Американскиот државен секретар Џон Кери во текот на оваа седмица со министерот за надворешни работи на Иран ќе подготви основи за нов круг преговори за контроверзната нуклеарна програм на Техеран, а во петок ќе допатува во француската престолнина Париз и ќе изрази солидарност со жртвите на терористичките напади и ќе разговара за терористичките закани, најави во понеделникот за време на неговата посета на Индија.

Државниот секретар на САД, Џон Кери, во Женева треба да се сретне со шефот на иранската дипломатија Џавад Зариф. „Би требало да ги подготвиме насоките за нашите преговарачи и се надевам да го забрзаме процесот за да можеме побрзо да напредуваме“, изјави Кери на прес-конференција во понеделникот во индискиот град Гандинагар.

Притоа најави дека во петок во Париз ќе разговара со француските политичари за џихадистичката закана и ги отфрли критиките упатени на сметка на САД бидејќи на големиот марш против теророт и во одбрана на слободата на изразувањето кој се одржа во неделата во Париз со учество на повеќе од 56 шефови на држави, влади и меѓународни организации од целиот свет, не испратија претставник на високо ниво.

Според процените на организаторите, околу 1,7 милион луѓе во неделата излегоа на улиците на Париз за да искажат солидарност со жртвите на тридневните терористички напади и особено врз редакцијата на сатиричниот неделник Charlie Hebdo со што ја искажаа поддршката за идеалите на слободата на изразувањето.

„САД и Франција ги поврзува трајна врска длабоко вкоренета во заедничките вредности, во прв ред во слободата на изразувањето“, изјави Кери.

САД во париската поворка ја претставуваа помошничката на државниот секретар Викторија Нуланд и американскиот амбасадор во Франција, додека на неа не се појави американскиот државен обвинител Ерик Холдер, иако допатува во Париз.

„Ниеден акт на терор, ниту две лица со АК-47 (автоматски пушки со кои беа вооружени браќата Каши во нападот врз редакцијата на неделникот –з.р.), ниту заложници во продавница за храна (еврејскиот супермаркет за кошер храна во 20-от арондисман на периферијата од Париз – з.р.), никогаш нема да ги спречат оние кои се верни на маршот на слободата“, додаде американскиот државен секретар.

Новиот круг преговори меѓу Иран и шесте светски сили треба да започне на 18-ти јануари во Женева. Разговорите во ткн формат „пет плус еден“, односно петте постојани членки на Советот за безбедност на Обединетите нации – САД, Русија, Кина, Велика Британија и Франција плус Германија постигнаа привремен договор со Иран во ноември 2013 година според кој Техеран треба да ја суспендира својата програма за збогатување ураниум. За возврат Западот треба да укине некои од економските санкции воведени против Иран во текот на повеќе од деценискиот нуклеарен спор.

Западот и неговиот блискоисточен сојузник Израел тврдат дека иранската нуклеарна програма има цел да развие атомско оружје, додека Техеран е упорен дека програмата и збогатувањето на ураниум е негово суверено право, како и дека цел на програмата е исклучиво добивање електрична енергија и во медицински истражувања./крај/мф/сн

Извор: AFP