Хуманитарната природа на спортот ги спои најголемите спортисти во Македонија за една добра и доблесна цел на акцијата „Шампионите за вас“, која е во склоп на „Проект Среќа“ и „Здраво, шампиони“, која трае веќе неколку месеци, а ќе заврши со делење на опремата на крајот на август пред почетокот на школската година.

„Ова што денес го правиме не е само за спортска опрема и членарини, туку за да им го поплочиме патот кон иднината на децата што сега се во социјален ризик. Преку спортот и благодарение на овие легенди што се дел од настанот децата во социјален ризик од Македонија ќе може да спортуваат и да стануваат дел од клубови за спорт што ќе ги учат на тоа како преку дисциплина, тимска игра, самомотивација и поставување сопствени цели може да постигнеш сѐ што сакаш во животот. Оваа патека, по која тие веќе тргнаа, ќе им покаже како и тие да станат шампиони и баш поради тоа нам ни е повеќе од драго што спортските ѕвезди го прават ова за иднината на нашето општество, децата и најмалите“, вели Кристина Арнаудова, претседател на „Проект Среќа“.

За време на „Шампионите за вас“ сите што дојдоа донираа најмалку по 100 денари и за тоа добиваа купон со кој присуствуваа на настанот и се дружеа со спортските ѕвезди, кои воедно потпишуваа и топки чија продажба дополнително влезе во донаторската каса.

Кошаркарите Перо Антиќ и Едина Муса, ракометарите Дејан Манасков, Филип Миркуловски и Филип Кузмановски, рели-возачот Игор Стефановски – Иџе и каратистите Дејан Недев и Алјоша Недев се вклучија и со тоа што донираа дел од своите лични предмети што ќе бидат дел од онлајн-аукција. Од дресови носени на европските првенства преку златни медали до првата награда што некогаш ја добила Едина Муса, и тоа потпишани и подготвени за наддавање.

„Проект Среќа“ соработува со основните и средните училишта и со установите што згрижуваат деца. Се пријавија 340 деца и за сите ќе се обезбеди спортска опрема и членарина благодарение на вниманието и трудот што го овозможуваат македонските шампиони. Неговиот успех се должи и на големата поддршка од спонзорите и партнерите и главниот покровител, Агенција за млади и спорт.