Русија и САД ќе ги продолжат разговорите за Сирија на 18-ти декември во Њујорк, соопштија шефовите на дипломатиите на двете земји по средбата во вторникот во Москва, која е оценета како плодна по редица меѓународни прашања, а особено во врска со сириската криза во која Москва и Вашингтон поддржуваат спротиставени страни, но се согласни дека Сирија мора да остане суверена унитарна држава за да се избегне натамошна дестабилизација на регионот, и согласни се дека мора да биде уништена терористичката организација Исламска држава, оценуваат агенциите, истакнувајќи ја неочекуваната изјава на Џон Кери во врска со судбината на сирискиот претседател Башар ал-Асад.

Главната тема на посетата на американскиот државен секретар Џон Кери на Москва, во чии рамки имаше разговори со својот руски колега Сергеј Лавров и потоа заеднички со рускиот претседател Владимир Путин, очекувано беше сириската криза и подобрата координација во борбата против тероризмот.Како што рече за новинарите Кери по средбата со претседателот Путин, САД се подготвени да соработуваат за Русија во борбата со терористичката група Исламска држава. Притоа американскиот државен секретар изненади со изјавата дека САД и нивните партнери во моментов не инсистираат на смената на режимот на сирискиот претседател Башар ал-Асад, забележува агенцијата РИА.Не била заобиколена ниту темата за украинската криза, во која Москва и Вашингтон, исто така, имаат остро спротивставени позиции, како и прашањето за санкциите на ЕУ и САД во контекстот на исполнувањето на мировниот договор за Украина од Минск. Истовремено, Кери укажа и дека САД не спроведуваат политика на меѓународна изолација на Русија, за какви обиди од Кремљ обвинуваа претходно.Медиумите истакнуваат дека поранешната средба на Кери и Лавров со Путин во Сочи пред седум месеци наместо најавените 90 минути траела четири часа и минал претежно во неформална атмосфера, додека вторничната во Крем траела еден час помалку. Се прави уште една паралела, дека на претходната средба централната тема била украинската криза, додека сегашната била фокусирана на изнаоѓање решени се сириската, подобрата координација во борбата со тероризмот, како и билатералните односи, пишува Reuters.На почетокот на средбата во Кремљ, Путин истакнал дека Русија и САД бараат разрешување на најсложените кризи, како и дека од Лавров бил детално информиран за предлозите на Вашингтон и за „неколку прашања за кои се потребни натамошни разговори“. Кери, пак, од своја страна истакнал дека разговорите за сириската криза „отворила цела низа нови можности“, како и дека двете земји можат да сторат многу во тој контекст.По завршувањето на средбата во трилатерален формат, Кери и Лавров на заедничката прес-конференција истакнаа дека разговорите биле „конкретни и суштински“, дека е неопходно да се оствари напредок во решавањето на кризата во Сирија, како и дека Москва и Вашингтон мора да продолжат заеднички да бараат решени на состанокот на Меѓународната група за поддршка на Сирија, којашто ќе се одржи во петок во Њујорк.Како што истакна Кери, од ефикасноста на заедничкиот ангажман на двете земји имаат полза и Русија и САД, но и целата меѓународна заедница, и оттаму Вашингтон е подготвен да соработува со Москва во борбата против Исламската држава. „Нема сомневање дека кога САД и Русија заеднички работат ефикасни, тоа е во корист и на двете страни, како и на меѓународната заедница“, рече американскиот државен секретар, илустрирајќи го тоа со постигнувањето на договорот за иранската нуклеарна програма.„Нашата средба главно беше фокусирана на Сирија, борбата против тероризмот и на Украина. Уште еднаш му потврдив на претседателот Путин дека САД се подготвени да работат со Русија во борбата со Исламската дражва“, рече Кери.Притоа американскиот државен секретар истакна дека Москва и Вашингтон ги приближиле позициите по сложените прашања во врска со Сирија.„Најдовме некои области на согласност, и разговаравме за комплексноста на класификацијата на терористичките групи. Во овој момент не можам да зборувам за тоа, за што се договоривме на билатерална основа, бидејќи како што кажа Лавров, целата група (за поддршка на Сирија) треба да учествува во таа дискусија и оти е важно сите да придонесат во решенијата… Но ние ги доближивме позициите, во поглед на овие предизвици, и како со нив да се справиме. Безусловно согласни сме дека Исламската држава и Џебхат ан-Нусра (сириското крило на Ал Каеда – з.р.) се надвор од тој процес (преговорите за политичката транзиција во Сирија – з.р.). За тоа сите се согласни“, рече Кери.Истакна дека, покрај другото, била договорена и размена на податоците меѓу САД и Русија за областите на спроведување на операциите против терористичките операции во Сирија. „Зборувавме за тоа во кои области ние и Русите ги изведуваме операциите и оти за да ја осигуриме безбедноста на нашите војници, потребно е да се знае кој каде дејствува“, додаде Кери на прес-конференцијата со Лавров, доцна ноќта во вторникот.