Во  Инфо-центарот на ЕУ по повод Европскиот ден за борба против трговијата со луѓе беше претставен почетокот на Кампањата за подигање на свеста на ранливите заедници за опасностите поврзани со трговијата со луѓе, со посебен фокус на трговијата со луѓе за сексуална и трудова експлоатација и за детски бракови како ризик за појава на трговија со деца.

Кампањата се спроведува во рамките на проектот „Зајакнување на националните капацитети во областа на азилот, миграциите и трговијата со луѓе“, кој е финансиран од Европска Унија а е имплементиран од страна на Меѓународната организација за миграции (ИОМ) во соработка со Министерството за внатрешни работи и Министерството за труд и социјална политика.

По обраќања на претставници од ЕУ и институциите од земјава, следеше презентација на информативното видео кое е дел од кампањата за подигање на свеста на ранливите заедници за опасностите поврзани со трговијата со луѓе.

„Нашата земја се смета за земја на потекло, транзит и крајна дестинација за жртви на трговија со луѓе, а недостигот на свест и информираност во однос на ризиците поврзани со миграција и достапните заштитни мерки помеѓу ранливите категории е сеприсутен“, гласи пораката од видеото.

Целта на оваа кампања е сензибилизирање на широката јавност и медиумите, како и високоризичните категории, за ризиците поврзани со миграција, со фокус на трговијата со луѓе, и подобрување на свеста за опасностите кои произлегуваат од истите, како и информирање за начини на кои може да се пријави експлоатација и да се побара помош, велат од ИОМ.