Македонија
Никола Саздовски бил убиен на свиреп и безмилосен начин, поднесено обвинение за убиство против две лица

Основното јавно обвинителство Скопје поднесе обвинение со предлог за продолжување на мерката притвор против две лица за убиството на Никола Саздовски.
На обвинетите им се става на товар дека заеднички и на свиреп начин го убиле Саздовски. Убиството се случи на 29 јуни на автобуска постојка во Автокоманда.
„Обвинетите на 29 јуни околу 17.45 часот на булеварот Александар Македонски во Скопје, на автобуската постојка пред фабриката ‘Алкалоид’, му пристапиле на оштетениот и му побарале лична карта. Кога оштетениот им ја покажал личната карта, обвинетите неочекувано започнале заедно истовремено да го удираат со боксови во пределот на главата и градите. Од силните удари оштетениот загубил рамнотежа, паднал на тротоарот, по што обвинетите без милост, истовремено и со силни удари продолжиле со клоци да го удираат по главата и градите“, се наведува во обвинението.
Од ударите Никола добил тешки телесни повреди и западнал во коматозна состојба. Тој бил пренесен на Ургентниот центар при Клиничкиот центар „Мајка Тереза“. Истиот ден бил пренесен во Универзитетската клиника за трауматологија, ортопедски болести, анестезија, реанимација и интензивно лекување, каде што на 9 јули починал, а лекарите констатирале мозочна смрт.
Поради опасност од бегство и оправдан страв дека може да влијаат на сведоците, обвинител предложи на двете обвинети лица да им биде продолжен притворот. Од Обвинителството наведуваат дека во текот на истражната постапка обвинетите биле испитани и дале своја одбрана.
Против третото осомничено лице, за кое Обвинителството исто така водеше истражна постапка за истото кривично дело како соизвршител заедно со двајцата сега обвинети, е прекината истражната постапка. „Со оглед на тоа што третоосомничениот сè уште им е недостапен на државните органи, за ова лице за кое е распишана домашна и меѓународна потерница истражната постапка ќе продолжи во моментот кога ќе им биде достапно на државните органи“, велат од Обвинителството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Вреди“: ДУИ има синдром на напуштена љубовница

Како пулени на СДСМ, ова изгубено раководство на ДУИ очигледно не може да преболи што и Венко Филипче ги пушта низ вода. Откако секојдневно се координираа како политички да профитираат од колективната трагедија во Кочани, сега Бујар Османи, како лице задолжено за контакт со СДСМ, емоционално изневерен што плановите им се разоткриени, повторно ја заврти истата бајата грамофонска плоча, велат од коалицијата „Вреди“.
„Наместо да ја прозиваат коалицијата Влен, ние уште еднаш ги повикуваме да престанат да шират лаги и манипулации со цел да ги оправдаат плановите за бојкот на локалните избори како обид да предизвикаат политичка криза. Конечно, треба да разберат дека токму заради нивното криминално владеење ВМРО-ДПМНЕ освои 58 пратеници на ланските парламентарни избори. Не постојат ниту јавни, ниту тајни планови за отстранување на Албанците од било каде. Постои само патолошки страв на ДУИ од правосудна одговорност за нивните поранешни функционери кои со децении се богатеа на грбот на Албанскиот народ, кого јавно го лажеа со големо Албански приказни, а тајно ги полнеа џебовите со криминални дилови со Груевски и Мијалков“, се вели во соопштението.
Како што додаваат, овие анти-албански политики на ДУИ ќе бидат жестоко казнети, бидејќи нашиот народ нема да дозволи некој да ги држи во заложништво само затоа што разгалените фотељаши не се научени да седат во опозиција.
Македонија
Семејствата на жртвите oд модуларната болница повикаа да се обнови истрагата, а германското вештачење да биде клучен доказ

Семејствата на жртвите од пожарот во модуларната болница во Тетово побараа Обвинителството да ја обнови истрагата.
На прес-конференција пред Основниот суд во Тетово истакнаа дека има докази што биле отфрлени од Обвинителството, а се однесуваат за пропусти при изградбата на модуларната болница.
Агрон Арифи, претставник на иницијативата, рече дека и германското вештачење е во таа насока и треба да биде земено како клучен доказ во истрагата.
Бараат формирање независен тим, кој ќе ги испита сите аспекти, меѓу кои и евентуалното одолжување на постапката.
Во стравотниот пожар, кој ја пеплоса модуларната болница во Тетово на 8 септември 2021 година, загинаа 14 лица, од кои 12 пациенти кои се лекуваа од коронавирус и 2 члена на семејства што биле внатре во критичниот момент. Четиринаесет лица беа спасени пред објектот целосно да изгори.
Македонија
Левицата предлага надзорна расправа за катастрофата во Кочани

Пратеникот од Левица, Борислав Крмов, соопшти дека како пратеник од Изборната единица 3, иницирал Надзорна расправа во врска со трагедијата во Кочани со цел, како што рече, да се расветлат сите пропусти.
„Во овие моменти кога сѐ уште не е поминат шокот од незамисливата национална катастрофа која се случи во Кочани, ние како пратеници и како Собрание, посебно пратениците од ИЕ 3, мора да поднесеме и морална одговорност. Поради тоа, денес, јас, како пратеник од ИЕ 3, покренувам иницијатива за Надзорна расправа во Собранието околу катастрофата што ни се случи во Кочани“, кажа пратеникот од Левица.
Додаде дека расправата е планирана во постојаната Анкетна комисија за слободите и правата на граѓанинот со која раководи Димитар Апасиев. Но, рече тој, отворени сме да биде и на било која друга комисија која и одговара на власта и на остатокот од опозицијата.
„За таа цел се потребни се минимум 15 потписи и ние ги даваме нашите шест. Отвараме простор да има и Анкетна комисија, има постојана Анкетна комисија во која може да се одржи расправата, но има и времена Анкетна комисија. Во тој случај ќе се повикаме на член 76 став 3 од Уставот, за која се потребни дваесет потписи и апсолутно, на нас не ни е битно ние да го водиме процесот, поентата е да се почне сега и веднаш за да се дојде до одговорите кои ни се потребни“. објасни Крмов.
За жал, додаде тој, гледаме дека ВМРО-ДПМНЕ и СДСМ се препукуваат во медиумите, околу надзорна или анкетна, дали треба да има, или не, дали и за другите катастрофи, дали за Кочани итн.
„Ние мислиме дека нема време за ова, доволно време одмаравме, треба да се делува што побргу. Мора да се види каде потфрлија органите на државната управа, зошто ни се случи ова што ни се случи и кои индивидуи се одговорни“, потенцираше пратеникот Борислав Крмов.