ годините се етаблира како сериозен и кредибилен простор за дијалог, анализа и препораки во процесот на европската интеграција.
Темата на дешната сесија „Предизвиците и перспективите на националнте политики за дроги и психотропни супстанци“ е тема која го засега секој сегмент од нашето општество.
„Во повеќе наврати досега, и во јавноста и пред институциите, јавно сум потенцирал дека борбата со недозволената трговија со дрога е и ќе остане еден од стратешките приоритети на Министерството за внатрешни работи. Не само поради нејзините последици врз младите и општественото здравје, туку и поради фактот што овој феномен претставува клучен извор на моќ и ресурси за организираните криминални групи. Денешната сесија е потврда дека оваа борба мора да биде споделена, инклузивна и стратешки насочена.“, потенцираше министерот Тошковски.
Министерот Тошковски нагласи дека МВР како институција е на првата борбена линија во спречувањето на недозволената трговија со дрога и е секојдневно сведок на трансформациите и предизвиците кои ги носи овој феомен, од порастот на синтетичките супстанци и нивната достапност, до поврзаноста со организираниот крминал и транснационални мрежи.
„Но, токму затоа е важно да истакнеме дека борбата против дрогата не се води само со апсења и заплени. Таа се води и со податоци, со научно утврдени политики, со превенција во училиштата, со програми за третман и социјална поддршка, со меѓусебна доверба меѓу институциите, и со постојана комуникација со граѓаните и заедницата.“, потенцираше на крај министерот Тошковски.
Македонија
ДУИ: Во Агенцијата за храна и ветеринарство од вкупно 21 вработени нема ниту еден Албанец

Демократската Унија за Интеграција изразува длабока загриженост и остро го осудува систематското и намерно исклучување на Албанците од државните институции во Република Северна Македонија.
Според партијата на Ахмети, овој дискриминаторен феномен добива алармантни размери и претставува сериозно кршење на принципите на еднаквост и правична застапеност.
Како што појаснуваат, најновиот случај што јасно ја илустрира оваа загрижувачка реалност е Агенцијата за храна и ветеринарство, каде од вкупно 21 вработени, нема ниту еден Албанец.
„Станува збор за јавна институција што функционира со буџетски средства од даночните обврзници, вклучително и албанските граѓани, и целосното исклучување на цела заедница претставува неприфатлива и осудувачка пракса.
Ова не е изолиран случај. Тоа е дел од исклучувачка политика, која директно се коси со духот и буквата на Охридскиот рамковен договор, како и со темелните вредности на европската интеграција“.
ДУИ бара итна институционална реакција и започнување на независна истрага за да се обезбеди правична и пропорционална застапеност на Албанците на сите нивоа на јавната администрација, од раководните до извршните позиции.
„Дискриминацијата не смее да се нормализира. Молкот не е опција. Еднаквоста е ненадоместлива“.
Македонија
За прв пат после шест години, учениците во основните училишта ќе имаат учебници по сите странски јазици, вели Јаневска

„Наместо училиштата да им делат парталави и неупотребливи учебници на учениците, треба да ги пријават во електронскиот систем на Министерството за образование и наука и истите ќе бидат заменети со нови пред почетокот на новата учебна година. За оваа намена обезбедени се буџетски средства и нема потреба да ги разочаруваме ниту учениците, ниту нивните родители кои оправдано реагираат до министерството дека нивните деца добиваат учебници без корици и искинати страници“.
Ова го истакна министерката за образование и наука проф. д-р Весна Јаневска на денешната прес конференција посветена на набавката на учебници за основци и средношколци за новата учебна 2025-2026 година.
„Овој предизвик воопшто не треба да постои. Секое училиште има комисија за учебници која лесно може да процени дали еден учебник може или не може да се употребува и тоа што не е за употреба, не смее да се враќа во библиотечниот фонд и потоа некому да се доделува. Треба да се извести Педагошката служба при министерството и потребниот тираж ќе биде надополнет“, рече Јаневска, изразувајќи очекувања за поголема ажурност на членовите на училишните комисии за учебници.
Потсети дека учебниците од прво до трето одделение секоја учебна година се печатат во полн тираж, па така ќе биде и оваа, со оглед дека станува збор за таканаречени „работни учебници“ кои содржат материја што се пополнува со пишување, боење и сечење.
„Нови учебници со надградена содржина ќе има и за седмо одделение, затоа што од септември започнува примената на нови наставни програми. Се сеќавате дека ја модифициравме Kонцепцијата за основно образование на претходната Влада, која предвиде интегрирање на предмети како историја и географија, хемија и физика во седмо. Ги одвоивме, на барање на пошироката јавност, а најмногу на барање на наставниот кадар и затоа имаме нови наставни програми и нови одобрени учебници кои наскоро влегуваат во процес на печатење“, рече Јаневска.
Министерката информираше дека за прв пат после шест години, учениците во основните училишта ќе имаат учебници по сите странски јазици.
„Цели шест години, не беа набавени учебници по англиски, француски, германски и така натаму. Како нова Влада се заложивме уште минатата година, да го спроведеме овој процес и ќе успееме да го завршиме. На 1 септември, за сите странски јазици во основните училишта ќе има нови учебници“, потврди министерката.
Нови учебници по дел од предметите ќе има и во гимназиското и во средното стручно образование. Јаневска рече дека ова е втора учебна година по ред во која ќе има навремена испорака на учебници, што, како што нагласи, не беше пракса седум претходни години.
Според министерката, учебниците се еден од клучните фактори за квалитет на образовниот процес, покрај мотивираните наставници, наставните програми и инфраструктурата. Изрази благодарност до сите вклучени во постапките за нивна изработка, набавка и навремена испорака.
Годишно во просек за набавка на учебници, министерството издвојува околу 660 милиони денари.