Северна Кореја е одговорна за информатичкиот напад врз компанијата „Sony Pictures Entertainmen“ кон крајот на ноември, во кој хакерите успеаја да дојдат до голем број податоци за сите вработени и за првите челниците на корпорацијата, до сценарија, како и до тајни потсмешливи и навредливи забелешки на компанијата за многу холивудски ѕвезди но и за политичари, се наведува во извештајот на американското Федерално биро за истраги FBI објавен во петокот.

„Бирото располага со доволен број докази од коишто се заклучува дека севернокорејската влада е одговорна за информатичкиот нападот …“, се вели меѓу другото во споменатиот извештај на американската федерална полиција во којашто се додава дека нападот врз Sony е „неприфатлив за една држава“.

Републиканскиот водечки сенатор Џон Меккејн кибернетичкиот напад го нарече „воен чин“.

„Вонредно сме загрижени поради деструктивноста на овој напад насочен против приватна компанија и граѓаните коишто работат во неа. Ваквата закана ги минува границите на прифатливото однесување за една држава“, се наведува во извештајот на FBI во кој се истакнува, како што во четвртокот посочи и Белата куќа, дека станува збор за „најголемиот напад врз националната безбедност“, на САД.

На 24-ти ноември хакери, за коишто американските истражни органи велат дека го извршиле од Северна Кореја, украдоа многу податоци од „Sony Pictures Entertainmen“, чие седиште е во Калифорнија. Меѓу украдените податоци се информации за илјадници вработени, но и за славни личности, како и ставовите на компанијата за нив.

Во меѓувреме Северна Кореја демантираше дека стои зад нападот со кој би се одмаздила за комедијата „Интервју“, којашто ќе ја објави „Sony Pictures Entertainment“ за заговор за убиство на младиот севернокорејски челник Ким Јонг-Ун во кој се исмејува состојбата во земјата. Пјогнјанг објави дека тој филм ќе го третира како „воен чин“, но дека хакирањето е „праведно дело“.

Од „Sony Pictures Entertainment“, каде што по нападот дојде до криза во компанијата, во средата одлучија да го откажат прикажувањето на сатиричната комедија „Интервју“ за убиството на Ким, откако досега непозната хакерска група се закани со нови напади. „Ви препорачуваме да се држите подалеку од тие места во времето на прикажувањето“, порачаа хакерите.

Од „Sony“ претходно седмицава не ги коментираа заканите. Претставници на корпорацијата „Sony Pictures Entertainmen“ претходно соопштија дека нема да го повлекуваат филмот од дистрибуција, но додадоа дека „нема да се противат“ доколку сопствениците на кината го откажат прикажувањето на филмот. Компанијата „Carmike Cinemas“, којашто управува со 278 кина во 41 американска сојузна држава, објави дека нема да го прикажува филмот. Полициските управи на Лос Анџелес и Њујорк соопштија дека заканите се сфатени сериозно.

Технолошкиот гигант го претрпе најголемиот корпоративен напад за кој се знае во медиумите. Ограбени беа огромни количества податоци, меѓу кои и сценарија за најавени филмови а досега се знае дека е украдена првичната верзија за новиот филм со Џејмс Бонд кој веќе се снима и чија премиера се очекува во ноември 2015 година./крај/мф/сн

Извор: Макфакс