Македонија
Исклучените пратеници во последните клупи

Прераспределба и реорганизација на пратеничките места се подготвува во Собранието по ситнењето на пратеничката група на ВМРО-ДПМНЕ. Иако сè уште официјално нема формирано нова пратеничка група, извори од собраниските служби велат дека се очекува последните редови од собраниските клупи да ги пополнат седумте пратеници исклучени од ВМРО-ДПМНЕ. Пратениците од ВМРО-ДПМНЕ остануваат во првите редови, но веднаш зад нив ќе треба да им отстапат места на довчерашните сопартијци. Столче до нив, најверојатно, ќе има и пратеничката Владанка Авировиќ од СПМ, која заедно со Емилија Александрова, Нола Исмајлоска-Старова, Елизабета Канческа-Милевска, Љубен Арнаудов, Сашо Василевски, Крсто Мукоски и Зеќир Рамчиловиќ, кои, според најавите, ќе функционираат како нова пратеничка група. Иако најавија дека до крајот на неделата ќе се изјаснат како ќе дејствуваат, според информациите на „Макфакс“, тие сè уште се координираат по што ќе го известат претседателот на Собранието, Талат Џафери.
Пратеничката група на ВМРО-ДПМНЕ ја напушти и пратеникот Панчо Минов, кој за „Макфакс“ изјави дека ќе продолжи да дејствува како опозициски пратеник од ГРОМ, без да прецизира дали ја остава отворена можноста и тој да им се приклучи на осумте пратеници од опозицијата, кои го поддржаа предлогот за пристапување кон измени на Уставот.
Со формирање посебна опозициска група, за која, според Деловникот на Собранието, се потребни најмалку петмина, треба да дојде и до нова распределба на членовите на комисиите, како и до нивна вклученост во координативните состаноци кај спикерот Џафери. Како што вчера изјави тој, нема рок до кога пратениците треба да го информираат за својот статус, но официјализирањето на новата пратеничка група се очекува да биде веќе в понеделник. Сликата ќе биде уште појасна в среда за кога е закажана седницата за пратенички прашања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.