Македонија
„Патот до Брисел преку Охрид“ – се одбележуваат 17 години од Рамковниот договор

Денеска со почеток во 12 часот во просториите на Клубот на пратениците, Секретаријатот за европски прашања организира одбележување по повод 17 години од потпишувањето на Охридскиот рамковен договор.
Денес, Република Македонија е исправена пред еден од најважните предизвици во својата понова историја – да ја комплетира својата надворешна интеграција. Во оваа насока традиционалното одбележување на оваа годишнина ќе биде ставено во контекст на денешните предизвици, преку соодветен тематски панел, на тема: „Патот до Брисел преку Охрид“. Преку овој панел ќе се обидеме да создадеме врска помеѓу Охрид, како симбол на внатрешната интеграција, и Брисел, кој ја симболизира нашата надворешна интеграција, т.е. нашата аспирација за полноправно членство во НАТО и Европската Унија, се вели во најавата за настанот.
На панелот, покрај премиерот Зоран Заев и претседателот на Демократската унија за интеграција, Али Ахмети, како специјални гости ќе говорат сер Барни Вајт Спунер (sir. Barney White-Spunner), поранешен генерал на Британската армија и поранешниот командант на НАТО во земјава, за време на потпишувањето на рамковниот договор. Спунер е долги години присутен на Балканот во веројатно најтурбулентниот период на регионот.
Специјален гостин на панелот ќе биде и поранешната заменичка на помошникот секретар за одбрана на САД, задолжена за Европа и Азија во администрацијата на Обама, меѓу другото, одговорна и за политика на САД кон Балканот, Евелин Фаркаш. Евелин е денес виш член на Атлантскиот совет, постојан аналитичар за национална безбедност за најголемата медиумска куќа во САД – NBC/MSNBC и претставува исклучителен политички авторитет, американски аналитичар и контрибутор и во бројни други американски и светски медиуми како што се CNN, FOX, Politico, Foreign Affairs итн.
На панелот свое учество ќе земе и Дафина Јовановска – Стојановска, пратеник во Собранието како претставник на опозициската партија ВМРО-ДПМНЕ, партија, потписник на Охридскиот рамковен договор. Говорниците низ темата на панелот „Патот до Брисел преку Охрид“ ќе ги води домаќинот – заменик претседателот на Владата, задолжен за европски прашања Бујар Османи, кој од неодамна е и главен преговарач со Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се навршуваат 24 години од загинувањето на бранителите кои нагазнаа на мина кај Љуботенски бачила

На повеќе локации во Скопје денеска ќе бидат одбележани 24 години од загинувањето на осуммината бранители, припадници на резервниот состав на Армијата кои загинаа во 2001 година кај месноста Љуботенски бачила.
Делегација од Министерството за одбрана и Генералштабот на Армијата предводена од директорот на Генералштабот, бригаден генерал Орце Јордев ќе положи венци со свежо цвеќе пред спомен обележјето на паднатиот бранител Томислав Настевски во Општина Ѓорче Петров, споменикот на паднатите бранители во село Волково, споменик на загинати бранители во село Љубанци и спомен-плоча во касарната „Илинден“.
Делегација на Собранието во состав на пратеничките Емилија Ангелова и Каролина Насковска, ќе положи свежо цвеќе пред спомен-обележјето поставено во чест на загинатите бранители во село Љубанци.
Општина Ѓорче Петров организира оддавање почит пред спомен-чешмата на Томислав Настески – Бумбар, во урбана заедница Мирче Ацев (ул. „Ѓорче Петров“) додека централна комеморативна манифестација ќе биде пред споменикот на загинатите бранители во Волково.
На 10 август 2001 година со воено товарно возило на патот кон месноста Љуботенски Бачила при активирање на мина животот го загубија осум припадници на резервниот состав на Армијата: Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски. На овој ден се оддава почит и на Ацо Ангеловски кој во 2000 година загина во Арачиново при вооружен напад врз полициска патрола.
Македонија
Летните одмори направија редици на Табановце

Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, на ГП Табановце времето на чекање за влез во државата е околу еден час, на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Внимавајте на сонце, денес многу топло со температури до 39 степени

Времето денеска ќе биде сончево и многу топло. Ќе дува слаб до умерен ветер од источен и североисточен правец.
Минималната температура ќе биде во интервал од 12 до 21, а максималната ќе достигне од 32 до 39 степени.
Во Скопје, сончево и многу топло со слаб до умерен променлив ветер.
Минималната температура ќе се спушти до 19, а максималната ќе достигне до 39 степени.
Под влијание на многу топла воздушна маса од југ во текот на наредната седмица времето ќе биде претежно сончево и многу топло.
Дневната температура насекаде ќе биде над 30 степени, а наместа ќе достигне и 40 степени.