Македонија
Владата го усвои клучниот документ за развој на одбраната
Стратегискиот одбранбен преглед, клучниот документ за развој на одбраната и на Армијата на Република Македонија, денеска беше усвоен од страна на Владата на Република Македонија.
„Македонија доследно работи на реформите и ги исполнува сите услови за членство во НАТО. После само една година, успеавме да го подготвиме клучниот документ кој ја дефинира одбраната и нејзиниот развој. Стратегискиот одбрнбен преглед е практично целата реформска агенда на одбраната на Република Македонија, а неговата подготовка е многу важен исчекор за гарантирање на нашата безбедност, но и за наше членство во НАТО“, рече министерката Шекеринска на прес-конференција по усвојувањето на документот.
Македонија не ја чекаше поканата од НАТО за да ги почне потребните реформи, рече Шекеринска, и додаде дека изминатите 12 месеци се работеше напорно. Истакна дека одбранбениот буџет е зголемен и дека ќе продолжи да се зголемува секоја година, сè до потребните 2 проценти од бруто-домашниот производ, дека платите на сите припадници на Армијата од почетокот на годината се зголемени, со што е подобрен нивниот стандард.
Во однос на развојните политики кои се планираат со Стратегискиот одбранбен преглед, министерката Шекеринска рече дека една од приоритетните цели на овој документ е создавање на модерна и флексибилна армија која ќе ја гарантира стабилноста, суверенитетот и територијалниот интегритет на Република Македонија.
„Со новиот концепт, организацијата ја дизајнираме со консолидиран број на команди и штабови, со јасно дефинирани нивоа на одговорност, со делегирани овластувања на соодветно ниво, наместо досегашната централизираност, оптимална големина и целосна пополнетост на единиците“, рече министерката.
Министерката најави дека ќе се реорганизира и Министерството за одбрана со цел да обезбеди подобро раководење, подобро оперативно менаџирање и фокус на клучните функции – обезбедување на одбраната, обезбедување на стратешки одлуки и цивилна контрола на армиските сили.
Една клучна определба е и растот на буџетот на одбраната, а вистинската сила на Армијата ќе се базира на високообучени професионалци кои ќе ја имаат и потребната опрема, согласно НАТО-стандардите. Ќе продолжи и придонесот на Армијата во меѓународни операции, а декларираните единици кои се подготвуваат за употреба во рамките на мисии на НАТО, ЕУ, ООН, ќе бидат во фокусот на процесот на модернизација.
„Пред една година кога Црна Гора стана членка на НАТО, им честитав и кажав дека нашата цел е Македонија да стане 30-тата земја членка на Алијансата. Тоа звучеше како добра желба, но денес тоа е реалност која ни е на дофат. Следната недела Македонија ќе ја добие поканата за членство во НАТО. За само неколку месеци, тоа значи дека Македонија ќе го започне процесот на ратификување на протоколите за пристапување и дека од тој момент ќе започне да учествува на сите состаноци на НАТО и ќе биде дел од Советот на Алијансата. Само за неколку месеци добиваме шанса да бидеме на масата каде се носат одлуките“, рече министерката за одбрана.
„Членството во НАТО значи безбедна иднина, но и сигурен економски напредок и развој, а бројките тоа јасно го покажуваат“, заклучи министерката за одбрана.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Понижувани сме и навредувани, стравуваме дека прозивките ќе преминат во лични напади, реагираат Даштевски и уште петмина од ДИК
Претседателот на Државната изборна комисија (ДИК), Александар Даштевски, и членовите Радица Ристеска, Оливер Ристовски, Борис Кондарко, Бобан Стојаноски и Абдуш Демири не се чувствуваат безбедно по постојаните напади за работата на ДИК по приговорите за парламентарните избори. Особено ги загрижува тоа што изјавите со напади на ДИК ги даваат политички партии и носители на високи функции.
„Ве известуваме дека покрај тоа што сме лично понижувани и навредувани, исто така како членови во највисоката институција за организирање и спроведување на изборите сме изложени и на неосновани и непримерни јавни политички притисоци и закани за кривична одговорност поради донесените одлуки на ДИК. Покрај тоа, а следејќи ги контекстот и интензитетот на нападите, прозивките и навредите, исто така сме загрижени и дека е можно тие да преминат и во лични напади на нашата сигурност. Ве известуваме дека ДИК во целост професионално, транспаретно и само врз основа на законот ги спроведе изборите, што е потврдено од сите домашни и меѓународни фактори“, велат од ДИК.
