Повеќе од 500 доктори, медицински сестри и специјализанти ја посетиле Балканската школа на педијатрите, што првпат се одржа во хотелот „Александар палас“ од 12 до 15 септември. Домаќин и организатор на Школата е Здружението на педијатрите на Македонија, односно претседателката на здружението, проф. д-р Аспазија Софијанова. Во три дена учесниците имааа можност да чујат искуства и предавања на врвни доктори од поранешните југословенските земји, но и европски предавачи.

Школата опфаќа повеќе теми од разни аспекти поврзани со педијатријата – од биоетика во педијатријата до генетика и хематоонкологија.

Во разговорот со Софијанова зборувавме за важноста на холистичкиот приод во лекувањето на децата и за сите овие теми што беа опфатени на Школата. Според неа, нема поважна или помалку важна тема кога е во прашање медицинскиот третман на децата, а Школата покажа дека само преку интегрирање и размена на искуства меѓу кадрите од разни медицински гранки поврзани за педијатријата ќе може да се постигнуваат успеси во лекувањата.

„Уште во првата сесија, која предизвика огромен интерес на тема: ‘Биоетика во педијатријата’, каде што ги вклучивме Институтот за психологија, Филозофскиот и Правниот факултет, ја увидовме важноста од темите, како што е психолошкиот и социјалниот момент во педијатријата. Особено се актуелни сурогат-мајчинството и многуте психолошки дилеми низ кои минуваат мајките, па затоа ја увидовме важноста од помошта што мајките може да ја добијат од педијатрите“, вели Софијанова.

Според Софијанова, сите овие научни конференции, научни трудови и средби на професионалците во педијатријата се многу важни во следење на најновите методологии во педијатријата и им помага на педијатрите да стекнат широки познавања што може да ги интегрираат во секојдневната пракса.

Тоа што често родителите за разни здравствени проблеми на децата го консултираат интернет-пребарувачот е голема грешка. Сепак, таа смета дека секој родител би го направил најдоброто за своето дете и, веројатно, треба да се врати довербата во лекарите за да не се случува ваква самоконсултација за дијагнози што може да ги одведат во погрешен правец.

Софијанова најавува дека ќе ја продолжи битката во насока на тоа Македонија да биде врвна во педијатријата.