Македонија
„Зелена алтернатива“: ЛДП си прави маркетинг со заложбата за декриминализација на канабисот

Граѓанското здружение „Зелена алтернатива“ реагира по објавата на Либерално-демократската партија дека ја поддржува декриминализацијата на канабисот бидејќи од Здружението сметаат дека тие не се сериозни во намерата да помогнат во законската регулатива, кокетираат со јавноста, а на тој начин си поигруваат со чувствата на болните и сите оние на кои им се потребни лековитите својства на оваа билка и секојдневно очекуваат да се озакони нејзиното користење. Тие во своето отворено писмо до лидерот на ЛДП, Горан Милевски, велат дека иако партијата потенцира дека го консултирала невладиниот сектор, од нив не е побарано мислење иако имаат петгодишно искуство на оваа тема.
„Поттикнати од постот за легализација на марихуаната на фејсбук-страницата на вашата партија, во кој наведувате дека како партија се залагате за легализација на марихуаната, како и нејзино слободно користење на утврдени јавни простори и одгледување за свои потреби, се чувствуваме принудени да ви се обратиме директно вам, како претседател на Вашата партија. ‘Зелена алтернатива’ е граѓанско здружение коешто пред своето официјално основање, функционираше неколку години неофицијално на терен, работејќи директно со болни лица, помагајќи им да научат како сами да го дозираат канабисот и неговите екстракти спрема своите потреби и работеше на ширењето на знаењето за канабисот и неговите лековити својства, како и придобивките од истиот во полето на индустријата, екологијата и другите намени на ова благородно растение. По неколку години, во септември 2014 год. и официјално се формираше ‘Зелена алтернатива’, непрофитна организација, формирана како здружение на граѓани со избран претседател, Филип Достовски. Целта на оформувањето на ‘Зелена алтернатива’ беше да се продолжи со работата на терен, но истовремено да се почне и официјална соработка со странски и македонски институции со цел да се поттикне стручната и професионалната јавност да направи позитивни промени во областа на канабисот и здравјето на луѓето преку организирање советувања, семинари, дебати и јавни настани и со истото да се вклучи и граѓанскиот сектор во процесот на креирање и промовирање нови здравствени трендови во Македонија“, пишува во реакцијата на „Зелена алтернатива“ .
Тие ја потесетуваат јавноста дека досега здружението самостојно организирало пет семинари, главно на тема „Демистификација на канабисот” и една јавна дебата „Коноп: 1000 зошто, 1001 затоа” на кои можеле да се чујат предавања од еминетни странски научници и доктори на тема канабис.
„ На овие настани се овозможи директна комуникација, советувања и размена на мислења помеѓу јавноста и предавачите. Во септември 2016 година, во соработка со Македонската агенција за лекови ‘Малмед’ и со Министерството за здравство, здружението ‘Зелена алтернатива’ го организираше и симпозиумот на тема: ‘Легализација на медицинскиот канабис во Македонија’, кој воедно и претставуваше обука за македонските доктори за тоа што е канабис, што се екстракти од канабис и како се користат во медицината. Како гости на досегашните настани организирани од ‘Зелена алтернатива’ се наоѓаат бројни еминентни научници и доктори, врвни експерти од областа на канабисот, како човекот кој првпат стандардизирал канабис екстракт во светот специфичен за третирање на одреден вид болести д-р Пол Хорнби – Канада, молекуларниот биолог и специјалист за канцер д-р Роберт Џ. Меламед –САД, откривачот на анандамидот и еден од откривачите на ендоканабиноидниот систем д-р Лумир Ондреј Хануш – Израел, еден од водечките доктори на клиничките студии за Sativex и автор на многу наулни студии и трудови д-р Итан Русо – САД, докторот по фармакологија и специјалист за етноботанички растенија д-р Хозе Карлос Боусо – Шпанија, како и лекарите практичари кои директно работат со пациенти, д-р Џек Д. МекКју – САД, д-р Хавиер Педраза – Шпанија, д-р Илија Резник – Израел, д-р Јонас Вандерзван – Канада, стручњакот за меѓународно право и регулацијата на дрогите и контролираните супстанци, поранешен шеф на оделот за контрола на дроги при Обединетите нации (UNODC) Павел Пахта – Чешка, меѓу многу други. Покрај научниците и доктори, на семинарите и настаните организирани од ‘Зелена алтернатива’ учествуваа и бројни активисти за канабисот од светот и Балканот, меѓу кои и еден од најпознатите активисти од областа на канабисот и пропонент на медицинскиот канабис, Рик Симпсон, како и останати активисти од Словенија, Хрватска и Србија.“
Како една од последните активности на здружението „Зелена алтернатива” бил организирн настанот „Вечерно училиште со Зелена алтернатива” а на овој настан присутните лица, лица на кои им е потребен канабисот и оние кои сакаат да го користат, имале можност да научат како да одгледаат канабис за свои лични потреби и како со истиот понатаму да произведат екстракти за своја лична употреба, како и дозирањето на истите спрема своите потреби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: СДСМ грубо ја злоупотребува трагедијата во Кочани за политички поени