Нагалсуваат дека и покрај сите непријатности што ги имаат, со највисок степен на интегритет врз основа на јавна проверка на изборниот материјал, ДИК ги утврдила фактите и одлучувала по приговори поднесени од разни учесници за 110 избирачки места. Врз основа на образложени докази, усвоени се приговори за 7 избирачки места за кои ДИК смета дека има правен основ, а приговорите за другите 103 избирачки места се одбиени како неосновани. За одбиените приговори нема поднесено тужби ниеден учесник на изборите.
„За ДИК, неприфатливи и недопуштени се нападите, притисоците и мешањето на одредени политички партии и на поединци од техничката Влада во изборните процедури, како и во работата и одлучувањето на ДИК и на Управниот суд. За сето ова, денес, на средбата во ДИК беше известена и амбасадорката на набљудувачката мисија на ОБСЕ-ОДИХР, Џилијан Стрик“, велат до ДИК.
Попладнево, претседателот на ДИК, Даштевски, заедно со уште петорица членови испрати соопштение до медиумите, во кое реагираат на навредите, а кое не е потпишано единствено од потпретедателката на ДИК, Дитмире Шеху.
Меѓународната заедница, денес, освен од ДИК, доби извествање за изборен инженеринг и од коалицијата „Европски фронт“.
„Овој обид за изборен инженеринг има цел да го промени односот на бројките во Собранието преку политичкиот договор на маса. Кредибилитетот на изборите и на демократскиот процес беше прифатен и поздравен од сите партии и од меѓународната заедница. Отпосле, со политички договори и монструозен антидемократски план, зготвен во партиските штабови на ВМРО, ЛСДМ и ‘Влен’, се прави обид да се наруши волјата на граѓаните. Седницата на Државната изборна комисија беше скандалозна демонстрација на прегласување и суспендирање на принципите на Охридскиот договор и предупредување за враќање на претходните системи. Неправедно и со надгласување, како во времето на монизмот во ДИК, донесена е одлука за прегласување на некои избирачки места во 5. и 6. зона, токму на избирачките места на кои победници се партиите што се жалат, а нивните гласачи се именување како крадци, со што се понижува целото гласачко тело“, рече Наим Бајрами и го повика Управниот суд да постапува законски, без партиски или политички директиви.
За изборен инженеринг пред три дена обвини и коалицијата „Храбро за Македонија“, од каде што велат дека им се украдени повеќе од 600 гласа, кои се додадени на коалициите „Вреди“ и „Европски фронт“. Од „Храбро за Македонија“ не поднесоа приговори за изборниот резултат, но најавија тужба во Управниот суд.
Македонија
Рама до Бугарија: Ја блокирате Северна Македонија за да покажете дома колку сте силни, политиката е антиевропска
Албанскиот премиер Еди Рама упати критики до официјална Софија и до сите ЕУ-членки што користат билатерални прашања за блокади на форум во Тирана организиран од „Солуција“, во соработка со Белградскиот центар за безбедносни политики и фондациите „Отворено општество“ и „Рокфелер“.
„Зошто ја блокирате Северна Македонија? За да покажете дома колку сте силни!“, порача Рама заклучувајќи дека политиките на блокади се ужасни, одвратни и антиевропски.
„Што ви е поентата? Што сакате да постигнете со блокадата на Северна Македонија? Што мислите дека ќе постигнете? Да падне поддршката во ЕУ, само тоа можете да го постигнете!“, ова е главната порака што албанскиот премиер Еди Рама ја испрати до Бугарија, но и до другите земји членки на ЕУ, кои користат билатерални прашања за да го блокираат процесот на проширување, денеска, во Тирана, на лидерскиот состанок, настан организиран од Балканскиот центар за конструктивни политики „Солуција“, во соработка со Белградскиот центар за безбедносни политики и фондациите „Отворено општество“ и „Рокфелер“.
