Свет
Мнангагва нов претседател на Зимбабве, опозицијата не ги признава резултатите
Eмерсон Мнангагва, поранешната десна рака на Роберт Мугабе, е избран за претседател на Зимбабве во првиот круг, но денес опозицијата ја отфрли победата, со што се навестуваат нови тензии во земјата, кои веќе резултираа со шест загинати во судирите со безбедносните сили.
Мнангагва владее со Зимбабве по падот на Роберт Мугабе во ноември минатата година, откако тој на власт мина 37 години. Актуелниот претседател освоил 50,8 отсто од гласовите, додека за опозицискиот кандидат Нелсон Чамиса гласале 44,3 проценти од избирачите, објавија од избирачкиот комитет.
Седумдесет и петгодишниот Мнангагва го поздрави новиот почеток и повика на единство во градење на ново Зимбабве за сите.
Опозицијата, пак, најави дека ќе се жали кај судските органи.
„Резултатите се лажни, ќе се жалиме за целокупниот процес“, изјави пред судот Морган Комичи, портпаролот на Движењето за демократски промени на Нелсон Чамиса.
Чамиса напиша на „Твитер“: „Верував дека волјата ќе преовладува над моќта и силата“.
Партијата на Мнангагва, ЗАНУ-ПФ, победи на парламентарните избори што се одржаа во понеделникот, истовремено со претседателските избори, по што избија протести на опозицијата и нејзините поддржувачи кои ја обвинуваат владата за местење на резултатите од изборите. Бидејќи комитетот го одложи објавувањето на резултатите од претседателските избори, опозицијата ваквиот гест го протолкува како обид да се наместат резултатите.
Од стекнувањето на независноста во 1980 година, во Зимбабве имало само два претседатела, и двајцата од партијата ЗАНУ-ПФ: Роберт Мугабе, кој ја водеше земјата цели 37 години, и Eмерсон Мнангагва познат како „крокодил“, која дојде на власт по воениот удар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бројот на бегалци во Германија годинава достигна нов врв
Бројот на бегалци кои живеат во Германија годинава достигна нов врв, покажуваат денешните владини податоци, пренесува Дојче веле.
Околу 3,48 милиони бегалци со различни видови дозволи за престој живееле во Германија на крајот на јуни 2024 година, што е за приближно 60.000 повеќе отколку на крајот на 2023 година.
Една третина од овие бегалци дошле од Украина.
Бројката вклучува и некои поединци кои се обврзани да ја напуштат Германија, но остануваат во земјата под политика на толеранција која опфаќа низа ситуации, како што се болест, недостаток на документи за идентификација или луѓе чии деца имаат дозвола за престој.
Статистиката беше дадена како одговор на барањето на партијата Социјалистичка левица во парламентот и првпат беше објавена од Ној Оснабрикер Цајтунг.
Свет
Лавров: Русија не сака ескалација, но западните политичари се однесуваат како деца
Рускиот министер за надворешни работи Сергеј Лавров денеска изјави дека Русија не сака да ги ескалира тензиите со западните земји, но дека, како што наведе, „политичарите на овие земји се однесуваат како деца“.
„Не сакаме ескалација. Се чини дека западните политичари навистина имаат менталитет на дете, иако како возрасни заземаат одговорни позиции: министри, премиери, канцелари, претседатели“, рече Лавров.
Лавров нагласи дека неколку месеци во светот се разговара за тоа како Русија наводно само се заканува и зборува за „црвени линии“.
Свет
Израелска армија: Убиени околу десет високи команданти на Хезболах
Портпаролот на израелската армија, контраадмирал Даниел Хагари, изјави дека заедно со Ибрахим Акил, во денешниот израелски воздушен напад врз јужен Бејрут биле убиени околу десет високи команданти на либански Хезболах.
Хагари на прес-конференција рече дека Акил и другите членови на елитната единица Радван на Хезболах се собрале во подрумот на една зграда кога биле мета и убиени.
Весникот „Тајмс оф Израел“ наведува дека Хагари рекол дека тоа биле „командантите кои го подготвиле и го воделе планот на терористичката организација Хезболах за напад на северната територија на државата Израел.
Портпаролот на израелската војска тврди дека како дел од таа инвазија, Хезболах планирал упад на израелска територија сличен на нападот на Хамас од Газа на јужна израелска територија на 7 октомври минатата година. Тогаш започна војната меѓу Израел и таа палестинска исламистичка организација.
Во меѓувреме, израелскиот министер за одбрана Јоав Галант на платформата X објави дека ќе продолжи „секвенцата на акции во новата фаза“ од конфликтот со Хезболах додека не се постигне целта за безбедно враќање на Израелците раселени поради прекуграничниот конфликт во нивните домови.