По повод извршената акциска контрола во угостителски објекти во Скопје на 1 јули во временскиот период од 1.15 до 3.30 часот, од страна на СВР Скопје во кординација и содејство со Државниот инспекторат за труд, Управата за јавни приходи и Државниот пазарен инспекторат и спроведените акциски контроли во седум угостителски објекти на подрачјето на град Скопје, лоцирани во градскиот парк и неговата поблиска околина, здружението ХОРЕКАШИ бара одговори од надлежните институции дали е запазена законската процедура за инспекциски и полициски надзор.

Здружението ХОРЕКАШИ поднесе барање за пристап до информации од јавен карактер до следните институции и соодветствени одговорни лица: Инспекциски Совет на РМ – Елизабета Кучера, Министерство за внатрешни работи – Марија Јаковлеска, Државниот инспекторат за труд – Африм Селими,  Управата за јавни приходи – Татјана Банишка Митровска и до Државниот пазарен инспекторат – Тина Темовска.

Со него се бара да им бидат доставени сите документи и преписки со кои институциите беа вклучени во координирата полициска акција и здружен инспекциски надзор во присуство на единиците на ЕБР, со сите инспекциски служби, поточно преписките со: Инспекциски совет, Министерство за економија – Државен пазаришен инспекторат, Министерство за финансии – Управа за јавни приходи, Министерство за труд и социјална политика – Државен инспекторат за труд, која беше организирана во вечерните часови на 30 јуни и утринските часови на 1 јули годинава.

„Со ова сакаме да ја известиме јавноста, дека Здружен инспекциски надзор согласно со пропишаните закони на Република Македонија (Член 16-а став1од закон за инспекциски надзор) смее и може да организира само Инспекциски Совет на РМ. Здружениот инспекциски надзор само во случај на попречување на вршење на инспекцискиот надзор, смее да побара асистенција од Министерство за внатрешни работи (Согласно со член 34 од Законот за инспекциски надзор). Комуникацијата помеѓу Инспекциските органи и Министерството за внатрешни работи согласно со пропишаните закони на Република Макеоднија се одвива по писмен пат. Поточно согласно со член 7 став 1 алинеја 2 од Законот за полиција „Полицијата укажува помош (асистенција) по барање за асистенција предвидена со посебен закон (во конкретниот случај би требало да биде член 34 од Законот за инспекциски надзор). Согласно ставот 2 од член 7 од Законот за полиција „Барањето за асистенција надлежниот орган го поднесува до Полицијата во писмена форма, најдоцна пет дена пред спроведувањето на извршувањето, односно пет дена пред денот за кој е утврдена потреба за давање на помош (асистенција)“, се наведува во соопштението.

Здружението ХОРЕКАШИ бара дали е запазена законската процедура. Тие прашуваат дали која било од инспекциските служби била попречувани во инспекцискиот надзор, дали инспекциските служби поради евентуалното попречување писмено се обратиле до Министерството за внатрешни работи со барање за полициска асистенција, дали МВР писмено одговориле на барателите во случајов Инспекциските служби, за асистенција при вршење инспекциски надзор? Исто така се поставува и прашањето дали МВР има испоставено фактура до инспекциските служби за дадената услуга.

„Воедно го замолуваме Министерството за внатрешни работи да ни покаже по кој закон пропишан во Република Македонија, полицијата смее да организира акција или кординира во содејство со Државниот инспекторат за труд, Управата за јавни приходи и Државниот пазарен инспекторат“, се наведува во соопштението.

Во саботата вечерта полициски службеници упаднале во неколку ноќни клубови во Скопје и ги легитимирале посетителите. Некои од нив, револтирани од односот на полицијата објавија реакции на социјалните мрежи. Министерот за внатрешни работи, Оливер Спасовски, рече дека полицијата не употребила сила, а акцијата била спроведена според прописите и правилата.