Седумтемина македонски државјани кои како странски терористички борци беа приведени на скопскиот аеродром одамна им биле познати на безбедносните служби. Уште во 2015 имало издадено наредба за притвор, а по петмина од нив била распишана и црвена потерница од Интерпол. Заедничко за сите седуммина е што биле ученици на истиот оџа. Неофицијално, мнозинство се од Скопје, а останатите се од Прилеп, Тетово и Гостивар. По приведувањето, полицијата експресно ги идентификувала дека токму тие се лицата кои се гонат за учество во странска војска, полиција, паравоени или параполициски формации.

Македонија има капацитет да се справи со повратниците кои се враќаат од боиштата во Сирија и Ирак, а преземањето на заробените џихадисти е токму во насока на зголемување на контролата, брифираат извори од безбедносните служби.

Според нивни проценки, има уште 15-тина лица од Македонија кои сè уште се активни борци на ИСИС. Повратници има 83, а од нив на слобода се 57 лица, за кои властите уверуваат дека редовно ги следат нивните активности и според сегашните проценки нема индиции за можно терористичко загрозување на безбедноста. Вкупниот број лица од Македонија кои се појавиле на боиштата како активни борци, повратници, загинати, жени или само како обиди за заминување, изнесува 156. Меѓу нив има 9 жени, 35 се загинати, 23 се веќе во затвор, а тројца се во затвор во Турција.

Безбедносните служби смируваат дека опаѓа бројот на македонски државјани кои заминуваат да војуваат на Блискиот Исток, особено по 2014 кога со измените на Кривичниот законик може да се гонат лицата за учество во странски војски. Дополнително, од МВР информираат дека се спроведуваат програми за дерадикализација на странските терористички борци во затворите, се преземаат активности за зголемување на свесноста за ризикот и заканите од тероризмот и се зајакнуваат механизмите за превенција од радикализација на локално ниво, согласно со Националните стратегии за спречување насилен екстремизам и борба против тероризмот.