Од денеска почнува со работа зимската служба на Град Скопје, а со тоа и координираните активности за зимско одржување на улиците во надлежност на градот, врз основа на програмата усвоена од Советот и средствата предвидени во буџетот.

Град Скопје за оваа зимска сезона обезбеди 4.000 тони сол, што заедно со преостанатите количества од минатата сезона изнесува 4.500 тони сол, како и 300 тони ладен асфалт, велат од Градот.

„Носител на активностите за зимското одржување на улиците ќе биде ЈП ‘Улици и патишта’ со целокупната механизација и расположивиот кадровски потенцијал. И оваа сезона, врз основа на претходно склучените двогодишни договори, Град Скопје ќе ангажира дополнителна механизација од 15 камиони од фирмата ‘Аполо’, кои се опремени со навигациски уреди и возачи што ќе ги опслужувааат перманентно во текот на целата сезона“, се наведува во соопштението на Град Скопје.

Со програмата, како што наведуваат, се предвидени обемот, динамиката и нивото на одржување на улиците со цел да се обезбеди непречено и безбедно одвивање на сообраќајот на градските сообраќајници во зимски услови.

„Коловозните ленти при одржувањето во зимски услови ќе се расчистуваат според приоритети, како што се критичните точки, пристапите до објектите од витално значење за граѓаните и сообраќајниците од посебно значење за функционирање на сообраќајот до стопанските објекти. Преостанатите јавни претпријатија се задолжени во рамките на програмата и своите надлежност да обезбедат механизација и опрема, а имаат изготвено и посебни потпрограми за расчистување јавни површини во зимски услови“, се додава во соопштението.

Кризниот штаб особено апелира до граѓаните, урбаните заедници, куќните совети и претпријатијата, благовремено да преземаат мерки за отстранување на возилата од коловозите, расчистување на пешачките приоди, приодите до објектите и покривите на објектите. Во спротивно полицијата и комуналните инспектори, врз основа на Законот за јавната чистота, ќе изрекуваат казни.

Посебно се апелира до возачите да ја почитуваат законската регулатива за задолжително користење зимски пневматици, со што ќе придонесат во организирањето на оптималната безбедност на сообраќајот во зимски услови. За расчистување на сервисните улици надлежни се општините.

Зимската сезона почнува денеска, а завршува на 15 март 2019 година.