Украинскиот претседател Володимир Зеленски вчера изјави дека на денешната средба на европските лидери во Брисел може да се разговара за можното распоредување на странски мировни сили во Украина.

На состанокот на кој ќе се разговара за поддршката за Украина, речиси три години по почетокот на руската инвазија, меѓу другите, според изворите, ќе се соберат лидерите на Германија, Франција, Полска и НАТО.

Украинскиот лидер јавно ја изнесе идејата за распоредување странски трупи додека Украина не се приклучи на НАТО за време на состанокот со германски политичар на 9 декември. Оваа можност првпат беше спомната од францускиот претседател Емануел Макрон во февруари, но не беше постигнат консензус меѓу европските лидери за ова прашање.

Одговарајќи на новинарско прашање за можноста да се разговара на оваа тема во среда во Брисел, Зеленски рече дека „секој што е таму има право да го покрене ова или она прашање“. „Може да има прашања не само за (странскиот) контингент, туку и прашања што ќе ги постави Украина“, рече тој на заедничката прес-конференција со полскиот премиер Доналд Туск во Лавов.

Зеленски рече дека итно зајакнување на Украина ќе биде главната точка на разговорот. Тој ги спомна одбранбените капацитети со долг дострел, западните инвестиции во украинското производство на оружје, како и безбедносните гаранции.

Средбата се одржува во клучен момент кога Украина ги повикува своите сојузници да ја зајакнат како на бојното поле, така и дипломатски пред какви било потенцијални разговори со Русија.

Новоизбраниот американски претседател Доналд Трамп, кој се враќа во Белата куќа во јануари, повеќе пати повикуваше на примирје и рече дека Зеленски треба да се подготви за договор за ставање крај на војната.

Туск повтори дека Полска не размислува за испраќање војници, но рече дека неговата земја ќе направи се што е во нејзина моќ членството на Украина во НАТО да стане реалност. „Сите ние мора да се фокусираме на обезбедување дека какви било преговори за прекин на огнот не се водат од позиција на моќ на руска страна, што значи дека Украина може да смета на целосната поддршка од сите земји вклучени во помагањето на Украина“, рече Туск.

Досега стотици севернокорејски војници се убиени или ранети во руската област Курск, изјави висок американски воен претставник.

„Неколку стотици жртви е нашата најнова проценка за воените загуби што пристигнаа во Русија од Северна Кореја“, рече функционерот, кој сакаше да остане анонимен. Според претходните изјави на Западот, се проценува дека Северна Кореја ја поддржала руската агресија испраќајќи неколку илјади свои војници во руската област Курск.

И украинскиот претседател Володимир Зеленски се осврна на севернокорејските војници, кој нагласи дека Русија се обидува да ги прикрие нивните загуби, а притоа користи и екстремни акции.

„Русија ги обучуваше во тајност, потоа ги распоредуваше, а сега ја крие нивната смрт. По нивната смрт тие го кријат идентитетот со палење на нивните лица“, рече претседателот Зеленски и уште еднаш апелираше до севернокорејската армија „да не се бори за Путин“.

Речиси секој четврти вработен во Европа сега е мигрант. Особено во земјите со високи плати, овие луѓе играат сè поголема улога, според Меѓународната организација на трудот. Така, во северниот, јужниот и во западниот дел на Европа, во периодот од 2013 до 2022 година, бројот на мигранти работници се зголемил од 22,5 на 23,3 отсто.

Мигранти се сите луѓе што работат во друга земја од нивната матична земја, го пренесува „Дојче веле“ текстот од порталот tagesschau.de.

„Работниците мигранти се неопходни за да се ублажи проблемот со недостигот на работна сила и да се придонесе за економскиот раст“, ​​рече генералниот директор на Меѓународната организација на трудот, Гилберт Ф. Хонгбо.

Организацијата ги смета за мигранти и лицата со работна виза и оние што работат во странска земја без валидна работна дозвола. Во глобална споредба, уделот на работниците мигранти во целото работоспособно население е особено висок во Европа, Северна Америка и во арапските земји.

Овие региони се од една страна интересни за мигрантите поради високите плати, а од друга страна потребата во овие региони е особено голема. Еден од факторите што го поттикнува ова е сè постарата популација во овие земји. На тој начин мигрантите доаѓаат на оние работни места кои остануваат празни откако луѓето ќе се пензионираат, а во исто време расте потребата од старатели за стари лица.

Оваа состојба се рефлектира и во бројките: речиси две третини од сите работници во европските земји, кои доаѓаат од друга земја, биле вработени во услужниот сектор. Кај домашното население овој удел изнесува околу половина од работната сила.

Во светот уделот на мигрантите во работната сила во 2022 година беше 4,7 отсто. Меѓународната организација на трудот го проценува вкупниот број работници мигранти во светот на 284,5 милиони. Речиси 255,7 милиони од нив биле постари од 15 години и со тоа биле способни за работа.

Стапката на невработеност кај мигрантите изнесува 7,2 отсто, што е малку повисока отколку кај локалното население (5,2 отсто). Според оваа организација на ОН, причините за тоа би можеле да бидат од лингвистичка природа, значи можните јазични бариери. Но, како причини се наведуваат непризнаените дипломи или уверенија, како и дискриминацијата.