„Ова е најантиевропска политика што може да се замисли, ова е најстрашен пристап кон нашата иднина и долгорочно ова е еднакво штетно и опасно и за нив, не само за нас. Ова е лудо! Целосно лудо! Што значи ова? Дека сега за секоја земја што сака да се зачлени може да се појави друга и да каже – не, првин да видиме кој беше овде прв, кога од мајмуни станавме луѓе, дали бевме ние или вие“, порача Рама и продолжи:
„Падот на поддршката кон ЕУ е резултат токму на ова ср..е! Национализмот ја киднапира ЕУ и ЕУ станува жртва на националистичките пориви на земјите, една, па друга. Решението е просто – не може билатералните прашања да блокираат! А ако некоја земја сака да глуми дека некое билатерално прашање е европско, тогаш мора да има барем уште една што ќе ја поддржува. Не може 26 земји да кажат – ова е билатерално прашање, една да тврди дека е европско и наеднаш тоа да стане европско. Наместо Бугарија да рече, добро, ние имаме проблем со Северна Македонија (иако јас не им го разбирам проблемот, искрено), ама ајде да го оставиме настрана, а преговорите и трансформацијата на земјите да течат, тие бојкотираат. Зошто ги блокирате самите преговори? Зошто блокирате реформи? Лудо! Одвратно!“, смета Рама.
„Истото ова се случи со Константинопол, додека Грците се занимаваа дали ангелите имаат секс, султанот ги освои. Така и ние сега, се занимаваме дали ангелите имаат секс во регион во кој баш и нема ангели, а опасностите се тука“, вели тој.
Албанскиот премиер порача дека опасно е кога минатото станува повлијателно од иднината:
„Морате да го погледнете минатото со очите на иднината, не обратно. Нашите проблеми во регионот почнаа тогаш кога добивме држави. Претходно тука си имаше луѓе што живееја заедно, без разлика на своите различности, тераа бизнис заедно, се женеа и мажеа меѓу себе, се разведуваа… Штом добивме држави, почнаа проблемите. Па, така, сега се занимаваме кои се мајката и таткото на Александар, кој е овој, кој е оној… какви глупости! Мислите дека обичен грчки таксист денес е навистина антички ексклузивен наследник на Платон? Јас не мислам. Ова се тешки глупости и сите ние се занимаваме со ова до точка кога нашата иднината е загрозена“, порача Рама.
Шефот на албанската влада, инаку, се обрати на настан организиран во Тирана од Балканскиот центар за конструктивни политики „Солуција“, во соработка со Белградскиот центар за безбедносни политики и фондациите „Рокфелер“ и „Отворено општество“.
На настанот, заедно со него, зборуваа и Весела Чернева, заменик-директорка на Европскиот совет за надворешни односи, Мајлинда Брегу, генерална секретарка на Советот за регионална соработка, и Даниела Шварцер, членка на француско-германската група за реформи на ЕУ, а настанот беше модериран од претседателот на „Солуција“, Никола Димитров.
Македонија
Кривичен суд го добил барањето од Палевски за адвокат
Кривичниот суд го добил барањето од Истражниот затвор „Скопје“ во Шуто Оризари за ангажирање адвокат што ќе го застапува осомничениот Љупчо Палевски во процесот за убиството на Вања Ѓорчевска и Панче Жежовски.
Од судот информираа дека од Истражниот затвор „Скопје“ во Шуто Оризари до Основниот кривичен суд Скопје е доставно официјално известување за екстрадицијата на осомничениот за кој веќе е определна мерка притвор од неговото пронаоѓање, односно лишување од слобода, како и барање за ангажирање адвокат, кој ќе го застапува во текот на постапката.
„Судот во рамките на законските одредби ги издава сите дозволи поврзани со истражната постапка, која е во надлежност на Основното јавно обвинитeлство – Скопје и добиените барања ги доставува до предложените адвокати за нивно понатамошно постапување“, информираа од Кривичниот суд.
Дополнително, судија на претходна постапка во координација со надлежниот јавен обвинител ќе издаде наредба за спровод на осомниченото лице за негово произнесување во однос на околностите во предлогот на јавниот обвинител за определување на мерката притвор, а за донесеното решение јавноста ќе биде благовремено известена.