Македонија
Конференција „Искуствата во пристапните преговори – како треба, а како не треба“

Во просториите на Министерството за надворешни работи во коорганизација со Секретаријатот за европски прашања и Кабинетот на Премиерот, се одржа конференција на тема „Искуствата во пристапните преговори – како треба, а како не треба“ на која воведни обраќања имаа Калинка Габер, државна секретарка во Секретаријатот за европски прашања, и Геновева Руиз Калавера, директорка за Западен Балкан во Генералниот директорат за пристапни преговори и соседска политика, а пред присутните своите искуства и добри практики ги разменија Бојан Маричиќ, главен технички преговарач, Андреј Енгелман, поранешен член на преговарачкиот тим на Република Словенија, Владимир Атељевиќ, член на преговарачкиот тим за Поглавја 30 и 31 од Република Србија и Драгана Марковиќ, советник на главниот преговарач на Црна Гора.
„Имајќи предвид дека Република Македонија влегува во последната фаза од процесот на европска интеграција, односно почнува со подготовките за пристапни преговори, моментот на одржување на оваа конференција не можеше да биде поподобен, имајќи го предвид фактот дека неодамна ги исцртавме контурите на преговарачката структура, но и дека деновиве интензивно се подготвуваме за првиот објаснувачки скрининг за поглавјето 23 кој ќе се одржи идната недела во Брисел“ – потенцираше државната секретарка Габер во воведот од своето обраќање пред присутните.
По усвојувањето на заклучоците на јунскиот Совет на ЕУ, потврдени од Европскиот совет со кои се определува јасна можност за почеток на пристапните преговори во јуни 2019 година, Република Македонија влегува во следната фаза од нашите односи со Европската Унија, а тоа е процесот на скрининг, што воедно претставува логична последица на сите случувања од изминатава година и половина кога Владата покажа конкретни резултати во спроведувањето на реформите и затворањето на отворените внатрешни прашања како внатрешно така и со соседите.
Во овој контекст, Владата ќе остане фокусирана на итните реформски приоритети преточени во План 18, покажувајќи дека има политичка волја и административен капацитет да го задржи реформскиот моментум и да ги убеди земјите членки на ЕУ, особено оние кои имаат одредени резерви, дека во јуни 2019 година заслужуваме датум за почеток на пристапните преговори.
„Eропската интеграција е стратешка цел на земјата уште од времето на нејзиното осамостојување. Тоа е цел што е безусловно поддржана од сите политички партии, сите општествени чинители и што е најважно од граѓаните на Македонија – со еден збор членството во ЕУ е најјакиот кохезивен фактор и главна движечка сила која нè обединува по сите основи што за една мултиетничка и мултиконфесионална земја, со специфична географска местоположба, е повеќе од политичка флоскула – истакна Габер.
Европските интеграции не се магично стапче. Тие не се нашата панацеа. Апсолутно сме свесни дека мораме да продолжиме да работиме на состојбата на нашата демократија и владеењето на правото, борбата против корупцијата, но и економската и социјална благосостојба. Но, пристапните преговори ни даваат смисла и цел. Затоа ни требаат – заради тоа што на тој начин реформите ќе бидат канализирани низ јасен и прецизно дефиниран процес на таргети, контрола и испорака. Преговорите ќе бидат своевидно признание за нашата зрелост – како за внатрешните постигнувања на реформската агенда, така и за значајните достигнувања на нашата надворешна политика, особено на планот на добрососедските односи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Конески: СДММ тоне во безидејност, наместо предлози и поддршка на младите, тие се занимаваат со некрофилство како нивните ментори

СДММ по стапките на нивните ментори, тонејќи во безидејност и немање политики за младите, се занимаваат со некрофилство. Немањето на идеи, предлози, аргументирани критики, туку само ад хок напади врз власта, ги доведува на она место коешто се денес, а тоа е во длабока опозиција, вели Тодор Конески, член на ИК на УМС на ВМРО-ДПМНЕ.
„Иако, според Законот, членот 31 предвидува забрана за употреба во затворени простории. Да е уште потрагично, пратениците или оние коишто им ги пишуваат пресовите, не ги читаат Законите до крај. Бакљите спаѓаат во групата на пиротехнички средства од третата категорија коишто се во слободна продажба и без обврска на продавачот да го извести надлежниот орган, односно Отсекот за оружје. Се продаваат на физички лица, коишто не треба да имаат дозвола за ракување и доаѓаат со упатство за употреба. Притоа, мора да потенцираме дека ги испочитувавме сите параметри и предвидени законски норми за одржувањето на настанот. Пред одржувањето на настанот, ги известивме МВР, противпожарната бригада и Итната медицинска помош, сите кои беа просутни за време на одржувањето на настанот“, вели Конески.
СДММ, додава тој, наместо некрофилство и безидејност, треба да одговори, зошто вака не беа гласни за Модуларната болница, за Онкологија, за Дурмо турс, за Беса транс?
„Зошто не беа гласни кога нивните претседатели на партијата ветуваа многу проекти за млади, но ништо не остварија. Зошто не беа гласни кога се ветуваа студентски домови, нови факултети, нови вработувања за младите, нови стипендии, туку се тоа беше укинато. Зошто не прашаа каде се гугл, фејсбук и ветената стаза за Формула 1? Зошто не го прашаа Заев од каде му се парите за инвестиции за висококатници во Дубаи и акциите во индиска авиокомпанија? Зошто не го прашаа Филипче од каде му е златната виза за Дубаи“, праша тој.
Сега, нагласи тој, има конкретни мерки за младите, наведувајќи ги реконструкцијата на студентски домови, нови факултети и реконструкција на постоечките, нови училишта и реконструкција на голем дел на постоечките училишта и капацитети за учениците, поддршка на младите земјоделци, поддршка на старт ап бизнисите, поддршка за младите при купувањето на свој нов дом исто така нов оперативен план за вработување на младите.
Сите се проекти, според него, кои СДС не успеа да ги оствари за време на нивното владеење.
Порача, СДС и СДММ да не се срамат во јавноста, пред да кажат нешто два пати да размислат.
Македонија
Сиљановска-Давкова: ООН постои да гради мир не само меѓу нациите, туку и со природата

