Македонија
Заев и Борисов заедно го прославија Илинден во Благоевград
Втора година по ред, владите на Македонија и Бугарија заеднички го прославија Илинденското востание. Премиерите Заев и Борисов се поклонија пред споменикот на Гоце Делчев во Благоевград.
Борисов на средбата со Заев која се одржа попладнево во Благоевград, каде што се одбележуваат 115 години од Илинденското востание, оцени дека само една година откако се потпиша Договорот за пријателство, соработка и соседство, веќе се чувствува позитивен резултат во заемните односи.Според прес-службата на бугарската Влада, Борисов искажал задоволство од новиот дух на соработка кој заживеал трајно во односите меѓу Бугарија и Македнија по потпишувањето на Договорот.
„Генерации на политичари беа подготвени и успешни. Минатата година го потпишавме Договорот за соседство. Ние не верувавме, но ние го потпишавме. Нешто што не доведе до контроверзност. Минатата година отидовме заедно на гробот на Гоце Делчев во Скопје, заедно бевме во Рим. Покажавме огромна, но и тивка дипломатија. Тука сакам да им честитам и на колегите Заев и Ципрас, кои дојдоа до решение на еден децениски спор“, изјавил Борисов.
Според него, веќе се очигледни позитивни ефекти во трговската размена и туризмот меѓу двете држави.На средбата било разговарано за состојбата на граничните контролни пунктови меѓу Бугарија и Македонија, за подобрување на нивната работа и за отворање нови. Според БГНЕС, Бугарија и Македонија планираат да го прошират и модернизираат граничниот премин Станке Лисичково.
На чествувањето во Благоевград учествува и министерот за внатрешни работи Оливер Спасовски, а од бугарска страна министерот за одбрана Красимир Каракачанов и градоначалникот на Благоевград, Атанас Камбитов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) На улиците на Техеран, Иран, се слави убиството на Али Хамнеи
Со музика и танцување вечерва жителите на многу ирански градови слават за убиството на лидерот на Исламската Република, ајатолахот Али Хамнеи, објави на социјалните мрежи „Иран интернешнл“.
Видео од Техеран покажува насмеани луѓе излезени на улица откога ја добиле веста дека Али Хамнеи е убиен.
Во Караџ голем број граѓани танцуваат на улица, а жителите пак на Бандар Абас се излезени на улиците со автомобили и слават со сирените.
86-годишниот Али Хамнеи беше на власт речиси четири децении, од 1989 година. Имаше врховна власт, владееше со владата, со војската и со судството во шиитската Исламска Република.
Македонија
Родителите на децата загинати во Пулс порачаа дека правда мора да има
Родителите на загинатите во трагичниот пожар во „Пулс“ поладнево на „Марш за ангелите“ порачаа дека нема да дозволат одговорните за трагедијата на нивните деца да ја избегнат правдата, иако, велат на обвинителната купа седат само дел од лицата поврзани со трагедијата.
-Суштината е одговорноста. Факт е дека денес на обвинителна клупа седат дел од лицата поврзани со трагедијата. Но, исто така факт е – болен, непобитен факт – дека постојат луѓе со многу поголема моќ, обврски и надлежности, кои воопшто не се ни опфатени. Луѓе кои имале должност да спречат, а не спречиле, рече Александар Наунов, претседател на Здружението на граѓани „16 Март 2025 Кочани“.
Тој, во изјавата за медиумите, истакна дека се најавува свикување колегиум на обвинителите за повторно разгледување и евентуално ослободување на дел од обвинетите.
-Колегиумот (на обвинители) може да прегледува документи, но не може да брише факти, не може да брише пропусти, не може да брише нечии должности што биле игнорирани. Не може да избрише нечие непостапување кога тоа било прашање на живот и смрт, смета претседателот на ЗГ „16 март 2025 Кочани“.
Според Наунов, суштината не е во тоа кој трчал, кој се плашел, а кој спасувал, туку кој имал должност, а не ја извршил.
-Ние не сме овде за одмазда. Ние сме овде за правда. За ред. За систем што ќе ги штити децата – не систем што ќе ги остави да загинат. Родителите никогаш не се откажуваат. Можеби ќе нè уморите, но нема да нè скршите. Можеби ќе не одолговлекувате, но нема да не замолчите. Вистината ќе излезе на виделина, рече Наунов.
Протестниот марш денеска започна од „Паркот на Револуцијата“, а заврши пред Основниот суд и обвинителство во Кочани.
Македонија
Претседателката за утре го свика Советот за безбедност
По извршените консултации претседателката Гордана Сиљановска – Давкова за утре – 1 март 2026 година, закажа седница на Советот за безбедност.
Како што соопштија од Кабинетот на претседателката Сиљановска – Давкова, седницата ќе започне во 18 часот во Вилата Водно, а на дневен ред ќе биде безбедносната состојба во земјава по најновите случувања на Блискиот Исток.

