Двегодишно дете од Индонезија пуши 40 цигари дневно и станува агресивно ако не ги добие. Рапи Ананда Памунгкас почнал да ги зема догорчињата од својата мајка, а постарите деца од соседството му ги палеле сметајќи дека е забавно.

Детето набрзо станало зависник, а на неговите родители ситуацијата им била смешна, па почнале да му купуваат цигари и да му допуштаат да ги пуши во комбинација со кафе.

„Мојот Рапи навикна да пуши додека пие кафе и јаде торта. Сега веќе два месеца пуши по две кутии дневно. Ако не му дадам цигара, едноставно полудува“, раскажува неговата мајка, која има 30 години.

„Без цигара не може да заспие, постојано плаче. Цигарите се скапи, но мораме да му ги купуваме бидејќи пуши по цели денови“, додава таа.

Ни таткото на детето не одбива кога двегодишникот ќе му побара цигара.

„Не можам да му кажам ‘не’. Јас дури и не пушам дома, само на работа, но Рапи сака да пие кафе и да пуши цигари“, раскажува таткото, додавајќи дека дошло време да посетат доктор и да почнат да го одвикнуваат двегодишното дете од цигарите со стручна помош.