Лавров повтори дека двете страни се договориле за следните чекори кои ќе помогнат борбата против тероризмот да биде подобро координирана. „Ги потврдивме договорите меѓу војските на САД и на Русија, и договориме тие да се прошират на коалицијата предводена од Вашингтон, која дејствува против Исламската држава. И во практична смисла договоривме некои натамошни чекори кои ќе помогнат нашите паралелни дејствувања да бидат подобро координирани и поефикасни“, додаде шефот на руската дипломатија.Кери рече дека за време на разговорите во Москва ја изложил американската позиција за неможноста во иднина сирискиот претседател Башар ал-Асад да остане на власт, но според него на овие разговори двете страни биле концентрирани „не на разликите во врска со Сирија, вклучително и за Асад, туку како да се придвижи политичкото решение“ на кризата.Притоа Кери изненади со изјавата дека САД и нивните партнери во моментов не се стремат кон промена на режимот во Сирија. „САД и нашите партнери не бараат промена на ткн режим во Сирија. Рековме дека не сметаме оти Асад има шанси да биде челник и во иднина, но сега не сме фокусирани на нашите разлики“, рече. Кери се заложи за неопходноста од интензивирањето на политичкото решени во Сирија. „Денеска многу детално ги разгледавме потребите од зајакнување на напорите во овој процес, заедно со ОН“, дополни.Американскиот државен секретар пред новинарите изјави дека на средбата со рускиот колега ја изразил загриженоста на Вашингтон во врска со наводните руски воздушни удари по позициите на сириската вооружена опозиција која САД и сојузниците ја сметаат за умерена. Според Кери, рускиот претседател Путин е запознаен со овие податоци.Било разговарано и за претстојната средба во Њујорк, при што Лавров истакна дека Москва и Вашингтон сметаат дека е неопходно да се потврдат договорите од Виена. „Се договори да продолжи работата за терористичките закани и за организирање на преговорите меѓу владата и опозицијата, и сметаме дека во оваа фаза е потребно да се потврдат договорите од Виена од 30-ти октомври и од 14-ти ноември“, рече првиот руски дипломат. Според него, тоа ќе биде сторено во форма на резолуција на Советот за безбедност при ОН, чиј нацрт ќе биде разработен во петок во Њујорк.Лавров притоа истакна дека на средбата во Њујорк, Русија очекува подетални информации за иницијативата на Саудиска Арабија објавена во понеделникот за нова коалиција на 34 исламски држава за борба против тероризмот, како и за средбата на групата „Пријатели на Сирија“ во Париз. Зборувајќи за борбата против тероризмот, тој истакна дека Москва претпочита колективен формат, кој ќе ги вклучи сите фактори и одобренија од ОН.Кога станува збор за уште една тема којашто придонесе за најголемата криза во односите на САД и Русија уште од завршувањето на идеолошката блоковска Студена војна, односно кризата во Украина, Кери повтори дека колку поскоро ќе биде реализиран договорот од Минск, толку порано ќе бидат симнати санкциите на ЕУ и САД против Русија воведени пред речиси 18 месеци. Притоа укажа дека одговорноста за исполнувањето на минскиот договор лежи на сите страни инволвирани во конфликтот во Украина.„Сметаме дека секоја страна треба да ги изврши обврските преземени со договорот од Минск. Знаеме дека има уште многу работа“, додаде Кери. Во врска со истото прашање, Лавров рече дека Русија и САД ќе ги искористат сите своите можности и влијанија за решавање на украинската криза. „И Русија и САД во развојот на договорот, кој беше постигнат меѓу претседателите Путин и Обама, ги подржуваат минските договори и Нормандискиот формат (Украина, Русија, Франција и Германија – з.р.). и ќе ги искористат сите свои можности за целосна имплементација на договореното“, додаде.Кери кон крајот на заедничката прес-конференција укажа дека во рамките на вторничните разговори во Москва истакнал дека Вашингтон не сака да спроведува политика на меѓународна изолација на Русија. „Немаме такви политики, чијашто цел би била да се изолира Русија. Секогаш говоревме дека кога САД и Русија имаат договор, тоа е во интерес на целиот свет. Сметам дека тоа е демонстрација на зрелоста на двајцата челници (претседателите Обама и Путин –з.р.) и важноста на нивните улоги“, рече државниот секретар на САД.Медиумите притоа забележуваат дека темата на „изолацијата“ на Русија при посетата на Кери на Москва не била начната случајно, имајќи предвид дека во пресрет на оваа посета руското министерство објави соопштение дека од Вашингтон во пресрет на посетата на државниот секретар „може да се слушне за некаква изолација на Русија на меѓународнта сцена“./крај/мф/сн

Извор: Макфакс