Претседателката Гордана Сиљановска-Давкова се обрати на третата Конференција на Обединетите Нации за океанот (UNOC3) за поддршка на спроведувањето на целта 14 за одржлив развој ,,Зачувување и одржливо користење на океаните, морињата и морските ресурси за одржлив развој”, што се одржува во Ница, Франција.
Во своето обраќање, таа го нагласи виталното значење на океанот како срце на глобалниот климатски систем којшто апсорбира четвртина од емисиите на CO2 и обезбедува половина од кислородот потребен на Земјата. Сиљановска-Давкова укажа дека со нашите неодржливи модели на производство и потрошувачка го нарушуваме океанскиот систем.
Таа посочи дека за да се справиме со кризата, потребен е ефикасен мултилатерализам со силни Обединети нации коишто постојат за да градат мир не само меѓу нациите, туку и со природата.
Според претседателката, ниту една земја, ниту еден континент не може самостојно да воспостави и одржи мир со природата. Таа рече дека симболична коинциденција е што склучувањето на ,,Договорот за зачувување и одржливо користење на морската биолошка разновидност” се случува во татковината на Мишел Сера, авторот на ,,Природниот договор” во којшто луѓето ги третираат Земјата и природата како ним рамноправни партнери.
Истакнувајќи ја македонската заложба за дијалог и силно меѓународно управување со океаните, таа потенцираше дека ја поздравуваме Декларацијата „Нашиот океан, нашата иднина: обединети за итна акција“ и изразуваме поддршка за имплементацијата на Целта за одржлив развој 14 и Акциониот план од Ница.
Како земја, дел од Медитеранот, еден од климатски најранливите региони во светот, даваме приоритет на интегрираното управување со водите. Таа оцени дека овој процес ќе биде многу поефикасен ако се деблокира нашето пристапување кон ЕУ.
Македонија
Обвинителството не докажа дека таткото на Вања го сторил делото, освен нечија перцепција дека бил чуден, нема доказ дека е вмешан, вели адвокатот Туфегџиќ

По денешното судење за убиствата на 14-годишната Вања Ѓорчевска и пензионерот Панче Жежовски, Владимир Туфегџиќ, адвокатот на таткото на убиената Вања, рече дека е изненаден од завршните зборови на Обвинителството. Кажа дека очекувал силна енергија и силни аргументи од обвинителите.
„Напротив, добивме само една сувопарна компилација на прочитани докази, неповрзани едни со други. По однос на таткото можам да кажам дека Јавното обвинителство не докажа дека го сторил кривичното дело кое му се става на товар. Слушнавте и сами дека единствениот темел на обвинението на Обвинителството за таткото е тоа што во даден момент, според нечија перцепција, тој се однесувал чудно, односно бил чуден. Не слушнавме и не е понуден ниту еден доказ за какава било негова инволвираност. Од тие причини сметам дека се остварија моите предвидувања дека Обвинителството нема да го повлече обвинението и верувам во една правила одлука на судот по однос на таткото“, рече адвокатот Туфегџиќ.
И денес Туфегџиќ кажа дека основа на одбраната на таткото е фактот дека не постои ниту една комуникација, ниту што било што би го компромитирало и го повтори неговиот став дека убиствата не се од користољубие туку за да се внесе немир кај населението.
„Не постои ниту една комуникација ниту што било што би го компромитирало таткото или би го довело во врска со овие луѓе за кои во текот на постапката се изведени доволно докази од кои секој обичен набљудувач може да изведе еден логичен заклучок дека во овој случај темелот, основот на обвинението- користољубие е одамна паднат и овде се работи за нешто сосема друго, според мене лично, дело извршено за да се внесе страв и немир кај населението. Особено во основните училишта. А кои биле мотивите, тоа не е до крај расчистено поради една површна истрага и многу пропусти во истражната постапка“, вели адвокатот Туфегџиќ.
Како многупати досега, Туфегџиќ и денес по судењето кажа дека е непотребно во 21 век да се примени тортура оти постојат истражни методи и методологија која овозможува да се дојде до вистината. Очекува во наредниот период да се утврди зошто истражните органи употребиле тортура.
Во завршните зборови денес Обвинителството заклучи дека Вања и Панче се убиени на свиреп и монструозен начин, а татко на Вања дал информација дека таа сама ќе оди на училиште.
За киднапирањата и убиствата на Вања и на Панче се обвинети Љупчо Палевски – Палчо, Влатко Кешишев, Боре Видевски, Велибор Манев, а таткото на Вања, Александар Ѓорчевски се товари за помагање во киднапирање.