Полицијата во американското гратче Фергусон, во сојузната држава Мисури, ги расчистува улиците од демонстрантите кои протестираа на годишнината од полициското убиство на црниот тинејџер Мајкл Браун, употребувајќи солзавец, според информациите на активистите преку социјалните мрежи.

На интернет се појави видео со обвинување за полицијата, која бара од демонстрантите да се разотидат, како и фотографии од метални сандаци со искористени проектили со солзавец. На медиумите од безбедносни причини не им беше дозволен пристап до местото на коешто беше застрелан лани Мајкл Браун, и каде што полициските кордони ги потиснуваат демонстрантите.

Протестите продолжија со немири доцна вечерта кон понеделникот по локално време, откако претходно полицијата потврди дека имало два случаи на пукање во кои биле повредени две лица, но се наведува дека иако едниот инцидент во кој биле истрелани шест куршуми во близина на црквата во којашто се одржуваше комеморацијата за убиениот афроамерикански тинејџер, тие не биле насочени кон неколкуте стотини активисти. Медиумите пренесуваат дека во еден случај полицијата одговорила на огнот, но засега нема официјални потврди за тоа.

Денот на сеќавањето на убиството на Мајкл Браун во неделата се одвиваше мирно, додека малиот број демонстранти се зголеми во вечерните часови со приклучување на неколку групи хулигани. Најмалку една продавница е ограбена, пред да се слушне втората серија истрели во 4 часот по средноевропско време, јавуваат медиумите.

Според неименуван полициски офицер од Округот Сент Луис, чие предградие е Феругсон, полицаец отворил оган откако бил отворен „тежок оган“. На Twitter се поставени фотографии кои покажуваат најмалку два автомобила издупчени со куршуми. Според локалните медиуми едно лице е пренесено во болница, најверојатно демонстрант.

Осумнаесетгодишниот Мајкл Браун, кој според истрагата не бил вооружен, беше застрелан на 9-ти август 2014 година од 26-годишниот бел полицаец Дарен Вилсон кој тврдеше дека бил нападнат. Овој инцидент и многуте слични во коишто жртви на полициската бруталност беа припадници на афроамериканската заедница предизвика расни безредија без преседан ширум земјата, кои траеја со месеци. Повеќето од нив прераснаа во неколкудневни немири со десетици приведени, а покрај тоа зајакна и движењето „Животите на црнците се важни“

Во неделата собраните луѓе стоеја четири ипол минути во тишина, со што потсетија дека телото на убиениот тинејџер толку часови стоело на улицата додека било префрлено во мртовечница. Потоа беа пуштени две бели гулабици а таткото на убиениот ја поведе поворката до црквата којашто беше засолниште во текот на немирите кои ноември 2014 година, со многу повредени и приведени, по вандализмот откако беше објавено дека Големата порота се откажува од процесот против полицаецот.

Во Фергусон деновите пристигнаа многубројни борци за правата на афроамериканската заедница и верски лидери на одбележувањето на годишнината од убиството на 18-годишното момче. Претходно во саботата исто така се одржа протесна поворка која ја водеше таткото на Мајкл со силно полициско обезбедување.

Акции на активистите за човековите и правата на расните заедници имаше и во Њујорк, каде десетици луѓе се собраа во знак на солидарност со настанот во Фергусон против полициските убиства на црните момчиња. Околу стотина лица во Бруклин протестираа легнувајќи на улица симболично протестирајќи против тоа што телото на Браун било оставено да лежи неколку часа на местото од убиството, при што се уапсени неколку лица. /крај/мф/сн

Извор: Макфакс