Македонија
(Видео) Скапароти-Шекеринска: Македонија сигурен партнер и иден сојузник на НАТО
Со нетрпение очекувам да станете 30. членка на НАТО, истакна командантот на Врховната команда на НАТО и командант на американските сили во Европа, генерал Куртис Скапароти, кој денеска престојуваше во Скопје.
Во рамките на посетата тој оствари средба со министерката за одбрана, Радмила Шекеринска, при што двете страни искажаа задоволство од меѓусебната соработка и го истакнаа уверувањето дека по поканата за членство и по успешното завршување на пристапните разговори, Македонија ќе стане полноправна членка на НАТО. Членството на Македонија во НАТО ќе ја зајакне безбедноста во регионот, ќе го забрза натамошниот развој на земјата и ќе ѝ донесе нов партнер на алијансата во борбата за зачувувањето на глобалниот мир и развој, беше заклучено во разговорите.
Шекеринска го информира генералот Скапароти за преземените реформи и за напорите да се забрзаат евро-атлантските интеграции на Македонија. Во тој контекст министерката истакна дека по добивањето на поканата од НАТО и по постигнатиот договор со Грција, наш прв приоритет останува целосната имплементација и финиширањето на процедурата за полноправно членство. „Мнозинството граѓани се свесни за историската можност и дека таа не треба да се пропушти“, рече министерката Шекеринска.
Министерката за одбрана и високиот гостин разговараа и за плановите за реформи во одбраната и нејзината модернизација во согласност со насоките од неодамна донесениот стратегиски одбранбен преглед, како и за продлабочување на техничката соработка со цел да се унапредат капацитетите на АРМ во функција на идното полноправно членство и натамошно учество во мировните мисии.
Шекеринска нагласи дека Македонија направи голем напредок во развојот на вооружените сили притоа давајќи му поддршка на НАТО во напорите за воспоставување мир и демократија во светот. „Како идна членка на НАТО, од почетокот на оваа година го зголемивме дваесет проценти македонскиот контингент во мисијата ’Одлучна поддршка’, до крајот на годината испраќаме поддршка за изборите во Авганистан, но и дополнително зголемување на нашите трупи. Исклучително сум задоволна што на дел од македонскиот контингент му е доверена исклучително одговорна задача – заштита на командата на мисијата во Кабул“, рече министерката.
Генералот Скапароти истакна дека ги цени напорите на министерката и на Владата на полето на одбранбената соработка, како и учеството во меѓународните мисии, и истакна дека НАТО и Соединетите Американски Држави и натаму остануваат силен поддржувач на нашата земја. „Подготвени сме да ви помогнеме да станете 30-та земја членка на НАТО“, рече Скапароти.
Дел од програмата беше и посета на касарната „Илинден“, каде што пред високиот гостин беа изведени показни вежби од страна на припадниците на Полкот за специјални операции. По средбата и по демонстрацијата на армиските капацитети, министерката за одбрана, Шекеринска, во изјава за медиумите истакна дека денешната посета и соработката покажуваат колку работите во Македонија се менуваат по 11 јули кога Македонија ја доби поканата за почеток на пристапните разговори во НАТО.
„Само две недели по добивање на НАТО-поканата, на 26 јули тим на алијансата ја посети Македонија со цел да се утврдат насоките за пристапните разговори за членство. Пет дена подоцна, на 1 август, северноатлантскиот совет во Брисел и формално го усвои планот за спроведување на пристапните разговори со Македонија“, рече министерката Шекеринска.
Генералот Скапароти кажа пофални зборови за прикажаните воени вештини за кои, рече тој, видливо ги користат НАТО-стандардите и НАТО-процедурите и додаде дека сето она што Македонија го прави во Авганистан високо е вреднувано од страна на алијансата. Генералот посочи дека преку долгогодишното партнерство со НАТО постигнат е значаен напредок во воените реформи и воената интероперабилност со сојузниците и понуди практична поддршка на воените авторитети во процесот на пристапување.
„НАТО ја споделува вашата посветеност на демократијата, владеењето на правото, како и безбедноста и стабилноста во регионот. Вашата постојана поддршка е важна не само за целиот Западен Балкан туку и за цела Европа“, рече Скапароти во изјавата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).
Македонија
Сиљановска Давкова – Павловски: Максимално да се искористат сите можности за економски развој на земјава
Претседателката Гордана Сиљановска Давкова остварила средба со Крис Павловски, директор на водечката светска компанија за дигитални платформи Рамбл, кој е во посета на земјата во рамките на конференцијата Македонија 2025.
На средбата, како што соопшти претседателскиот кабинет, Павловски ја претставил работата на Рамбл, компанија која котира на индексот Наздак на берзата во Њујорк, со нејзината етаблирана видео платформа и е во подем во дејноста на развојот на дигиталната инфраструктура и клауд услугите.
Како водечки претприемач со македонско потекло, Павловски изнел мислења за состојбата во дигиталниот сектор, за трендовите и перспективите кои може да се искористат.
Претседателката Сиљановска Давкова го информирала Павловски за нејзината иницијатива за развивање на соработката со македонската дијаспора, со цел максимално да се искористат сите можности за економски развој на земјава.