ВМРО-ДПМНЕ денеска реагираше на обвинувањата од страна на СДСМ во врска со истрагата за трагичниот пожар во Кочани, при што загинаа деца, обвинувајќи ја партијата дека прави „груба злоупотреба“ на трагедијата со цел собирање политички поени.
„СДС прави груба злоупотреба на трагедијата во Кочани со цел да добие политички поен плус. Обвинувањата на СДС дека институциите постапуваат под притисок на опозицијата се безочна лага,“ велат од ВМРО-ДПМНЕ во писмената реакција.
Од партијата нагласуваат дека институциите сега постапуваат професионално и неселективно, и дека во истрагата се опфатени над 60 лица, меѓу кои актуелни и поранешни функционери, градоначалници, бизнисмени, вработени во институции и членови на Министерството за внатрешни работи, а дел од нив се веќе во притвор.
„МВР и институциите на системот ги доставија сите потребни докази и информации до Јавното обвинителство уште пред еден месец. Обемната документација, со над 60 опфатени лица, е доказ за темелна и сеопфатна постапка“, стои во соопштението.
Од ВМРО-ДПМНЕ посочуваат дека постапувањето на институциите денес е спротивно на тоа што, според нив, се случувало во минатото за време на владеењето на СДСМ и Оливер Спасовски.
„Сега има одговорност за секој, без разлика кој е и од каде е. За разлика од МВР под Спасовски, каде што никој не одговараше за модуларната болница, Беса Транс или Ласкарци – случаи каде што имаше голем број жртви“, додаваат од ВМРО-ДПМНЕ.
Скопје
Арсовска: Претседателката на „Комунална“ е осудена за убиство и 3 години саботира нова опрема

Градоначалничката на Скопје, Данела Арсовска, денеска остро ја обвини Јулијана Спировска, претседателка на Управниот одбор на ЈП „Комунална хигиена“, дека ја саботира работата на претпријатието и со години опструира одлуки од витално значење за функционирањето на службите за одржување на јавната чистота.
Во своја објава на Фејсбук, Арсовска посочи дека Спировска е осудено лице за кривично дело убиство и дека, како што тврди, три години не поддржала ниту една инвестиција за нова механизација, ниту решенија за вработување на работниците кои со години работат на терен.
„Јулијана е осуден криминалец со казна затвор за убиство. Таа три години не гласа за нови камиони, за инвестициска програма, за вработените кои пет години ги чистат улиците да можат да земат решение“, напиша Арсовска.
Според неа, Спировска делува под директива на политичките партии ВМРО-ДПМНЕ и Вреди, чиј што кадар е поставен во Управниот одбор преку Советот на Градот. Арсовска директно ги обвинува овие партии дека преку Спировска ја саботираат работата на претпријатието и придонесуваат за влошување на состојбата со отпадот во Скопје.
„Јулијана по наредба на ВМРО континуирано прави опструкции додека градот не се удави во смет. Не биди ѓубре, не биди криминалец, не биди Јулијана“, додаде Арсовска.
Таа истакна дека вработените во „Комунална хигиена“ се едни од највредните работници во градот и дека заслужуваат институционална поддршка, а не, како што вели, саботажа од партиски кадри.
Македонија
Левица: Владата троши 450.000 евра за луксуз, додека гласа против минимална плата од 500 евра

Додека граѓаните се соочуваат со секојдневни ценовни шокови, Владата предводена од ДПМНЕ троши стотици илјади евра за морски плодови и хотелско сместување, обвини денеска политичката партија Левица. Од партијата велат дека ова се случува паралелно со одбивањето на нивниот предлог за зголемување на минималната плата на 500 евра.
„Очигледно, за расипничката власт на ДПМНЕ има пари само за нивните луксузни апетити, но не и за работниците кои едвај врзуваат крај со крај“, соопштува Левица.
Според податоците кои ги објавија од партијата, владината Служба за општи и заеднички работи во мај склучила два тендери со вкупна вредност од 450.000 евра. Првиот договор, вреден 11,8 милиони денари, се однесува на набавка на риба, месо и сувомеснати производи, додека вториот – во износ од 16,5 милиони денари – се однесува на хотелско сместување за владините функционери.
„Се работи за јасен пример на лицемерие и двојни стандарди. Власта гласаше против предлогот за минимална плата, кој го поднесовме по барање на синдикатите, а во исто време склучува договори за луксузни вечери и хотели“, изјавуваат од Левица.
Од партијата додаваат дека власта не служи на граѓаните, туку на „крупниот капитал и блиски бизнис-центри“, додека реалната економска состојба е далеку од она што, според нив, „скапата ПР-машина“ на Владата се обидува да го прикаже.
„Македонија не е економска сила, туку земја во која работниците гладуваат, младите се иселуваат, а функционерите се гоштеваат со морски плодови за сметка на народот“, порачуваат од Левица.