Косовската полиција утрово влегла во две српски села кај Гнилане, при што биле уапсени петмина Срби, пренесува „Б92“. Како што се наведува во соопштението на косовската полиција, акцијата е спроведена на неколку локации, а сите приведени биле уапсени поради дејствување против уставниот поредок и безбедноста на Косово.

„Полицијата на Косово преку соопштение, со цел правично информирање на јавноста, демантира некои српски медиуми/портали, кои изјавуваат дека се спроведува полициска операција против поранешни припадници на Косовските сили за безбедност и информираме дека тоа се само некои наводи или шпекулации на медиумите“, се наведува во соопштението.

Косовската полиција навела дека им гарантира на сите граѓани оти нејзините активнсоти се засноваат на Уставот и законите и најави дека операцијата ќе продолжи во координација со правосудството.

Според српските медиуми, припадници на специјалните сили на косовската полиција влегле рано утрово во простории на културно-просветниот центар „Божидар Митровиќ – Шандор“ во Шилово. Портпаролот на косовската полиција, Баки Кељани, рекол за РТС дека во акцијата на полицијата има уапсени не прецизирајќи други детали.

Како што пренесува РТС, приведени се началникот на Косовоско-поморавскиот округ, Радован Стојковиќ, и директорот на филијалата на Националната служба за вработување во Гнилане, Јован Дениќ.