Патријархот Московски и на цела Русија Кирил и поглаварот на Римокатоличката црква папата Франциск на историската средба во кубанската престолнина Хавана изразија желба за обновување на единството на христијаните и повикаа на нивна заштита на Блискиот исток во историската заедничка изјава.

По завршувањето на разговорот набиен со емоции, прва ваква средба по речиси илјада години од црковниот раскол, поглаварот на Католичката и поглаварот на водечката Православна црква изразија жалење „поради раните нанесени во судирите меѓу христијаните во далечното но и во блиското минато“.

„Свесни за бројните пречки кои уште треба да бидат надвладеани, се надеваме дека нашата средба ќе придонесе за обновувањето на тоа единство по волјата Божја“, истакнаа во заедничката изјава потпишана по завршувањето на повеќе од двочасовниот разговор во салонот на аеродромот во Хавана.

„Единството е на добар пат. Разменивме мислења јасно и без табуа“, коментираше папата Франциск за новинарите по разговорите со патријархот Кирил. „Двете Цркви можат да соработуваат за да ги заштитат христијаните во целиот свет“, рече пред новинарите патријархот.

Како и што се очекуваше, двајцата поглавари ја повикаа меѓународната заедница „со итни акции“ да им помогне на христијаните на Блискиот исток. „Ја повикуваме меѓународната заедница на итни акции за да се спречи да бидат протерани христијаните од Блискиот исток (…) Во Сирија и во Ирак, насилството однесе илјадници животи, оставајќи милиони без покрив над главата и без никакви средства, се наведува во текстот од изјавата, која се однесува на последниот погром што го доживуваат христијаните на Блискиот исток, откако екстремните сунитски групи поведоа конфесионална војна во регионот за создавање на нивниот „калифат“.

„Хуманитарна помош од големи размери е неопходна за народите кои патат и за многубројните бегалци во соседните земји“, додадоа двајцата поглавара.

Историската средба на двајцата поглавари започна со прегратката по што следеа повеќе бакнежи во образите и кус разговорот пред камерите на неколкуте фотографи во салонот на хаванскиот аеродром „Хозе Марти“.

„Конечно се сретнавме, ние сме браќа“, изјави папата Франциск додавајќи „Очигледно ова е Божја волја“. „Сега работите се појасни“, изјави патријархот Кирил.

Речиси тричасовните разговори зад затворени врати меѓу папата кој петокот доцна вечерта по средноевропско време долета на Куба пред да замине во петдневна посета на Мексико, и патријархот руски кој од четвртокот се наоѓа во посета на Хавана, беше првата средба на некој поглавар на Католичката црква и патријархот на најголемата меѓу Православните цркви, повеќе од 165 милиони од 250-те милини православни верници во светот), по расколот меѓу Цариград и Рим во 1054 година.

„Тоа патување е полно со ветувања кои толку ги сакавме мојот брат Кирил, самиот јас и Мексиканците“, изјави папата Франциск за новинарите во авионот со кој патуваше кон Хавана.

Папата Франциск истакна дека христијанското единство може да се постигне не со теолошки спорови, туку само преку заедничкото движење напред.

„Еднаш реков: ако се обидуваме да дојдеме до единство преку истражување, преку теологијата, тогаш ќе дојде Господ, а ние сé уште ќе дискутираме. Не, единството ќе не придвижи напред, така кога Господ ќе дојде ќе не сретне сите заедно“, изјави понтификот во разговорите со новинарите за време на летот од Хавана во Мексико.

„Оваа пастирска декларација на двата епископа, кои се соочува со пастирските проблеми, а не е политички или социолошки документ“, го цитира папата главниот уредник на теоретското језуитско списание La Civilta Cattolica, Антонио Спадаро. Станува збор за разговор кој Ватикан попусто се обидуваше да го организира со децении, а конечно беше подготвен во најголема тајност сé до последниот момент, бидејќи отпорите од патријаршиите беа големи. Причините беа недовербата кон Католичката црква, доживувана како прозелитистичка и украинската криза во која гркокатолиците застанаа на страната на владата во Киев која ја има поддршката од САД и ЕУ против православните рускојазични жители кои се мнозинство на украинскиот исток, иако Ватикан ниеднаш и покрај притисоците на политичарите од Западот никогаш јавно не ја осуди наводно руската интервенција во Украина.

„Русија може да даде многу за светскиот мир“, изјави неодамна папата Франциск.

Разговорот го подготвуваа митрополитот Иларион, челник на одделот за надворешни работи на Московската патријаршија и швајцарскиот кардинал Курт Кох, претседател на Папскиот совет за промовирање на единството на христијаните.

Расколот меѓу католиците и православните е поврзан со теолошки, но и со историските причини: каролиншкиот Запад сакаше да има влијание врз целиот христијански свет, а Истокот сакаше да ја задржи својата автономија. По пресудната средба на Павле Шести и Атенагора во 1964 година во Ерусалим, имаше многу средби и заеднички изјави на папите и цариградските патријарси, кои се теоретски духовни поглавари на православниот свет, но директно се надлежни за само 3,5 милиони верници./крај/мф/сн

Извор: Макфакс