Македонија
(Видео) Николова: Не може државата да ми каже дали да користам канабис во рекреативни цели

Здружението на млади европски федералисти „ЏЕФ” и Здружението за канабис и зелени политики „Билка” одржуваат панел дискусија на тема „Декриминализација на канабисот,сега”. На панелот во киното „Култура” се обрати пратеничката на ЛДП, Јулијана Николова, која рече оти е убедена дека Собранието ќе го декриминализира канабисот во рекреативни цели.
„Ризикувам да бидам криминалец, ако консумирам канабис во рекреативни цели”, рече Николова и додаде дека иако никогаш лично не пробала, сепак, тоа не би требало да влијае врз можноста останатите граѓани тоа да го направат. Таа го спореди правото на избор за купување цигари со немањето право да се консумира канабис во рекреативни цели.
„Не може државата да ми каже дали ќе користам канабис”, рече Николова. Како позитивни примери ги посочи Канада, Холандија, Чешка и Португалија. Пратеничката рече дека е неприфатливо луѓе да бидат третирани како криминалци, ако дома одгледуваат 2 или 3 стебла марихуана поради здравствени причини.
Позитивно влијание кај јавноста, според Николова, имал Законот за легализација на марихуаната во медицински цели. На дискусијата, за економските аспекти на канабисот, говореше и Дамјан Божиновски од Левица, кој потсети дека братучедот на премиерот Зоран Заев се вклучил во новиот бизнис за одгледување канабис за медицински цели.
Тој рече дека може да се размислува за поведување предлог-закон за декриминализација на канабисот.
Пратеничката Маја Морачанин од ДОМ, рече дека ставот на партијата е поддршка на такво решение. „Како доктор не поддржувам употреба на психотропни супстанци, но без разлика на мојот став, тоа постои во светот и заслужува дебата. Тоа треба да биде право на слободен избор”, рече Морачанин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Општина Ѓорче Петров објави повик за субвенции за велосипед

Општина Ѓорче Петров денеска го објави јавниот повик за доделување субвенции за купување нов велосипед.
Вредноста на субвенцијата изнесува 50% од вкупната цена на велосипедот, но не повеќе од 3.000 денари по лице, вклучително и данок на личен доход – информираат од Општината.
„Право на користење на средствата имаат жителите на Општина Ѓорче Петров кои ќе купат нов велосипед на територијата на Република Македонија во периодот од 01.01.2025 година до 30.06.2025 година или до исцрпување на предвидените средства“, појаснуваат од Општината.
Јавниот повик ќе трае до 30 јуни 2025 година, односно до исцрпување на буџетот предвиден за оваа намена во висина од 500.000 денари.
Пристигнатите барања ќе се разгледуваат по принципот „прв дојден – прв услужен“, според датумот и времето на поднесување. Аплицирањето се врши во архивата на Општината, секој работен ден од 08:30 до 15:00 часот, во затворен плик со потребната документација.
„Со оваа мерка продолжуваме да ги поддржуваме здравите и еколошки навики на нашите сограѓани. Грижата за животната средина и поттикнувањето на физичка активност се важен дел од локалните политики“, изјави градоначалникот Александар Стојкоски.
Формуларите и целосниот јавен повик се достапни на веб-страницата на Општина Ѓорче Петров.
Македонија
Петрушевски: Венко Филипче да каже која е неговата улога во тендерите со јаглен, па затоа добил ауди Q8

Венко Филипче да каже што друго освен луксузното Ауди Q8 има како профит од тендерите со јаглен во ЕСМ од фирмите на Вице Заев и Енис Колашинац, изјави Бране Петрушевски, пратеник на ВМРО-ДПМНЕ.
„Венко Филипче да каже која е неговата улога во тендерите со јаглен, па е награден со луксузно ауди? Венко Филипче и СДС не можат да молчат особено што фирмата на Вице Заев во Бугарија, Гомасидра, која инкасирала 9 милиони евра од јагленот, се наоѓа на иста адреса како и неговата фирма „Пауер ај 8“(POWER i8 Ltd). Венко Филипче и Вице Заев делат ист канцелариски простор, на нивните фирми во Бугарија, на иста адреса се наоѓаат и редица фирми на Заев“, рече тој.
Очигледно е, додаде Петрушевски, дека фирмите на Заеви и Филипче во Бугарија се испреплетени, а парите помеѓу нив се во ист двор.
„Очекуваме јавното обвинителство да реагира и отвори случај за Венко Филипче, а за тоа има пред сè две многу силни причини: прво, фирмата добитник на државен тендер за испорака на јаглен, му купила луксузен џип ауди Q8 од 130 илјади евра. И под два, милиони од тој тендер завршиле на сметка на фирма на Вице Заев во Бугарија со иста канцеларија со фирмата на Венко Филипче“, рече Петрушевски.
Македонија
Спасувачка акција на Јабланица: повредена планинарка заглавена на непристапен терен

Хеликоптер од МВР се упати на Јабланица каде на непристапен терен има повредена жена од Струга.
Од Црвен крст Охрид известија дека утрово добиле аларм за интервенција на планината Јабланица, каде женска особа од Струга, се здобила со сериозна повреда на скочен зглоб.
„Поради комплексноста на теренот и далечината од најблискиот пристапен пат, ПСС се обрати до ЦУК со барање за воздухопловна асистенција. Во меѓувреме, еден тим од шест спасувачи со теренско возило се упати кон планината со цел пешки да пристапи во случај да нема можност за интервенција со хеликоптер“, велат од Црвениот крст.
За среќа, додаваат од таму, пред 30 мин беше беше полетан хеликотер на МВР, кој во содејство со припадници на Специјалната Антитерористичка Единица се на пат до местото на настанот, а тимот на ПСС се повлекува од терен.