Најмалку 130 лица, повеќе од 100 ученици, се убиени во вторникот кога талибаните упаднаа во училиште под управа на пакистанската армија во северозападниот град Пешавар и земаа во заложништво стотина ученици и професори, а во акција на пакистанската војска убиени се петмина напаѓачи додека шест самите се разнеле.
 

Најмалку 130 лица, повеќе од 100 ученици, се убиени во вторникот кога талибаните упаднаа во училиште под управа на пакистанската армија во северозападниот град Пешавар и земаа во заложништво стотина ученици и професори, а во акција на пакистанската војска убиени се петмина напаѓачи додека шест самите се разнеле.

Пакистанскиот премиер Наваз Шариф веќе пристигна во Пешевар, за лично да ја надгледува операцијата за ослободување на заложниците. „Тоа е мои деца, и моја лична загуба“, изјави Шариф пред новинарите пред заминувањето од главниот град Исламабад.

Во Пешевра, исто така, долета и началникот на копнените војски, највисокото лице во армиската хиерархија на оваа исламска република, генералот Рахил Шариф кој во вторникот престојуваше во посета на немирната провинција Белуџистан.

Талибанските напаѓачи чиј број не е утврден, според досегашните информации, вооружени со автоматско оружје, гранати а некои од нив ги имале и појасите коишто ги носат бомбашите самоубијци, влегле во училиштето во униформи на пакистанската армија што ја усложнуваше операцијата за нивно ликвидирање.

Според локалните медиуми продолжува операцијата против терористите, а зградата на училиштето е практично разурната.

Според службата за односи со јавност на пакистанската армија, во операцијата загинал еден војник а во четирите часа од операцијата во зградата на училиштето одекнале 15 детонации со разорна моќ.

Операцијата за спасување била отежната и поради тоа што дел од напаѓачите се забарикадирале во зградата и постојано стрелале. За судбината на терористите има контроверзни информации, според едни дел од нив успеале да се сокријат, додека според други сите биле ликвидирани.

Според последните информации, во нападот животите ги загубиле 130 луѓе, од кои најмалку 100 се деца. Повеќе од 130 се повредени и се згрижени во градските болници со прострелни и отворени рани. Во моментот на нападот во училиштето имало до 500 ученици на 10 до 19 годишна возраст и професори.

„Таа бројка би можела да расте“, изјави Бахраманд Кан, претставник на регионалните власти задолжен за информирање на јавноста. Потврдил дека во нападот повеќе од стотина загинати се деца. Локалната главна болница соопшти дека се пренесени мртвите и ранетите на возраст меѓу 10 и 20 години.

Меѓутоа, репортерот на Reuters јави дека неговите соговорници изјавиле дека од училиштето биле евакуирани 500 ученици, и оти не се знае дали во разурната зграда има уште. Хеликоптерите го надлетуваат училиштето, а полицијата се обидува да ги задржи на безбедно растојание скршените од болка родители, јавува репортерот.

Талибаните веднаш ја преземаа одговорноста за нападот, тврдејќи дека станува збор за одмазда за нападите на пакистанската армија врз нивните позиции во племенските паштунски области во северозападниот дел од земјата кон границата со Авганистан,

Преземајќи ја одговорноста за нападот, талибаните исто така тврдат дека целта на нивниот напад не биле децата. „Нашите бомбаши самоубијци влегоа во училиштето, имаат инструкции да не ги пипаат децата, нивната цел е воениот персонал на училиштето“, изјавил портпаролот на талибаните, Мухамад Умар Корасани во соопштението за агенциите.

Во подоцнежното соопштение Корасани истакна дека „Го одбравме военото училиште за напад, бидејќи владата ги напаѓа нашите семејства и жени. Сакаме тие да почувствуваат болка“.

Засега не е јасно дали децата загинале во самоубиствените бомбашки напади, во престрелките меѓу талибанските напаѓачи и пакистанските безбедносни сили или биле погубени од терористите. Дописникот на BBC наведува дека се чини оти милитантите имале намера да убијат што повеќе ученици, а не да ги земат како заложници, како што се претпоставуваше во почетокот.

Воени функционери тврдат дека напаѓачите отвориле оган врз учениците и професорите веднаш штом влегле во училиштето. Сé уште не е објавен бројот на лицата коишто успеале да побегнат.

Нападот започнал во 10 часот претпладне по локално време. Вработен во училиштето Мудасир Аван изјавил дека забележал група од околу шест лица како се прекачува преку ѕидот на територијата на училиштето. „Мислевме дека девата играат, но потоа видовме дека носат многу оружје. Кога започна пукањето се засолнавме во училница, а тие влегуваа во секоја и ги убиваа децата.

Пакистанските талибани често ги напаѓаат училиштата и факултетите, како и учениците и наставниот кадар. Училиштата, без разлика дали станува збор за машки или женски, се цели на бомбашки напади, и досега учениците беа убивани, а наставниците земани како заложници. Според официјалните податоци, повеќе до 1.000 училишта во северен и северозападен Пакистан се нападнато од 2009 година досега.

„Сите училишта, а особено оние за девојки, се сметаат за основни и лесни цели на милитантите“, соопшти Меѓународната кризна група во својот извештај од јуни. Пакистанските талибани велат дека ги напаѓаат училиштата бидејќи тие „ја промовираат западната декаденција и неисламското учење“.

Добитничката на Нобеловата награда за мир Малала Јусуфзаи беше застрелана во главата од непосредна близина и преживеа со чудо, бидејќи преку социјалните мрежи се залагаше за образование на девојчињата и девојките. Кога талибаните ја преземаа контролата над долината Сват во 32007 година, каде што живееше Малала, беше забрането образованието за девојките а на жените да држат настава. Подоцна дозволија учење за девојченцата до четврто одделение. Во следните две години целосно урнаа 119 училишта за девојки./крај/мф/сн

Извор: Макфакс