Тренерот на ПСЖ, Луис Енрике, изјави дека неговиот тим го покажал својот вистински менталитет во првиот натпревар од полуфиналето на Лигата на шампионите против Арсенал и дека добриот почеток на натпреварот бил клучен за победата.

„Размислуваме колку беше тежок натпреварот, бидејќи атмосферата на стадионот беше неверојатна. Мислам дека го покажавме нашиот вистински менталитет, почнавме добро и тоа ни ја зголеми самодовербата“, рече Енрике.

Вчера, ПСЖ го победи Арсенал со 1:0 на гостински терен во Лондон, во првиот натпревар од полуфиналето на Лигата на шампионите.

Реваншот е закажан за 7.мај во Париз, а победникот од овој двомеч ќе игра во финалето на Лигата на шампионите против подобриот тим од дуелот меѓу Барселона и Интер.

„Ова е одличен момент за нас, но мора да се ресетираме и да размислуваме за следниот натпревар. Реваншот ќе биде тежок и тесен. Многу сме среќни и мислам дека нашите навивачи можат да бидат среќни поради нашиот менталитет и амбиција да се бориме на секој натпревар“, додаде Енрике.

Енрике изјави дека играта на неговиот тим може да биде уште подобра.

Преговорите меѓу Карло Анчелоти и Фудбалската асоцијација на Бразил би можеле да пропаднат, објавија шпанските медиуми „АС“ и „Марка“ и бразилски „Глобо“.

„Анчелоти во вторник вечерта отпатува за Лондон за да потпише договор со Бразилската фудбалска асоцијација. Тој не го стори тоа, но менаџерите одговорни за спроведување на договорот очекуваа Анчелоти да го потпише договорот во среда во Мадрид. Сепак, ништо нема да произлезе од тоа бидејќи Анчелоти им кажал дека сепак нема да ја прифати понудата. Тој лично го повика Еденлдо Родригез, претседателот на Бразилската фудбалска асоцијација, и му се заблагодари за понудата“, пишува „Марка“ и додава:

„Дон Карло сега разгледува голема понуда од Саудиска Арабија вредна 50 милиони евра по сезона“.

Во текот на ноќта, шпанските медиуми објавија дека Ал Хилал, му нуди на тренерот на Реал богат договор.

Во секој случај, Карло Анчелоти нема да биде тренер на Реал уште долго. По овој развој на настаните, се чини дека тој нема да го предводи клубот на Светското клупско првенство, туку ќе си замине по завршувањето на сезоната во Ла Лига. До крајот остануваат уште пет кола, а актуелниот шампион Реал има четири бода помалку од лидерот Барселона.

Во текот на својата богата кариера, тој предводеше многу клубови, меѓу кои Милан, Јувентус, Челзи, Пари Сен Жермен, Баерн Минхен, Наполи, Евертон.

Во спектакуларен финиш во „Гејнбриџ Филдхаус“, Индијана Пејсерс ги победија Милвоки Бакс со 119:118 по продолжение и обезбедија пласман во втората рунда од плејофот на Источната конференција. Пејсерси оваа серија ја добија со 4.1.

Публиката во Индијанаполис сведочеше на вистински кошаркарски трилер, кој кулминираше со поените на Тајрис Халибартон во последната секунда од продолжението.

Со тоа, домашниот тим комплетираше неверојатна серија од 8:0 во финишот и добија загубен натпревар. Бакс имаа водство од седум поени (118:111) пред последните 40 секунди.

И покрај нереалниот трипл-дабл на Јанис Адетокумбо (30 поени, 20 скока, 13 асистенции), Милвоки не успеа да ја продолжи серијата.

Гари Трент беше најефикасен кај гостите со 33 поени, додека Еј Џеј Грин додаде 19.

Од другата страна, Халибартон ја предводеше Индијана со 26 поени, Мајлс Тарнер постигна 21, а Арон Нисмит 19.

Во преостанатите два натпревари од плејофот на НБА лигата, кои се одиграа ноќта помеѓу вторник и среда, победи забележаа Детроит Пистонс и Бостон Селтикс.

Детроит Пистонс ги победија Њујорк Никс во „Медисон Сквер Гарден“ со 106:103 во неизвесна завршница и го намалија резултатот во серијата на 3:2, додека Бостон Селтикс демонстрираа моќ пред своите навивачи и ги декласираа Орландо Меџик со 120:89, завршувајќи ја серијата со вкупен резултат од 4:1.

Петтиот натпревар помеѓу Никс и Пистонс донесе драма. Неизвесно беше се до последните три минути кога Кејд Канингем ги презеде конците во свои раце.

Никси имаа шанса да победат во продолжението, но не успеаја да забележат офанзивен скок по промашувањето на Мекбрајд, што му овозможи на Детроит да слави на гостински терен по втор пат во серијата.

Канингем беше најефикасен во победничкиот тим со 24 поени, осум скока и осум асистенции. Аусар Томпсон исто така даде голем придонес со 22 поени.

За Никсите, О Џи Ануноби постигна 19 поени, додека Микел Бриџис и Карл-Ентони Таунс додадоа по 17.

За разлика од натпреварот во Њујорк, Бостон рутински ја заврши серијата против Орландо пред своите навивачи.

Меџик делуваше конкурентно во текот на првото полувреме, на пауза Орландо заминаа со водство49:47, но целосно потона во второто полувреме.

Селтиксите во третата четвртина го решија прашањето за победникот. Џејсон Тејтум одигра одличен натпревар со 35 поени и десет асистенции, додека Џејлен Браун постигна 23 поени.

Кај гостите, само Франц Вагнер беше на висина на задачата со 25 поени.

Бостон сега го чека исходот од серијата меѓу Никс и Пистонс за да го дознае името на противникот во второто коло од плејофот на Источната конференција.