Европа
Разрешена бестрашната романска обвинителка Лаура Ковеси, ЕУ и САД реагираат
Обвинителката од која стравуваше цела Романија, Лаура Кодруца Ковеси, повеќе не е на чело на Специјалното јавно обвинителство (ДНА). Романскиот претседател, Клаус Јоханис, потпиша указ за разрешување од функцијата на главната обвинителка против корупцијата, Лаура Кодруца Ковеси, по решение на Уставниот суд од мај годинава.
„Одлуките на Уставниот суд треба да бидат почитувани во држава што го почитува владеењето на правото. Претседателот издаде указ за отстранување на главниот обвинител од функцијата“, изјави портпаролката на претседателот, Мадалина Доброволски.
Ковеси, по указот на романскиот претседател Клаус Јоханис, со кој ја отстрани од раководната функција во Националната дирекција за борба со корупцијата (НДБК), на прес-конференција рече дека во моментов нема политичка волја за независно правосудство. Таа им порача на граѓаните дека корупцијата може да биде поразена.
„Корупцијата може да биде поразена, не откажувајте се“, изјави таа на прес-конференцијата.
Министерот за правда, Тудорел Тодер, побара отстранување на Ковеши во февруари, велејќи дека ги надминала нејзините овластувања и го оштетила имиџот на земјата во странство. Неговото барање собра илјадници демонстранти на улиците, кои го кренаа гласот против корупцијата.
Ковеси е на чело на НДБК од 2013 година, а претходно беше јавен обвинител на Романија. Под нејзино раководство, НДБК достигна голем број осудителни пресуди за корупција на лица на високи државни функции и доби пофалби од ЕУ, која го набљудува романскиот правен систем.
Ковеси претставувајќи го годишниот извештај на почетокот на годинава, наведе дека лани пред судот се изведени 1 000 функционери под обвинение за корупција. Помеѓу нив има тројца министри, шест пратеници и поранешен претседател на парламентот. Директоратот кривично гонел 713 функционери, вклучувајќи и 28 градоначалници, 38 директори на јавни институции и еден сенатор. Обвинителите во последните години истражуваа голем број романски функционери за судир на интереси, злоупотреба на службена положба, како и примање мито. Сепак, корупцијата во Романија е и понатаму голема, предупреди Ковеси и додаде дека некои директори на болници земале милиони евра мито, а злоупотребите на ЕУ фондовите биле двојно зголемени. Претседателот на Романија, Клаус Јоанис, ѝ честиташе на обвинителката и ја пофали нејзината работа.
Европската комисија и САД реагираа за отстранувањето на главниот обвинител на Националната дирекција за борба со корупцијата во Романија потенцирајќи дека државата треба да продолжи да се бори против корупцијата.
Европската комисија ја предупреди Романија дека ако резултатите од борбата со корупција во државата се влошат по отстранувањето од раководната позиција во Националната дирекција за борба со корупцијата Лаура Кодруца Ковеси, тоа ќе биде земено предвид.
„Не коментираме за решенија поврзани со националните судски системи. Во неколку наврати забележавме колку е важно судскиот систем во Романија да биде независен, за да има моќ да се бори против корупцијата“, додаде портпаролот.
Американската амбасада во Букурешт реагира на одлуката за отстранување на главниот обвинител на НДБК Ковеши, потенцирајќи дека Романија мора да продолжи со борбата против корупцијата. „Амбасадата на САД ја потврдува посветеноста да ја поддржи борбата против корупцијата. Романија е регионален модел во однос на антикорупциската борба. Ја повикуваме Романија да ги задржи и да ги поддржи своите силни институции за борба против корупцијата“, изјавија од Амбасадата.
Новото раководство на Социјалдемократската партија со месеци се обидуваше да ја разреши Ковеши, на чиј удар се најдоа неколкумина видни членови на партијата, вклучувајќи го и поранешниот партиски лидер за изборни нерегуларности. Владејачката партија ја обвинува дека како шеф на Специјалното јавно обвинителство (ДНА), води случаи кои биле политички мотивирани.
Лаура Ковеси е ќерка на поранешен јавен обвинител, а мајка ѝ била професорка по романска книжевност.Таа имаше само 33 години кога дојде на функцијата Јавен обвинител на Романија во 2006 година. По два мандата од по три години, во 2013 година се искачи на највисокото скалило во правосудството, кога беше именувана за шеф на Романскиот антикорупциски директорат или ДНА, институција која беше формирана да се бори со корупцијата во врвот на државните институции и власта во годините кога Романија се подготвуваше да ѝ се придружи на Европската Унија. Оттогаш, таа процесуираше обвиненија за корупција против романските водечки политичари од сите партии: поранешната министерка Елена Удреа, градоначалникот на Букурешт Сорин Опреску, братот на експретседателот Трајан Басеску, кој беше уапсен кога Басеску сè уште беше шеф на државата, и лани во септември почна постапка против тогашниот премиер Виктор Понта, кој потоа си поднесе оставка.
ДНА на чело со Ковеси за неполни две години отвори околу 6 000 предмети, а против повеќе од 1 200 лица се подигнати обвиненија за случаи на корупција. Во 2015 година почнати се судски процеси против експремиерот Понта, пет министри, пет сенатори, градоначалници, судии, полицајци, директори. Минатата година специјалното обвинителство нареди конфискација на 494 милиони евра, колку што ѝ било нанесена штета на државата. Романската ДНА има околу 500 вработени, од кои 140 обвинители, 190 полицајци, 50 експерти.
„Знам дека има многу шеги за мене. Има една интернет-страница која постојано објавува вицеви и таму за мене пишува дека јас не пијам кафе наутро, туку корумпирани солзи. Дека јас не ја бојадисувам косата со фарба, туку со корумпирана крв. Дека ако некој ми подари нешто, не го прифаќам подарокот затоа што не сум добила и фискална сметка со него и ја апсам таа личност. Се чудам кога ги читам овие работи за себе. Јас немам три глави и пет раце. Немам ни супер моќ. Немам ни магично стапче. Јас сум човек како и секој друг, жена како и секоја жена на моја возраст“, вели Ковеси во едно од интервјуата дадено за медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.