Поранешни членови на Президиумот и на Централниот комитет на Левицата, кои се декларираат како основачи на партијата, поднеле кривична пријава против актуелното раководство. Тие ги обвинуваат првите луѓе во Левицата дека фалсификувале документи и ја злоупотребиле својата позиција во партијата како што ги злоупотребиле и правните институции во државата за заштита на сопствената раководна позиција и лични интереси поради кои се киднапирала и самата партија.

Пријавата ја поднеле до Основното јавно обвинителство Скопје и тоа против овластеното лице што ја застапува и претставува политичката партија Левица за сторено кривично дело фалсификување службена исправа и против лицето Н.Н. во Основниот суд Скопје за сторено кривично дело злоупотреба на службената положба и овластувањето.

„До сознанијата за вакво сторено кривично дело членови на партијата доаѓаат при свикување вонреден пленум на кој, поради незадоволство од раководството на партијата, членството гласа недоверба на постојниот ЦК и на Президиумот, недоверба на трибунатот, недоверба на овластено лице, како и на лицето овластено за материјално-финансиско работење и носи одлука за нови управни органи на партијата.

Одлуката се носи во Основниот суд Скопје 2, каде што се наоѓа и судскиот регистар на политички партии како би се извршила промената на овластеното лице. Во текот на рочиштето судот ја изложи на увид регистрациската влошка со сите документи, во која постои и документ заверен со потпис од овластеното лице од раководството на партијата, кој никогаш не бил изгласан на основачкото собрание и кој не постои во листата на поднесени документи при самата регистрација, а за чие постоење основачите првпат дознаваат на тоа рочиште, при што констатираат дека станува збор за документ што раководството го фалсификувало без знаење на пленумот“, пишува во соопштението.

Второ кривично дело и злоупотреба на правните институции на државата е што тој документ се нашол во регистарската влошка по регистрацијата, со што, според нив, се докажува преку фактот дека не постои во барањето за запишување во судскиот регистер, каде што се наведени сите документи поднесени за регистрација на партијата. Групата основачи обвинува дека на тој начин раководството на партијата го корумпирало правниот поредок за да се заштити од волјата на членството и прекршило закони за свое лично обезбедување, а со оглед на правната екпертиза на раководството тие точно знаеле дека ги кршат статутот, сите правни акти на партијата, како и законите на државата.

„Ако раководството на Левицата е во состојба да ја злоупотреби сопствената партија и да крши закони за да осигура свое владеење наместо демократски избор на кој членството ќе ја изрази волјата, не сакаме ни да помислиме како би ја злоупотребиле државата и законите за да обезбедат недемократско владеење. Како да веруваме дека раководството го брани Уставот на државата ако го крши законот за да се спаси од демократскиот глас? Како да веруваме на која било правна експертиза и анализа на раководството на партијата ако свесно корумпираат судски систем за да обезбедат непречено владеење?“, пишува во соопштението потпишано од Перо Оџаклиески од Скопје, основач и член на Президиумот, Владимир Куновски од Скопје, основач и член на ЦК, Андон Андоновски од Скопје, основач и член на ЦК, Марјан Ненов од Скопје, член на ЦК, Петре Вртаноски од Скопје, основач и член на ЦК, Страшо Наумоски од Прилеп, основач и член на ЦК, Јане Илиоски од Прилеп, основач и член на ЦК, Петко Манчевски од Прилеп, основач и член на ЦК, Димче Божиновски од Прилеп, основач.