Асоцијацијата „Исток“ е единствена асоцијација на превозници која обединува 90 отсто од легитимните превозници во земјата. Ние со години се бориме за правата на превозниците и работиме на решавање на проблемите поврзани со превозот, изјави претседателот на асоцијацијата, Горан Трпковски, во пресрет на измените на Законот за превоз во патниот сообраќај.

Еден од долгогодишните проблеми со кои се соочуваа превозниците е секако превозот на учениците и тендерите што ги распишуваа училиштата, вели Трпковски и додаде дека асоцијацијата ги поздравува измените и дополнувањате на Законот за превоз во патниот сообраќај, со кои на нов начин се уредува превозот на учениците, и тоа со постојните општински и меѓуопштински линии.

„Убеден сум дека овој начин на организирање на превозот на учениците најпрвин е економски оправдан и ќе ги намали огромните трошоци што досега го оштетуваа буџетот, а воедно ќе им се овозможи поголема достапност на учениците со мрежата на одобрени линии. Во името на нашите членки и сите превозници, уште еднаш ги поздравувам измените на Законот за превоз во патниот сообраќај за кои сум убеден дека се идеално и долгоочекувано решение за превозот на учениците“, изјави Трпковски.

Истовремено, тој вели дека ја користи оваа шанса и да упати апел до највисоките надлежни институции да се преземат мерки за сузбивање на нелегитимната конкуренција таканаречена диви превозници од причина што овој проблем, како што посочува, не го засега само приватниот сектор, туку и јавниот интерес ако се имаат предвид штетните последици врз буџетот, кој на годишно ниво изнесува околу 600.000.000 денари.